Vaibhav Sooryavanshi Talent: రాహుల్ ద్రవిడ్ కాదు.. వైభవ్ సూర్యవంశీ టాలెంట్‌ను మొదట గుర్తించింది ఇతడే!

Vaibhav Sooryavanshi’s talent was first spotted by Samar Quadri: ఐపీఎల్ 2026లో భారత యువ సంచలనం వైభవ్ సూర్యవంశీ సృష్టిస్తున్న విధ్వంసం గురించి ఇప్పుడు ప్రపంచ క్రికెట్ మాట్లాడుకుంటోంది. కేవలం 15 ఏళ్ల వయసులోనే రాజస్థాన్ రాయల్స్ (ఆర్ఆర్) తరఫున ఆడుతూ.. ప్రత్యర్థి బౌలర్లపై విరుచుకుపడుతూ పరుగుల వరద పారిస్తున్నాడు. ఈ సీజన్‌లో ఇప్పటివరకు 15 మ్యాచ్‌లు ఆడిన బుడ్డోడు.. 47.14 అద్భుత సగటు, 242.85 స్ట్రైక్‌రేట్‌తో 680 పరుగులు చేశాడు. ఇందులో ఒక సెంచరీ, నాలుగు హాఫ్ సెంచరీలు ఉన్నాయి. ఈ సీజన్‌లో ఇప్పటికే 65 భారీ సిక్సర్లు బాదటం వైభవ్ విధ్వంసక బ్యాటింగ్‌కు నిదర్శనం. అద్భుతంగా ఆడుతున్న బుడ్డోడు.. ఆర్ఆర్, భారత భవిష్యత్తు స్టార్‌గా ప్రశంసలు అందుకుంటున్నాడు. అయితే వైభవ్ గురించి ఓ ఆసక్తికర విషయం వెలుగులోకి వచ్చింది.

వైభవ్ సూర్యవంశీని రాజస్థాన్ రాయల్స్‌కు తీసుకొచ్చింది మాజీ ఆటగాడు రాహుల్ ద్రవిడ్ అని చాలామంది భావిస్తుంటారు. కానీ బుడ్డోడి టాలెంట్‌ను తొలిసారి గుర్తించింది బిహార్ మాజీ స్పిన్నర్, ప్రస్తుతం రాజస్థాన్ రాయల్స్ నెట్ బౌలర్‌గా పనిచేస్తున్న సమర్ ఖాద్రి. ఓ లోకల్ మ్యాచ్‌లో చిన్న వయసులోనే వైభవ్ భారీ సిక్సర్లు బాదుతుండటాన్ని చూసి సమర్ ఆశ్చర్యపోయాడట. అప్పుడే ఈ కుర్రాడిలో అసాధారణ ప్రతిభ ఉందని గుర్తించాడు. ఆ తర్వాత ఒకసారి రాజస్థాన్ రాయల్స్ మాస్టర్‌మైండ్ జుబిన్ భరూచా.. టాలెంటెడ్ యువ ఆటగాళ్లను గుర్తించాలని సమర్ ఖాద్రికి సూచించాడు. వెంటనే అతడు వైభవ్ పేరును చెప్పాడు.

సమర్ ఖాద్రి చెప్పడంతో వైభవ్‌ను చెన్నైలో నిర్వహించిన స్కౌటింగ్ ట్రయల్స్‌కు ఆర్ఆర్ కోచింగ్ స్టాఫ్ పిలిచింది. అక్కడ బుడ్డోడు తన బ్యాటింగ్‌తో అందరినీ షాక్‌కు గురిచేశాడు. కేవలం 60 బంతుల్లోనే 150కి పైగా పరుగులు బాదటమే కాకుండా.. 150 కిలోమీటర్ల వేగంతో వచ్చిన బంతులను కూడా సిక్సర్లుగా మలిచాడు. ఆ ఇన్నింగ్స్ చూసిన రాజస్థాన్ మేనేజ్‌మెంట్, కోచ్‌లు ఫిదా అయిపోయారు. దీంతో 2024లో సూర్యవంశీని రూ.1.10 కోట్లకు ఆర్ఆర్ కొనుగోలు చేసింది. అయితే అతడు 2024 సీజన్‌లో ఒక్క మ్యాచ్ కూడా ఆడలేదు. జట్టు అతడిని భవిష్యత్తు కోసం సిద్ధం చేసింది. అనంతరం 2025 సీజన్‌లో వైభవ్ ఐపీఎల్ అరంగేట్రం చేశాడు. తన తొలి సీజన్‌లోనే 7 మ్యాచ్‌లలో 252 పరుగులు చేసి అందరి దృష్టిని ఆకర్షించాడు. 36.00 సగటు, 206.55 స్ట్రైక్‌రేట్‌తో ఆడిన అతడు భవిష్యత్తులో పెద్ద స్టార్ అవుతాడనే సంకేతాలు అప్పుడే ఇచ్చాడు.

ఇక ఇప్పుడు ఐపీఎల్ 2026లో వైభవ్ సూర్యవంశీ బ్యాట్ నుంచి పరుగుల వరద పారుతోంది. ప్రపంచ స్థాయి బౌలర్లను కూడా ఎలాంటి బెరుకు లేకుండా ఎదుర్కొంటూ మ్యాచ్‌లను ఒంటిచేత్తో గెలిపిస్తున్నాడు. బుమ్రా, బౌల్ట్, భువీ, షమీ, సిరాజ్, కమిన్స్, హేజిల్‌వుడ్‌, రబాడ, నరైన్ లాంటి టాప్ బౌలర్లను కూడా వదలలేదు. మొదటి బంతి నుంచి బౌలర్లపై విరుచుకుపడుతూ చూస్తుండగానే హాఫ్ సెంచరీ, సెంచరీ బాదేస్తున్నాడు. బౌలర్లను ఊచకోత కోస్తూ తన విధ్వంసకర బ్యాటింగ్‌తో ప్రపంచ రికార్డులు సృష్టిస్తున్నాడు. త్వరలోనే భారత జట్టుకు కూడా ఎంపిక కావడం ఖాయమనే చర్చలు మొదలయ్యాయి. ఈ స్థాయికి చేరడానికి కారణమైన సమర్ ఖాద్రి పేరు ఇప్పుడు సోషల్ మీడియాలో వైరల్ అవుతోంది. ఒక లోకల్ మ్యాచ్‌లో గుర్తించిన ప్రతిభను ప్రపంచానికి పరిచయం చేసిన సమర్ ఖాద్రిపై అభిమానులు ప్రశంసలు కురిపిస్తున్నారు.