SRH vs RR: బుడ్డోడు వైభవ్ vs ప్రఫుల్ హింగే.. రేపు రాజస్థాన్ సొంత గడ్డపై అసలైన ‘ప్రతీకార’ పోరు!

SRH vs RR: రేపు సన్‌రైజర్స్ హైదరాబాద్ (SRH), రాజస్థాన్ రాయల్స్ (RR) మధ్య హై ఓల్టేజ్ పోరు జరగనుంది. ఏప్రిల్ 13న జరిగిన మొదటి దశ మ్యాచ్‌లో హైదరాబాద్ చేతిలో 57 పరుగుల తేడాతో రాజస్థాన్ ఘోర పరాజయాన్ని మూటగట్టుకున్న విషయం తెలిసిందే. ఈ ఓటమి తర్వాగ ఎలాగైన పగ తీర్చుకోవాలని రాజస్థాన్ చూస్తోంది. ముఖ్యంగా ఈ మ్యాచ్‌లో బుడ్డోడు వైభవ్ సూర్యవంశీకి ప్రఫుల్ హింగే చుక్కలు చూయించాడు. ఏకంగా తొలి ఓవర్‌లోనే మూడు వికెట్లు పడగొట్టాడు. ఈ దెబ్బను వైభవ్‌తోపాటు రాజస్థాన్ రాయల్స్ టీమ్ మర్చిపోలేదు. సవాయ్ మాన్ సింగ్ స్టేడియం వేదికగా జరిగే రేపటి మ్యాచ్‌లో సత్త చూపాలని తహతహలాడుతోంది.

ఇక, రాజస్థాన్ రాయల్స్ జట్టు ప్రస్తుతం అద్భుతమైన ఫామ్‌లో ఉంది. గత బుధవారం లక్నోపై 40 పరుగుల తేడాతో విజయం సాధించి మంచి ఊపు మీద ఉంది. 15 ఏళ్ల వండర్ కిడ్ వైభవ్ సూర్యవంశీ ప్రస్తుతం రాజస్థాన్ తరపున టాప్ స్కోరర్‌గా ఉన్నాడు. 220.86 స్ట్రైక్ రేట్‌తో 254 పరుగులు చేయడమే కాకుండా రెండు సార్లు కేవలం 15 బంతుల్లోనే హాఫ్ సెంచరీలు బాదడం విశేషం. మరో ఓపెనర్ యశస్వి జైస్వాల్ (245 పరుగులు) కూడా నిలకడగా రాణిస్తున్నాడు. బౌలింగ్‌లో జోఫ్రా ఆర్చర్ (11 వికెట్లు), ఆల్ రౌండ్ ప్రదర్శనతో రవీంద్ర జడేజా జట్టుకు కొండంత అండగా నిలుస్తున్నారు. అయితే కెప్టెన్ రియాన్ పరాగ్ ఫామ్ మాత్రం జట్టును కాస్త ఆందోళనకు గురిచేస్తోంది.

మరోవైపు సన్‌రైజర్స్ హైదరాబాద్ అటాకింగ్ బ్యాటింగ్‌నే నమ్ముకుంది. ఇషాన్ కిషన్, హెన్రిచ్ క్లాసెన్, ట్రావిస్ హెడ్ వంటి విధ్వంసకర ఆటగాళ్లతో హైదరాబాద్ బ్యాటింగ్ లైనప్ పటిష్టంగా ఉంది. ఢిల్లీపై సెంచరీతో చెలరేగిన అభిషేక్ శర్మ అదే జోరును కొనసాగించాలని చూస్తున్నాడు. బౌలింగ్‌లో ప్రఫుల్ హింగే, సాకిబ్ హుస్సేన్ వంటి యువకులు అరంగేట్రంలోనే అదరగొట్టినప్పటికీ, రెగ్యులర్ కెప్టెన్ పాట్ కమిన్స్ లేకపోవడం వారి బౌలింగ్ విభాగాన్ని కాస్త బలహీనపరుస్తోంది. గత మ్యాచ్‌లో జరిగిన తప్పులను సరిదిద్దుకుని హైదరాబాద్ అటాకింగ్ బ్యాటింగ్‌ను అడ్డుకోవాలని రాజస్థాన్ వ్యూహాలు రచిస్తోంది. అటు పాయింట్ల వేటలో దూసుకుపోవాలని హైదరాబాద్, ఇటు ప్రతీకారం తీర్చుకోవాలని రాజస్థాన్ చూస్తుండటంతో ఈ మ్యాచ్ క్రికెట్ అభిమానులకు అసలైన మజాను పంచడం ఖాయంగా కనిపిస్తోంది.