Vaibhav Sooryavanshi: అభిషేక్ శర్మ రికార్డుకు చెక్ పెట్టిన వైభవ్ సూర్యవంశీ.. ఒక్క అడుగు దూరంలోనే..

రాజస్థాన్ రాయల్స్ జట్టులో 15 ఏళ్ల వయసుకే స్థానం సంపాదించి, తన విధ్వంసకర బ్యాటింగ్‌తో వైభవ్ సూర్యవంశీ క్రికెట్ ప్రపంచాన్ని ఆశ్చర్యపరుస్తున్నాడు. ఐపీఎల్ 2026 సీజన్‌లో కేవలం 9 మ్యాచ్‌ల్లోనే 400 పరుగులు సాధించి, 238.09 స్ట్రైక్ రేట్‌తో సిక్సర్ల సునామీ సృష్టించాడు. ఒక సెంచరీ (103), రెండు హాఫ్ సెంచరీలతో గతేడాది కంటే మెరుగైన ప్రదర్శన కనబరుస్తున్నాడు. చిన్న వయసులోనే అంతర్జాతీయ స్థాయి బౌలర్లను ఎదుర్కొంటూ, 99 టీ20 సిక్సర్లతో ప్రపంచ రికార్డుకు చేరువయ్యాడు. అసాధారణ ప్రతిభ కలిగిన ఈ కుర్రాడు భారత క్రికెట్ భవిష్యత్తు ఆశాకిరణంగా మారుతూ, తన దూకుడైన ఆటతీరుతో ‘బోయ్ వండర్’గా గుర్తింపు పొందాడు.

అభిషేక్ శర్మ రికార్డుపై కన్ను..
ప్రస్తుతం వైభవ్ సూర్యవంశీ ఒకే ఐపీఎల్ సీజన్‌లో భారతీయుడిగా అత్యధిక సిక్సర్లు బాదిన రికార్డును అధిగమించే దిశగా సాగుతున్నాడు. 2024 సీజన్‌లో అభిషేక్ శర్మ 42 సిక్సర్లతో నెలకొల్పిన రికార్డును బద్దలు కొట్టడానికి వైభవ్ కేవలం 6 సిక్సర్ల దూరంలో ఉన్నాడు. జైపూర్‌లో ఢిల్లీ క్యాపిటల్స్‌తో జరగనున్న తదుపరి మ్యాచ్‌లోనే ఈ మైలురాయిని దాటే అవకాశం ఉంది. ఇప్పటివరకు ఈ సీజన్‌లో వైభవ్ 37 సిక్సర్లు, 34 ఫోర్లతో దూసుకుపోతున్నాడు.

చరిత్ర సృష్టించే దిశగా..
వైభవ్ మరో అరుదైన ఘనతకు కేవలం ఒకే ఒక్క సిక్సర్ దూరంలో ఉన్నాడు. టీ20 చరిత్రలో 20 ఏళ్ల వయసు రాకముందే 100 సిక్సర్లు బాదిన తొలి బ్యాటర్‌గా చరిత్ర సృష్టించనున్నాడు. కేవలం 27 ఇన్నింగ్స్‌ల్లోనే 99 సిక్సర్లు కొట్టిన ఇతను, టీ20ల్లో అత్యంత వేగంగా 100 సిక్సర్లు పూర్తి చేసుకున్న ఆటగాడిగా కూడా నిలవనున్నాడు. రాబోయే తరాలకు అందనంత ఎత్తులో ఈ రికార్డు ఉండబోతోంది.

ఐపీఎల్ కెరీర్ గణాంకాలు..
గతేడాది అరంగేట్రం చేసినప్పటి నుంచి వైభవ్ 16 ఇన్నింగ్స్‌ల్లో 652 పరుగులు సాధించాడు. సగటు 40.75గా ఉండగా, స్ట్రైక్ రేట్ 224.82గా నమోదైంది. అతని కెరీర్‌లో ఇప్పటివరకు రెండు సెంచరీలు ఉన్నాయి. కేఎల్ రాహుల్, అక్షర్ పటేల్ వంటి దిగ్గజాలున్న ఢిల్లీ క్యాపిటల్స్ జట్టుపై వైభవ్ తన రికార్డుల వేటను కొనసాగించాలని రాజస్థాన్ రాయల్స్ అభిమానులు కోరుకుంటున్నారు. 15 ఏళ్ల వయసులో ఈ స్థాయి ప్రదర్శన క్రికెట్ చరిత్రలోనే అత్యంత అరుదైనది.