Sanju Samson: సంజు శాంసన్ సూపర్ ఫామ్ వెనుక సీక్రెట్..! బయటపెట్టిన టీమిండియా మాజీ కోచ్

Sanju Samson: కీలక మ్యాచ్‌లలో టీమిండియాను గట్టు ఎక్కించింది సంజు శాంసన్‌.. అసలు.. సంజు.. సూపర్‌ నాక్‌ లేకపోతే.. భారత్‌ ఫైనల్‌కు చేరేదా? అంటే లేదనే చెప్పాలి.. అయితే, ఎన్నో అవమానాలు ఎదుర్కొన్న సంజుకు ఇంటి సూపర్‌ ఫామ్‌ ఎలా సాధ్యమైంది..? అనేది ఇప్పుడు చర్చ.. 2026 ఐసీసీ పురుషుల టీ20 ప్రపంచకప్‌లో భారత వికెట్‌కీపర్ బ్యాట్స్‌మన్ సంజు శాంసన్ అద్భుతమైన ఫామ్‌లో ఉన్నాడు. కీలక మ్యాచ్‌లలో అతను ఆడిన ఇన్నింగ్స్‌లు టీమ్ ఇండియాకు విజయాన్ని అందించడంలో ముఖ్య పాత్ర పోషించాయి. ముఖ్యంగా వెస్టిండీస్ మరియు ఇంగ్లాండ్‌పై సంజు చేసిన బ్యాటింగ్ అభిమానులను ఆకట్టుకుంది.

ఇప్పుడు టైటిల్ పోరులో భారత్ మరియు న్యూజిలాండ్ జట్లు తలపడనున్నాయి. ఈ ఫైనల్ మ్యాచ్ మార్చి 8న అహ్మదాబాద్‌లో జరగనుంది. ఈ నేపథ్యంలో భారత మాజీ కోచ్ రవి శాస్త్రి.. సంజు శాంసన్ సూపర్ ఫామ్ వెనుక ఉన్న అసలు సీక్రెట్‌ను బయట పెట్టాడు..

వెస్టిండీస్‌పై అద్భుత ఇన్నింగ్స్
వెస్టిండీస్‌తో జరిగిన మ్యాచ్‌లో సంజు శాంసన్ అద్భుతంగా బ్యాటింగ్ చేసి అజేయంగా 97 పరుగులు చేశాడు. అతని ఇన్నింగ్స్ కారణంగా భారత్ చిరస్మరణీయ విజయం సాధించింది. ఆ మ్యాచ్‌లో సంజు తన క్లాస్ మరియు ఆత్మవిశ్వాసాన్ని చూపించాడు.

ఇంగ్లాండ్‌పై పేలుడు ఇన్నింగ్స్
సెమీఫైనల్లో ఇంగ్లాండ్‌తో జరిగిన మ్యాచ్‌లో కూడా సంజు అద్భుత ప్రదర్శన చేశాడు. అతను 89 పరుగుల విలువైన ఇన్నింగ్స్ ఆడి భారత్‌కు భారీ స్కోరు సాధించడంలో కీలక పాత్ర పోషించాడు. భారత్ ఆ మ్యాచ్‌లో 253/7 స్కోరు చేసి చివరికి 7 పరుగుల తేడాతో విజయం సాధించిన విషయం విదితే..

రవిశాస్త్రి బయట పెట్టిన సంజు విజయ రహస్యం
ఐసీసీ షో రివ్యూలో మాట్లాడిన రవిశాస్త్రి, సంజు విజయానికి ప్రధాన కారణం అతని మానసిక మార్పు మరియు స్థిరత్వం అని చెప్పారు. “సంజు శాంసన్‌ కు ప్రతిభ ఎప్పటినుంచో ఉంది.. కానీ, ప్రతిభ ఒక్కటే సరిపోదు. స్థిరంగా ప్రదర్శన ఇవ్వడం కూడా చాలా ముఖ్యం. గతంలో అతను కొన్ని సార్లు తప్పు షాట్ ఎంపిక వల్ల పెద్ద స్కోర్లు చేయలేకపోయాడు. ఇప్పుడు అతను తన ఆటను మరింత పరిపక్వంగా మార్చుకున్నాడు అని తెలిపారు. సంజు ప్రతిభపై ఎప్పుడూ సందేహం లేదని రవిశాస్త్రి చెప్పారు. అయితే గతంలో స్థిరత్వం లేకపోవడం వల్ల అభిమానులు కొంత నిరాశ చెందారని అన్నారు. ప్రస్తుతం 31 ఏళ్ల వయసులో సంజు మరింత పరిణతి చెందిన ఆటగాడిగా మారాడు. ఇప్పుడు అతను తన షాట్ ఎంపికలో జాగ్రత్తగా ఉండటం, తన బలాలపై నమ్మకం పెట్టుకోవడం వల్ల మంచి ఫలితాలు సాధిస్తున్నాడని శాస్త్రి తెలిపారు.

మొత్తంగా టోర్నమెంట్ ప్రారంభంలో సంజు పెద్దగా ప్రభావం చూపలేకపోయాడు. నమీబియా మరియు జింబాబ్వేతో జరిగిన ప్రారంభ మ్యాచ్‌లలో అతను పెద్ద స్కోర్లు చేయలేదు. దీంతో అతని జట్టులో స్థానం గురించి కూడా ప్రశ్నలు వచ్చాయి. అయితే కీలక సమయంలో సంజు తన అసలైన ప్రతిభను చూపించాడు. వెస్టిండీస్ మరియు ఇంగ్లాండ్‌పై అద్భుత ఇన్నింగ్స్‌లు ఆడి విమర్శకులకు సమాధానం ఇచ్చాడు. ఇప్పుడు టీమ్ ఇండియా టైటిల్‌కు ఒక్క అడుగు దూరంలో ఉంది. ఫైనల్‌లో సంజు శాంసన్ ఇదే ఫామ్ కొనసాగిస్తే భారత్‌కు కప్ గెలిచే అవకాశాలు మరింత పెరుగుతాయి.