Vaibhav Sooryavanshi Opener in IND vs NZ 3rd T20: న్యూజిలాండ్‌తో టీ20 సిరీస్‌లో భారత జట్టుకు మరో ఎదురుదెబ్బ తగిలింది. స్టార్ వికెట్ కీపర్ బ్యాటర్ ఇషాన్ కిషన్ మూడో టీ20కి కూడా దూరమయ్యాడు. తొలి టీ20లో కుడి తొడ కండరానికి గాయం కాగా.. అతడు ఇంకా పూర్తిస్థాయి ఫిట్‌నెస్ సాధించలేదు. దీంతో అక్టోబర్ 27న వెల్లింగ్టన్‌లో జరగనున్న మూడో టీ20కి ఇషాన్ అందుబాటులో ఉండటం లేదని బీసీసీఐ అధికారికంగా ప్రకటించింది. అతడి స్థానంలో రెండో టీ20లో వైభవ్ సూర్యవంశీకి అవకాశం లభించినప్పటికీ.. అతడు ఆశించిన స్థాయిలో రాణించలేకపోయాడు. అయినా కూడామూడో మ్యాచ్‌లో వైభవ్‌కు మరో అవకాశం ఇవ్వాలని టీమ్ మేనేజ్‌మెంట్ భావిస్తోంది.
ఇషాన్ కిషన్ గాయం నుంచి కోలుకుంటున్నాడని, అయితే ఇంకా మ్యాచ్ ఆడేందుకు అవసరమైన ఫిట్‌నెస్ సాధించలేదని బీసీసీఐ వెల్లడించింది. న్యూజిలాండ్‌తో తొలి టీ20 సందర్భంగా అతడికి కుడి తొడ కండరానికి స్వల్ప స్థాయి గాయం అయింది. అప్పటి నుంచి వైద్య బృందం అతడి పరిస్థితిని పర్యవేక్షిస్తోంది. గాయం పూర్తిగా తగ్గకపోవడంతో మూడో టీ20కి కూడా ఇషాన్ అందుబాటులో ఉండటం లేదని స్పష్టం చేసింది. అతడి స్థానంలో జట్టులోకి వచ్చిన కుమార్ కుశాగ్ర మూడో టీ20కి కూడా జట్టుతో కొనసాగనున్నాడు. ఇషాన్ పూర్తిగా కోలుకునే వరకు వైద్య బృందం పర్యవేక్షణ కొనసాగుతుందని బీసీసీఐ తెలిపింది.
ఇషాన్ కిషన్ స్థానంలో రెండో టీ20లో వైభవ్ సూర్యవంశీకి భారత జట్టు యాజమాన్యం అవకాశం ఇచ్చింది. బుడ్డోడు మూడో స్థానంలో బ్యాటింగ్‌ చేశాడు. ఓపెనర్‌గా మాత్రమే ఆడిన అనుభవం ఉన్న వైభవ్.. మూడో స్థానంలో ఇబ్బంది పడినట్లు కనిపించాడు. రెండో టీ20లో ఎనిమిది బంతులు ఎదుర్కొని కేవలం నాలుగు పరుగులు మాత్రమే చేసి పెవిలియన్‌కు చేరాడు. దీంతో అతడిని మూడో స్థానంలో ఆడించడం సరైన నిర్ణయమా? అనే చర్చ మొదలైంది. వైభవ్‌ను ఓపెనర్‌గా పంపించాలని పలువురు మాజీ క్రికెటర్లు సూచిస్తున్నారు. ఒకవేళ ఓపెనర్‌గా బుడ్డోడు ఆడితే.. సంజు శాంసన్‌ మూడో స్థానంలో ఆడుతాడు. చూడాలి మరి టీమ్ మేనేజ్‌మెంట్ ఏ నిర్ణయం తీసుకుంటుందో.