CSK Playoff Chances: ఇక మిగిలింది రెండు మ్యాచ్‌లే.. చెన్నై ప్లేఆఫ్స్ చేరుతుందా? సమీకరణాలు ఇవే..

CSK Playoff Chances: ఈ సీజన్‌లో ఐదుసార్లు ఛాంపియన్ చెన్నై సూపర్ కింగ్స్ (CSK)కు ఊహించని షాక్ తగిలింది. శుక్రవారం (మే 15) జరిగిన తమ 12వ లీగ్ మ్యాచ్‌లో లక్నో సూపర్ జాయింట్స్ (LSG) చేతిలో ఘోర పరాజయాన్ని చవిచూడటంతో చెన్నై నాకౌట్ అవకాశాలు సంక్లిష్టంగా మారాయి. ఎకానా క్రికెట్ స్టేడియంలో జరిగిన ఈ రివర్స్ ఫిక్చర్‌లో లక్నోను ఓడించి టాప్-4 లోకి దూసుకెళ్లాలని భావించిన సీఎస్‌కే ఆశలపై మిచెల్ మార్ష్ నీళ్లు చల్లాడు. చెన్నై నిర్దేశించిన 188 పరుగుల లక్ష్యాన్ని మార్ష్ తన విధ్వంసకర బ్యాటింగ్‌తో ఈజీగా ఛేజ్ చేశాడు. సీఎస్‌కే బౌలింగ్‌ను చీల్చిచెండాడుతూ కేవలం 38 బంతుల్లోనే 9 ఫోర్లు, 7 సిక్సర్లతో 90 పరుగులు చేశాడు. ఏ బౌలర్‌నూ వదల్లేదు సరే కదా, ముఖ్యంగా చెన్నై స్టార్ బౌలర్ అన్షుల్ కాంబోజ్‌ను టార్గెట్ చేస్తూ కేవలం 10 బంతుల్లోనే వరుసగా నాలుగు సిక్సర్లతో సహా మొత్తం 32 పరుగులు పిండుకున్నాడు. మార్ష్ మ్యాచ్‌ను ముగించకుండానే అవుట్ అయినప్పటికీ, అప్పటికే చెన్నైకి జరగాల్సిన నష్టం జరిగిపోయింది. ఆ తర్వాత సీఎస్‌కే వరుసగా మూడు వికెట్లు తీసి లక్నోను కాస్త భయపెట్టినా, నికోలస్ పూరన్ రంగంలోకి దిగి అన్షుల్ కాంబోజ్ బౌలింగ్‌లోనే వరుసగా నాలుగు సిక్సర్లు బాది లక్నోను సునాయాసంగా గెలిపించాడు.

ఈ ఓటమితో చెన్నై సూపర్ కింగ్స్ పాయింట్ల పట్టికలో ఐదో స్థానం నుంచి ఆరో స్థానానికి పడిపోయింది. ప్రస్తుతం సీఎస్‌కే ఖాతాలో 12 మ్యాచ్‌లకు గానూ 12 పాయింట్లు మాత్రమే ఉన్నాయి. ఇక ప్లేఆఫ్స్‌కు అర్హత సాధించాలంటే చెన్నై ముందున్న సమీకరణాలు ఆసక్తికరంగా మారాయి. సీఎస్‌కే ఆడబోయే మిగిలిన రెండు మ్యాచ్‌లలో ఒకటి సొంతగడ్డపై సన్‌రైజర్స్ హైదరాబాద్‌తో, మరొకటి గుజరాత్ టైటాన్స్‌తో వారి హోమ్ గ్రౌండ్‌లో జరగనుంది. చెన్నై గనుక ఈ మిగిలిన రెండు మ్యాచ్‌లలో విజయం సాధిస్తే 16 పాయింట్లకు చేరుకుంటుంది. అయితే, మరో నాలుగు జట్లు సైతం 16 కంటే ఎక్కువ పాయింట్లు సాధించే అవకాశం ఉన్నందున చెన్నైకి అధికారికంగా ప్లేఆఫ్స్ బెర్త్‌ను ఖరారు కాలేదు. కానీ.. వేరే జట్ల ఫలితాలు నాటకీయంగా మారితే 16 పాయింట్లతో చెన్నై దాదాపు ప్లేఆఫ్స్‌కు చేరుకోవడం ఖాయంగా కనిపిస్తోంది. ఒకవేళ చెన్నై కేవలం ఒక మ్యాచ్ మాత్రమే గెలిచి 14 పాయింట్ల వద్దే నిలిచినా ప్లేఆఫ్స్ చేరే అవకాశం ఉంది! కానీ అప్పుడు దానికి ఇతర జట్ల ఫలితాలపై ఆధారపడాల్సి ఉంటుంది. రాజస్థాన్ రాయల్స్, పంజాబ్ కింగ్స్ తమ మిగిలిన అన్ని మ్యాచ్‌లలో ఓడిపోవాలి, కోల్‌కతా నైట్ రైడర్స్ రెండు కంటే ఎక్కువ మ్యాచ్‌లు గెలవకూడదు. ఢిల్లీ క్యాపిటల్స్ కేవలం ఒక్క మ్యాచ్ మాత్రమే గెలవాలి. ఒకవేళ ఢిల్లీ రెండు మ్యాచ్‌లూ గెలిచినా, వారి నెట్ రన్‌రేట్ (NRR) చెన్నై కంటే తక్కువగా ఉండాలి. అప్పుడే చెన్నై ప్లేఆఫ్స్‌కి చేరుకుంటుంది. ఈ సమీకరణాలు చూస్తుంటే ప్రస్తుతం చెన్నై భవితవ్యం పూర్తిగా వారి చేతుల్లో లేదని స్పష్టంగా అర్థమవుతోంది.