న్యూజిలాండ్తో జరుగుతున్న తొలి టెస్టులో భారత్ పటిష్ట స్థితిలో నిలిచింది. వెల్లింగ్టన్లో జరుగుతున్న ఈ మ్యాచ్లో మూడో రోజు ఆట ముగిసే సమయానికి గిల్ సేన 486/4 పరుగులు చేసింది. దీంతో తొలి ఇన్నింగ్స్లో 118 పరుగుల ఆధిక్యంలో కొనసాగుతోంది. ఈ మ్యాచ్లో అద్భుతంగా బ్యాటింగ్ చేసిన టీమిండియా స్టార్ బ్యాటర్ కేఎల్ రాహుల్ సెంచరీతో చెలరేగాడు. 290 బంతుల్లో 136 పరుగులు చేసి జట్టును మెరుగైన స్థితిలో నిలిపాడు. ఈ సందర్భంగా తన సెంచరీ వెనుక ఉన్న కష్టాన్ని రాహుల్ వెల్లడించాడు.
మ్యాచ్ అనంతరం మీడియాతో మాట్లాడిన కేఎల్ రాహుల్.. నెట్స్లో తీవ్రంగా సాధన చేయడమే తన సెంచరీ వెనుక అసలు రహస్యం అని చెప్పాడు. ‘భారత్-ఏ తరఫున ఆడిన అనధికారిక టెస్టు మ్యాచ్ల్లో ఆశించిన స్థాయిలో పరుగులు చేయలేకపోయా. అయితే ఆ ప్రదర్శనలతో నిరాశ చెందకుండా నెట్స్లో తీవ్రంగా సాధన చేశా. పరిస్థితులకు అనుగుణంగా నా బ్యాటింగ్ను మెరుగుపరుచుకున్నా. ఈ మ్యాచ్లో ఎలా ఆడాలనే విషయంలో ముందుగానే స్పష్టమైన ప్రణాళికతో బరిలోకి దిగాను. సెంచరీ సాధించడం ఎంతో ఆనందంగా ఉంది’ అని రాహుల్ తెలిపాడు.
తన వికెట్ విషయంలో న్యూజిలాండ్ ఆటగాడు గ్లెన్ ఫిలిప్స్ రివ్యూ తీసుకోకపోవడంపై కేఎల్ రాహుల్ సరదాగా స్పందించాడు. మ్యాచ్ ముగిసిన తర్వాత ఫిలిప్స్కు కొన్ని డ్రింక్స్ కొనిస్తానని చమత్కరించాడు. ఆ సమయంలో రివ్యూ తీసుకుంటారేమోనని ఎదురుచూస్తూ గడిపిన 15 సెకన్లు తన జీవితంలోనే అత్యంత నెమ్మదిగా గడిచాయని చెప్పాడు. ఫిలిప్స్ మనసు మార్చుకుని రివ్యూ తీసుకోకూడదని తాను ఆశించినట్లు నవ్వుతూ వెల్లడించాడు. భారత్ ఇన్నింగ్స్లోని 7వ ఓవర్లో 5 పరుగుల వద్ద రాహుల్ ఎల్బీడబ్ల్యూ అప్పీల్ నుంచి బయటపడ్డాడు. ఫిలిప్స్ ఎల్బీడబ్ల్యూను తేలికగా తీసుకోవడంతో.. న్యూజిలాండ్ రివ్యూ తీసుకోలేదు.
ఇక ఈ సెంచరీతో లోకేష్ రాహుల్ పలు అరుదైన రికార్డులను తన ఖాతాలో వేసుకున్నాడు. SENA దేశాలైన దక్షిణాఫ్రికా, ఇంగ్లండ్, ఆస్ట్రేలియా, న్యూజిలాండ్లలో టెస్టు సెంచరీలు సాధించిన తొలి భారత ఓపెనర్గా నిలిచాడు. అంతేకాకుండా ఈ నాలుగు దేశాల్లోనూ టెస్టు శతకాలు నమోదు చేసిన ఐదో భారత బ్యాటర్గా అరుదైన ఘనత సాధించాడు. ఇప్పటివరకు టెస్టుల్లో 13 సెంచరీలు సాధించిన రాహుల్.. అందులో ఎనిమిది శతకాలను SENA దేశాల్లోనే నమోదు చేయడం విశేషం.

