టీ20 వరల్డ్కప్ 2026కు ముందు ఆఫ్ఘనిస్థాన్ క్రికెట్ బోర్డు కీలక నిర్ణయం తీసుకున్నట్లు సమాచారం. భారత మాజీ క్రికెటర్ దినేశ్ కార్తిక్ను ఆఫ్ఘనిస్థాన్ జట్టుకు మెంటర్గా నియమించనున్నట్లు తెలుస్తోంది. దీనిపై త్వరలోనే అధికారిక ప్రకటన వెలువడనుంది. టీ20 ఫార్మాట్లో ఆఫ్ఘన్ జట్టు ప్రదర్శనను మరింత మెరుగుపర్చాలనే లక్ష్యంతోనే డీకేను మెంటర్గా తీసుకున్నట్లు తెలుస్తోంది. ఇప్పటికే ఐపీఎల్ టీమ్ ఆర్సీబీకి దినేశ్ కార్తిక్ బ్యాటింగ్ కోచ్ అండ్ మెంటర్గా సేవలందిస్తున్న విషయం తెలిసిందే. డీకే భారత్ తరఫున 26 టెస్టులు, 94 వన్డేలు, 60 టీ20కు ఆడారు.
భారత క్రికెట్లో ఆటగాడిగా మాత్రమే కాకుండా వ్యూహాత్మకంగా కూడా దినేశ్ కార్తిక్ మంచి పేరు సంపాదించారు. ముఖ్యంగా టీ20 క్రికెట్లో మ్యాచ్ పరిస్థితులకు అనుగుణంగా ఆలోచించే సామర్థ్యం, యువ ఆటగాళ్లతో సానుకూలంగా వ్యవహరించే నైపుణ్యం అతడి ప్రత్యేకత. ఈ నేపథ్యంలో ఆఫ్ఘనిస్థాన్ లాంటి ఎదుగుతున్న జట్టుకు డీకే అనుభవం ఎంతగానో ఉపయోగపడుతుందని క్రికెట్ విశ్లేషకులు భావిస్తున్నారు. ఇటీవలి కాలంలో ఆఫ్ఘనిస్థాన్ టీమ్ అంతర్జాతీయ క్రికెట్లో అద్భుత ప్రదర్శన చేస్తోంది. టీ20 ఫార్మాట్లో స్పిన్ బౌలింగ్, దూకుడు బ్యాటింగ్తో పెద్ద జట్లకు గట్టి పోటీ ఇస్తోంది. అయితే కీలక మ్యాచ్ల్లో అనుభవ లోపం కారణంగా కొన్ని విజయాలను చేజార్చుకుంది. ఈ లోటును పూరించేందుకే దినేశ్ కార్తిక్ను మెంటర్గా తీసుకొస్తున్నట్లు సమాచారం.
Also Read: T20 World Cup 2026: ఓడిపోతారని పాకిస్థాన్కు ముందే తెలుసు.. అందుకే ఈ డ్రామా!
మెంటర్గా దినేష్ కార్తిక్ ఆటగాళ్ల మానసిక స్థైర్యం, మ్యాచ్ ఫినిషింగ్, ఒత్తిడిలో నిర్ణయాలు తీసుకునే విధానం వంటి అంశాలపై ప్రత్యేక దృష్టి పెట్టనున్నారని తెలుస్తోంది. ముఖ్యంగా యువ బ్యాట్స్మెన్లు, వికెట్కీపర్లకు ఆయన ఇచ్చే సూచనలు జట్టుకు అదనపు బలంగా మారనున్నాయి. టీ20 వరల్డ్కప్ లాంటి పెద్ద టోర్నీలో చిన్న తప్పిదమే మ్యాచ్ ఫలితాన్ని మార్చే అవకాశం ఉండటంతో.. కార్తిక్ అనుభవం కీలకంగా మారనుంది. టీ20 వరల్డ్కప్ 2026 ఫిబ్రవరి 7 నుంచి ప్రారంభం కానుంది. ఈ నేపథ్యంలో ఇప్పటికే అన్ని జట్లు తమ సన్నాహకాల్లో నిమగ్నమయ్యాయి. ఆఫ్ఘనిస్థాన్ కూడా బలమైన ప్రణాళికతో టోర్నీలోకి దిగాలని భావిస్తోంది. కార్తిక్ మెంటర్గా బాధ్యతలు చేపడితే.. ఆఫ్ఘన్ జట్టు ఈసారి మరింత ఆత్మవిశ్వాసంతో బరిలోకి దిగనుంది. ఇది డీకేకే లక్కీ ఛాన్స్ అనే చెప్పాలి. సక్సెస్ అయితే టీమిండియాకు పనిచేసే అవకాశం వస్తుందనడంలో ఎలాంటి సందేహం లేదు.