Shai Hope Praises Sherfane Rutherford and Roston Chase: భారత్‌తో జరిగిన రెండో టీ20లో వెస్టిండీస్‌ సంచలన విజయాన్ని అందుకుంది. శుక్రవారం రాత్రి రాంచీ వేదికగా జరిగిన మ్యాచ్‌లో టీమిండియా ముందుగా 20 ఓవర్లలో 5 వికెట్ల నష్టానికి 249 పరుగుల భారీ స్కోరు చేసింది. వెస్టిండీస్‌ 18.3 ఓవర్లలోనే 4 వికెట్లు మాత్రమే కోల్పోయి 252 పరుగులు చేసి ఆరు వికెట్ల తేడాతో అద్భుత విజయం సాధించింది. ఈ భారీ లక్ష్య ఛేదనలో కెప్టెన్ షై హోప్‌ (102), రోవ్‌మన్‌ పావెల్‌ (24), షెర్ఫేన్‌ రూథర్‌ఫోర్డ్‌ (84) కీలక పాత్ర పోషించారు. మ్యాచ్‌ అనంతరం విండీస్ కెప్టెన్ హోప్‌ మాట్లాడుతూ.. 5 పరుగులకే 2 వికెట్లు కోల్పోవడంతో ఓటమి తప్పదనుకున్నా అని చెప్పాడు. అయితే బౌలర్‌ రోస్టన్‌ చేజ్‌ అద్భుతంగా బౌలింగ్ చేసి తమని మ్యాచ్‌లో నిలిపాడని, పావెల్‌ అద్భుతంగా ఆడాడని చెప్పుకొచ్చాడు.
కష్టాలు తప్పవని భావించా:
‘ఛేదన ప్రారంభంలోనే 5 పరుగులకే 2 వికెట్లు కోల్పోవడంతో కష్టాలు తప్పవని భావించా. అయితే భారత్‌లో లక్ష్య ఛేదన చేస్తున్నప్పుడు ఎంతటి స్కోరు ఉన్నా మ్యాచ్‌లో నిలబడే అవకాశం ఉంటుందని మేము నమ్ముతాము. అయినప్పటికీ 5 పరుగులకే 2 వికెట్లు కోల్పోవడం మాత్రం మాకు పెద్ద సవాలుగా మారింది. నేను, రోవ్‌మన్‌ పావెల్‌ కలిసి కీలక భాగస్వామ్యాన్ని నిర్మించిన తర్వాత జట్టులో ఆత్మవిశ్వాసం పెరిగింది. ఇన్నింగ్స్‌కు మంచి ఊపు వచ్చింది. ఆ తర్వాత క్రీజులోకి వచ్చిన షెర్ఫేన్‌ రూథర్‌ఫోర్డ్‌ అద్భుతంగా బ్యాటింగ్‌ చేశాడు. జట్టుకు అవసరమైన వేగాన్ని అందించి, విజయానికి చేరువ కావడానికి దోహదపడ్డాడు’ అని షై హోప్‌ తెలిపాడు.
భాగస్వామ్యాల్లో కీలకం:
‘క్రికెట్‌లో భాగస్వామ్యాల్లో బ్యాటింగ్‌ను మరింత మెరుగుపరుచుకోవాల్సిన అవసరం ఉందని నేను నమ్ముతాను. అప్పుడప్పుడు ఈ విషయంలో మేం వెనుకబడుతుంటాం. అయితే కొన్ని సందర్భాల్లో మన భాగస్వామి షాట్లు ఆడుతుంటే మనం సంయమనంతో ఉండి అతడికి అవకాశం ఇవ్వాలి. ఒక బ్యాటర్‌ దూకుడుగా ఆడుతున్నప్పుడు మరో బ్యాటర్‌ అనవసరమైన రిస్కులు తీసుకోకుండా సహకరించడం ముఖ్యం. ఆ సమయంలో మ్యాచ్‌కు అవసరమైన రన్‌రేట్‌ను కొనసాగించగలిగితే చాలు. అనవసరమైన రిస్కులు తీసుకోవాల్సిన అవసరం లేదు. మేం బాగానే ఆడుతున్నామని అనిపించింది. అందుకే లక్ష్యాన్ని ఎలా ఛేదించాలనే విషయంపై సరైన అంచనాతో ముందుకు సాగాం’ అని హోప్‌ చెప్పుకొచ్చాడు.
రోస్టన్‌ చేజ్‌ అద్భుతం:
బౌలర్‌ రోస్టన్‌ చేజ్‌ను షై హోప్‌ ప్రత్యేకంగా ప్రశంసించాడు. బ్యాటింగ్‌కు అనుకూలంగా ఉన్న పిచ్‌పై ఓవర్‌కు ఆరు పరుగుల చొప్పున మాత్రమే ఇచ్చి ప్రత్యర్థి జట్టును కట్టడి చేయడం గొప్ప విషయమని ప్రశంసించాడు. ‘రోస్టన్‌ చేజ్‌ అద్భుతం. ఇలాంటి పిచ్‌, మైదానంలో ఓవర్‌కు ఆరు పరుగుల చొప్పున మాత్రమే ఇవ్వడం గొప్ప విషయం. అతడు తన బౌలింగ్‌తో మమ్మల్ని మ్యాచ్‌లో నిలిపాడు. బ్యాటింగ్‌కు అనుకూలంగా ఉన్న పరిస్థితుల్లో బౌలింగ్ చేయడం చాలా కష్టం. అయినప్పటికీ అతడు అద్భుతంగా బౌలింగ్ చేసి ప్రత్యర్థి స్కోరును నియంత్రించాడు. దాంతో లక్ష్య ఛేదనలో మాకు పని కొంత సులభమైంది’ అని హోప్‌ వివరించాడు. రెండో టీ20లో చేజ్‌ తన నాలుగు ఓవర్లలో 24 రన్స్ మాత్రమే ఇచ్చి మూడు వికెట్స్ పడగొట్టాడు.