Harry Brook Confident England Can Tackle Vaibhav Sooryavanshi: భారత్, ఇంగ్లండ్ జట్ల మధ్య బుధవారం (జులై 1) నుంచి ఐదు మ్యాచ్ల టీ20 సిరీస్ ఆరంభం కానుంది. ఈ సిరీస్కు ముందు సోషల్ మీడియాలో యువ సంచలనం వైభవ్ సూర్యవంశీ గురించి ఆసక్తికర చర్చ కొనసాగుతోంది. తొలి టీ20లో 15 ఏళ్ల వైభవ్కు భారత జట్టు తరఫున అరంగేట్రం చేసే ఛాన్స్ దక్కుతుందా లేదా అన్న ఉత్కంఠ నెలకొంది. బుడ్డోడు ఆడాలని చాలా మంది కోరుకుంటున్నారు. అయితే వైభవ్ను ఎదుర్కొనేందుకు తమ జట్టు ప్రత్యేక ప్రణాళికలు సిద్ధం చేసిందని ఇంగ్లండ్ కెప్టెన్ హ్యారీ బ్రూక్ వెల్లడించాడు.
వైభవ్ కోసం ప్రత్యేక వ్యూహాలు సిద్ధం:
మొదటి టీ20 మ్యాచ్కు ముందు మీడియాతో మాట్లాడిన హ్యారీ బ్రూక్.. వైభవ్ సూర్యవంశీని అడ్డుకునేందుకు ఇప్పటికే ప్రత్యేక వ్యూహాలను రూపొందించినట్లు తెలిపాడు. ‘మా వ్యూహాలు సిద్ధంగా ఉన్నాయి. అవి వర్కౌట్ అవుతాయని ఆశిస్తున్నాం. భారత బ్యాటర్లు తమ అత్యుత్తమ ఆట ఆడకుండా ఎలా అడ్డుకోవాలనే దానిపై తెరవెనుక చాలా కసరత్తు చేశాం. వైభవ్ సూర్యవంశీ ఆడితే.. అతడికి ఓ ప్లాన్ సిద్ధం చేశాం. సూర్యవంశీని ఈజీగా బుట్టలో వేస్తాం’ అని బ్రూక్ పేర్కొన్నాడు.
ఐపీఎల్లో అదరగొట్టిన వైభవ్:
ఈ ఏడాది ఐపీఎల్లో వైభవ్ సూర్యవంశీ సంచలన ప్రదర్శనతో అందరి దృష్టిని ఆకర్షించాడు. 230కు పైగా స్ట్రైక్రేట్తో ఏకంగా 776 పరుగులు చేసి టోర్నీలో అత్యధిక పరుగులు చేసిన బ్యాటర్గా నిలిచాడు. తన అద్భుత ప్రదర్శనకు గాను ‘ప్లేయర్ ఆఫ్ ది సిరీస్’, ‘మోస్ట్ వాల్యూబుల్ ప్లేయర్’, ‘ఎమర్జింగ్ ప్లేయర్ ఆఫ్ ది సీజన్’ అవార్డులను కూడా సొంతం చేసుకున్నాడు.
చరిత్ర సృష్టించే అవకాశం:
ఇంగ్లండ్తో జరిగే ఈ సిరీస్లో వైభవ్కు అరంగేట్రం అవకాశం లభిస్తే.. భారత క్రికెట్ చరిత్రలోనే అత్యంత పిన్న వయసులో అంతర్జాతీయ మ్యాచ్ ఆడిన ఆటగాడిగా నిలుస్తాడు. ప్రస్తుతం ఈ రికార్డు 16 ఏళ్ల వయసులో భారత జట్టులో అరంగేట్రం చేసిన దిగ్గజం సచిన్ టెండూల్కర్ పేరిట ఉంది. దీంతో వైభవ్పై అభిమానులతో పాటు క్రికెట్ ప్రపంచం మొత్తం ఆసక్తిగా ఎదురుచూస్తోంది.