Team India: మాకు విశ్రాంతి వద్దు, ప్రతి మ్యాచ్ ఆడుతాం.. టీమిండియా సీనియర్ ప్లేయర్స్ భయం అదేనా?

వెస్టిండీస్‌తో ఇటీవల ముగిసిన ఐదు టీ20ల సిరీస్‌లో భారత జట్టుకు చెందిన పలువురు సీనియర్ ఆటగాళ్లు విశ్రాంతి తీసుకోవాలన్న సెలెక్టర్ల సూచనను తిరస్కరించారు. బీసీసీఐ సెలెక్టర్లు విశ్రాంతి ఇస్తామన్నా.. పలువురు సీనియర్ ప్లేయర్స్ వద్దన్నారు. తమకు విశ్రాంతి వద్దని, ప్రతి మ్యాచ్ ఆడుతాం అని సెలెక్టర్లకు ప్లేయర్స్ చెప్పినట్లు ఓ క్రీడా ఛానెల్ తమ కథనంలో పేర్కొంది. చాలా మంది ఆటగాళ్లు వెస్టిండీస్‌తో సిరీస్‌లో ఆడేందుకు ఆసక్తి చూపించారు. చివరి మ్యాచ్ వర్షం కారణంగా రద్దు కావడంతో.. ఐదు మ్యాచ్‌ల సిరీస్‌ 2-2తో సమం అయింది.

అంతర్జాతీయ క్రికెట్‌లో ఆటగాళ్ల పనిభారం, ప్రయాణ అలసట, గాయాల ముప్పుపై ఆందోళనలు పెరుగుతున్న నేపథ్యంలో ఈ పరిణామం ప్రాధాన్యం సంతరించుకుంది. 2026 టీ20 ప్రపంచ కప్ విజేత భారత్ అక్టోబర్ 22 నాటికి 36 టీ20 అంతర్జాతీయ మ్యాచ్‌లు ఆడింది. ఈ విషయంలో అన్ని జట్ల కంటే టీమిండియా ముందుంది. వరుస పర్యటనలు, టోర్నీలతో కూడిన షెడ్యూల్ కారణంగా ఆటగాళ్లకు విశ్రాంతి తీసుకునేందుకు తక్కువ సమయం లభిస్తోంది. వెస్టిండీస్‌తో సిరీస్‌ను యువ ఆటగాళ్లకు అవకాశాలు కల్పించేందుకు, భారత బెంచ్ బలాన్ని పరీక్షించేందుకు సెలెక్టర్లు ఉపయోగించుకోవాలని భావించారు. అయితే జపాన్‌లో జరిగిన ఆసియా క్రీడల్లో పాల్గొన్న పలువురు సీనియర్ ఆటగాళ్లు.. విశ్రాంతి తీసుకోవడం కంటే సిరీస్‌లో ఆడేందుకు సిద్ధంగా ఉన్నట్లు వెల్లడించినట్లు సమాచారం.

దీనికి ప్రధాన కారణం జట్టులో చోటు కోసం కొనసాగుతున్న పోటీనే కావచ్చని తెలుస్తోంది. యువ క్రికెటర్లు అవకాశాల కోసం ఎదురుచూస్తుండటంతో.. ఇప్పటికే జట్టులో స్థానం సంపాదించిన ఆటగాళ్లు తమ స్థానాన్ని కోల్పోతామనే ఆందోళనతో విశ్రాంతి తీసుకోవడానికి వెనుకాడుతున్నట్లు భావిస్తున్నారు. గతంలో ప్రత్యామ్నాయంగా జట్టులోకి వచ్చిన ఆటగాళ్లు తమ ప్రదర్శనతో రెగ్యులర్ స్థానాలను సంపాదించుకున్న సందర్భాలు ఉన్నాయి. దీంతో అలసట ఉన్నప్పటికీ స్వచ్ఛందంగా విశ్రాంతి తీసుకోవడం సీనియర్ ఆటగాళ్లకు కష్టమైన నిర్ణయంగా మారుతోంది. ఈ పరిస్థితి సెలెక్టర్లకు కూడా సవాలుగా మారింది. సీనియర్ ఆటగాళ్లకు విశ్రాంతి కల్పించడం ద్వారా కొత్తవారిని పరీక్షించే అవకాశం ఉంటుంది. అయితే ఫిట్‌గా ఉన్న ఆటగాళ్లు జట్టుకు అందుబాటులో ఉండాలని కోరుకుంటే.. వారిని విశ్రాంతి తీసుకునేలా చేయడం అంత సులభం కాదు.

జూన్ నుంచి భారత పురుషుల జట్టు వరుస క్రికెట్ పర్యటనలతో బిజీగా ఉంది. ఐర్లాండ్, ఇంగ్లాండ్, జింబాబ్వే, స్వదేశంలో అఫ్గానిస్థాన్, జపాన్, ఆసియా క్రీడలు, వెస్టిండీస్‌తో స్వదేశీ సిరీస్‌లలో పాల్గొంది. తరచూ ప్రయాణాలు, వివిధ వాతావరణ పరిస్థితులకు అలవాటు పడటం, మ్యాచ్‌ల మధ్య తక్కువ విరామం ఆటగాళ్లపై శారీరక ఒత్తిడిని పెంచుతున్నాయి. వెస్టిండీస్ సిరీస్ ముగిసిన వారం రోజుల్లోపే భారత జట్టు న్యూజిలాండ్ పర్యటనకు బయలుదేరింది. ఈ పర్యటనలో ఐదు టీ20లు, మూడు వన్డేలు, రెండు టెస్టులు జరగనున్నాయి. ముఖ్యంగా మూడు ఫార్మాట్లలో ఆడే ఆటగాళ్లకు కోలుకునేందుకు తగిన సమయం లభించడం కష్టంగా మారనుంది. తరచూ విమాన ప్రయాణాలు, జెట్ లాగ్, వాతావరణ మార్పులు, శిక్షణ, మ్యాచ్‌లలో పాల్గొనడం వల్ల ఆటగాళ్ల అలసట మరింత పెరిగే అవకాశం ఉంది. అందుకే పనిభారాన్ని నిర్వహించేటప్పుడు సెలెక్టర్లు, సహాయక సిబ్బంది ప్రయాణ షెడ్యూల్, విశ్రాంతి సమయం, వ్యక్తిగత ఫిట్‌నెస్, గత గాయాలు, మ్యాచ్‌ల తీవ్రత వంటి అంశాలను పరిగణనలోకి తీసుకోవాల్సి ఉంటుంది.