Quinton de Kock: 106 పరుగుల విధ్వంసం.. కోహ్లీ, వార్నర్‌ సరసన డి కాక్‌.. టీ20ల్లో అరుదైన రికార్డు

Quinton de Kock: కరేబియన్‌ ప్రీమియర్‌ లీగ్‌ (CPL)లో దక్షిణాఫ్రికా స్టార్‌ బ్యాటర్‌ క్వింటన్‌ డి కాక్‌ మెరుపు శతకంతో టీ20 క్రికెట్‌లో అరుదైన మైలురాయిని అందుకున్నాడు. సెప్టెంబర్‌ 1న బాసెటెర్రేలో జరిగిన మ్యాచ్‌లో బార్బడోస్‌ ట్రైడెంట్స్‌ తరఫున ఆడిన డి కాక్‌ కేవలం 57 బంతుల్లోనే 11 ఫోర్లు, 6 సిక్సర్లతో 106 పరుగులు చేశాడు. ఈ సెంచరీతో డి కాక్‌ టీ20 కెరీర్‌లో 10వ శతకాన్ని నమోదు చేశాడు. 457వ టీ20 మ్యాచ్‌లో ఈ ఘనత సాధించిన అతని మొత్తం టీ20 పరుగులు 12,867కు చేరాయి. దీంతో టీ20ల్లో 10 సెంచరీలు చేసిన విరాట్‌ కోహ్లీ, డేవిడ్‌ వార్నర్‌ల సరసన డి కాక్‌ నిలిచాడు.

టీ20 క్రికెట్‌లో అత్యధిక సెంచరీల రికార్డు వెస్టిండీస్‌ దిగ్గజం క్రిస్‌ గేల్‌ పేరిట ఉంది. గేల్‌ 22 శతకాలు సాధించగా, పాకిస్థాన్‌ స్టార్‌ బాబర్‌ ఆజం 13 సెంచరీలతో రెండో స్థానంలో ఉన్నాడు. డి కాక్‌, విరాట్‌ కోహ్లీ, డేవిడ్‌ వార్నర్‌ చెరో 10 శతకాలతో తర్వాతి స్థానాల్లో ఉన్నారు. అయితే డి కాక్‌ అద్భుత ఇన్నింగ్స్‌ బార్బడోస్‌ విజయానికి మాత్రం సరిపోలేదు. తొలుత బ్యాటింగ్‌ చేసిన బార్బడోస్‌ ట్రైడెంట్స్‌ డి కాక్‌ 106 పరుగుల సహకారంతో 20 ఓవర్లలో 217 పరుగులు చేసింది.

భారీ లక్ష్యాన్ని ఛేదించేందుకు బరిలోకి దిగిన సెయింట్‌ కిట్స్‌ అండ్‌ నెవిస్‌ పేట్రియాట్స్‌ దూకుడుగా ఆడింది. ఓపెనర్‌ జాన్సన్‌ చార్లెస్‌ కేవలం 45 బంతుల్లో 6 ఫోర్లు, 7 సిక్సర్లతో 78 పరుగులు చేశాడు. జాసన్‌ హోల్డర్‌ 11 బంతుల్లో రెండు సిక్సర్లతో 18 పరుగులు చేసి అతడికి అండగా నిలిచాడు. చివరికి సెయింట్‌ కిట్స్‌ అండ్‌ నెవిస్‌ పేట్రియాట్స్‌ 19.1 ఓవర్లలో 4 వికెట్లు కోల్పోయి 220 పరుగులు చేసింది. దీంతో బార్బడోస్‌పై 6 వికెట్ల తేడాతో విజయం సాధించింది. వ్యక్తిగతంగా డి కాక్‌ చరిత్ర సృష్టించినప్పటికీ, అతని శతకం జట్టుకు విజయాన్ని అందించలేకపోయింది.