Airtel Free International Roaming: విదేశాలకు వెళ్లే ఎయిర్ టెల్ (Airtel) పోస్ట్పెయిడ్ వినియోగదారులకు టెలికాం సంస్థ గుడ్‌న్యూస్ చెప్పింది. ఇకపై ప్రత్యేకంగా ఇంటర్నేషనల్ రోమింగ్ ప్యాక్ కొనుగోలు చేయాల్సిన అవసరం లేకుండా ఏడాదికి ఒక అంతర్జాతీయ రోమింగ్ ట్రిప్‌ను ఉచితంగా పొందే అవకాశం కల్పించింది. కొత్త పోస్ట్పెయిడ్ ప్లాన్లలో భాగంగా ప్రతి సిమ్‌కు ఏడాదికి ఒకసారి ఫ్రీ ఇంటర్నేషనల్ రోమింగ్ ప్రయోజనాన్ని అందిస్తోంది. వ్యక్తిగత పోస్ట్పెయిడ్ కనెక్షన్లతో పాటు ఫ్యామిలీ ప్లాన్లకు కూడా ఈ ఆఫర్ వర్తిస్తుంది. ముఖ్యంగా ఫ్యామిలీ ప్లాన్‌లోని ప్రతి సభ్యుడికి ప్రత్యేకంగా ఈ ప్రయోజనం లభిస్తుంది.
ఈ ఫ్రీ ఇంటర్నేషనల్ రోమింగ్ ప్యాక్‌లో భాగంగా 5GB మొబైల్ డేటా, 60 నిమిషాల కాలింగ్, 25 అవుట్‌గోయింగ్ SMSలు, ఇన్‌కమింగ్ SMSలకు ఉచిత సదుపాయం లభిస్తాయి. ఈ ప్రయోజనాల వ్యాలిడిటీ 5 రోజులుగా ఉంటుంది. మరో ముఖ్యమైన విషయం ఏమిటంటే.. పోస్ట్పెయిడ్ ప్లాన్ యాక్టివేట్ చేసిన వెంటనే రోమింగ్ ప్యాక్ వ్యాలిడిటీ ప్రారంభం కాదు. విదేశాలకు వెళ్లినప్పుడు అవసరమైన సమయంలోనే ఈ ప్యాక్‌ను యాక్టివేట్ చేసుకునే అవకాశం ఉంటుంది.
ఎయిర్ టెల్ వ్యక్తిగత వినియోగదారుల కోసం రూ.499 నెలవారీ ప్లాన్ నుంచి కొత్త పోస్ట్పెయిడ్ ప్లాన్లను అందిస్తోంది. ఫ్యామిలీ ప్లాన్లలో రూ.749 ప్లాన్‌లో రెండు సిమ్‌లు, రూ.1,049 ప్లాన్‌లో మూడు సిమ్‌లు, రూ.1,249 ప్లాన్‌లో నాలుగు సిమ్‌లు ఉంటాయి. అలాగే నాలుగు సిమ్‌ల కోసం రూ.1,449 ప్లాన్, ఐదు సిమ్‌ల కోసం రూ.1,799 ప్లాన్ కూడా ఉన్నాయి. ఈ ఆరు ప్లాన్లలోనూ ప్రతి సిమ్‌కు ఏడాదికి ఒక ఫ్రీ ఇంటర్నేషనల్ రోమింగ్ ట్రిప్ లభిస్తుంది.
రోమింగ్ ప్రయోజనంతో పాటు.. కొన్ని ప్లాన్లలో అన్‌లిమిటెడ్ డేటా, కాలింగ్‌తో పాటు స్పామ్‌, మోసాల నుంచి రక్షణ కల్పించే ఫీచర్లను కూడా అందిస్తోంది. అయితే ప్లాన్‌ను బట్టి అదనపు సబ్‌స్క్రిప్షన్లు మారుతాయి.
రూ.499 ప్లాన్‌లో Xstream ప్లే ప్రీమియం, గూగుల్ వన్ వంటి సబ్‌స్క్రిప్షన్లు ఉన్నాయి. అధిక ధర కలిగిన ఫ్యామిలీ ప్లాన్లలో అమెజాన్ ప్రైమ్, జియో హాట్ స్టార్, ఆపిల్ మ్యూజిక్, ఆపిల్ iCloud+, నెట్ఫ్లిక్ వంటి అదనపు ప్రయోజనాలు కూడా లభిస్తాయి.
ఇప్పటికే ఎయిర్ టెల్ పోస్ట్పెయిడ్ లేదా ప్రీపెయిడ్ సేవలను ఉపయోగిస్తున్న కస్టమర్లు కొత్త ప్లాన్లకు అప్‌గ్రేడ్ చేసుకోవచ్చు. ఇందుకోసం Airtel యాప్ ద్వారా లేదా సమీపంలోని ఎయిర్ టెల్ స్టోర్‌ను సందర్శించి కొత్త ప్లాన్‌కు మారవచ్చు. మరోవైపు వోడాఫోన్ ఐడియా (Vi) కూడా ఇటీవల ఇంటర్నేషనల్ రోమింగ్‌పై ఇలాంటి ప్రయోజనాన్ని ప్రకటించింది. Vi ఎంపిక చేసిన ప్రీపెయిడ్, పోస్ట్పెయిడ్, ఎంటర్‌ప్రైజ్ ప్లాన్లలో ఉచిత ఇంటర్నేషనల్ రోమింగ్‌ను అందిస్తోంది. Vi ప్రకారం 170కి పైగా దేశాల్లో ఈ ప్రయోజనం లభిస్తుండగా.. ప్లాన్‌ను బట్టి ఏడాదికి మూడు అంతర్జాతీయ ట్రిప్‌ల వరకు పొందే అవకాశం ఉంది. Vi పోస్ట్పెయిడ్ ప్లాన్లు రూ.501 నుంచి ప్రారంభమవుతున్నాయి.