PCB: షోయబ్ అక్తర్‌కు పీసీబీలో కీలక పోస్టు..! చైర్మన్ నఖ్వీతో భేటీ

PCB: పాకిస్తాన్‌ క్రికెట్ తీవ్ర సంక్షోభాన్నే ఎదుర్కొంటుంది.. అయితే పాకిస్థాన్ క్రికెట్ బోర్డు (PCB)లో మాజీ ఫాస్ట్ బౌలర్ షోయబ్ అక్తర్‌కు కీలక బాధ్యతలు అప్పగించే అవకాశం ఉందని నివేదికలు పేర్కొంటున్నాయి. ఇంగ్లండ్ పర్యటనలో పాకిస్థాన్ 0-3తో టెస్టు సిరీస్‌ను కోల్పోయిన నేపథ్యంలో బోర్డు తన క్రికెట్ వ్యవస్థలో మార్పులకు సిద్ధమవుతున్నట్లు తెలుస్తోంది. ఈ క్రమంలో ఇస్లామాబాద్‌లో నివాసం ఉండే షోయబ్ అక్తర్.. ఇటీవల PCB చైర్మన్ మొహ్సిన్ నఖ్వీని కలిసినట్లు సమాచారం. మొహ్సిన్‌ నఖ్వీ, షోయబ్‌ అక్తర్ మధ్య పాకిస్థాన్ క్రికెట్‌కు సంబంధించిన పలు అంశాలపై సుదీర్ఘంగా చర్చ జరిగినట్లు ఓ వర్గం తెలిపింది. కొన్ని వారాల క్రితం షోయబ్ అక్తర్ సోదరుడు మరణించిన సమయంలో నఖ్వీ ఆయనను పరామర్శించి అండగా నిలిచారని, ఈ వ్యవహారం అక్తర్‌ను ఆకట్టుకుందని ఆ వర్గం పేర్కొంది. గతంలో PCB, పాకిస్థాన్ క్రికెట్‌పై అక్తర్ మీడియా వేదికల ద్వారా విమర్శలు చేసిన విషయం కూడా ప్రస్తావించింది.

మరోవైపు.. నఖ్వీ తన భవిష్యత్ ప్రణాళికలను అక్తర్‌తో పంచుకున్నారని, నేషనల్ క్రికెట్ అకాడమీ (NCA), శిక్షణ శిబిరాలను సందర్శించాల్సిందిగా ఆహ్వానించారని నివేదికలు చెబుతున్నాయి. అక్తర్‌కు బోర్డులో కీలక పదవి ఇవ్వడంపై చర్చ జరుగుతున్నప్పటికీ, ఆయనకు పాకిస్థాన్ క్రికెట్‌ను ముందుకు తీసుకెళ్లేందుకు తన సొంత ఆలోచనలు, కొన్ని షరతులు ఉన్నట్లు సమాచారం. ఇదిలా ఉండగా, జాతీయ జట్టుకు విదేశీ కోచ్‌లు, కన్సల్టెంట్లను నియమించే అంశాన్ని కూడా PCB పరిశీలిస్తోంది. సీనియర్ ఫీల్డింగ్ కోచ్ షేన్ మెక్‌డెర్మాట్, బ్యాటింగ్ కోచ్ యాష్లే నాఫ్కే తప్పుకోవడంతో ఈ మార్పులపై చర్చ మొదలైనట్లు తెలుస్తోంది. మహిళల జట్టుకు కూడా దీర్ఘకాలికంగా పనిచేసే పూర్తిస్థాయి హెడ్ కోచ్‌ను నియమించే అంశాన్ని బోర్డు పరిశీలిస్తోంది. పురుషుల జట్టు, మహిళల జట్టు, షాహీన్స్, జూనియర్ జట్ల నుంచి మెరుగైన ఫలితాలను ఆశిస్తున్నట్లు PCB చైర్మన్ స్పష్టం చేసిన నేపథ్యంలో క్రికెట్ వ్యవస్థలో మరిన్ని మార్పులు చోటుచేసుకునే అవకాశం ఉందని నివేదికలు పేర్కొంటున్నాయి. ఇంగ్లండ్‌తో మూడు టెస్టుల సిరీస్‌లో పాకిస్థాన్ 0-3తో ఓడిపోవడం ఈ మార్పుల నేపథ్యంలో కీలక అంశంగా మారింది.