Virat Kohli: కోహ్లీకి కోపం వస్తుంది.. క్రికెట్ బోరింగ్‌గా మారిపోతుంది.. మాజీ అంపైర్ అనిల్ చౌదరి ఆసక్తికర వ్యాఖ్యలు!

Anil Chaudhary About Virat Kohli Attitude: టీమిండియా స్టార్ బ్యాటర్ విరాట్ కోహ్లీ మైదానంలో ఎంతో దూకుడుగా కనిపించినా.. అతని మనసులో ఎలాంటి ద్వేషం ఉండదని మాజీ అంపైర్ అనిల్ చౌదరి తెలిపారు. ఆట పట్ల చూపే అంకితభావం, గెలుపుపై ఉన్న తపన వల్లే కొన్నిసార్లు కోహ్లీ ఆగ్రహంగా స్పందిస్తాడని చెప్పారు. కింగ్ లాంటి ఆటగాళ్లు క్రికెట్‌కు అవసరమని, వారే ఆటకు ప్రత్యేక ఆకర్షణ తీసుకొస్తారని అనిల్ చౌదరి అభిప్రాయపడ్డారు. జియోహాట్‌స్టార్‌తో మాట్లాడుతూ అనిల్ చౌదరి ఆసక్తికర విషయాలు వెల్లడించారు.

‘విరాట్ కోహ్లీ చిన్నప్పటి నుంచి ఆడిన మ్యాచ్‌లకు నేను అంపైరింగ్ చేశాను. అందుకే అతని స్వభావం నాకు బాగా తెలుసు. అతనిలో ఎలాంటి దురుద్దేశం ఉండదు. కొన్నిసార్లు ఆవేశంగా స్పందించినా.. మీరు సరైన నిర్ణయం తీసుకుంటే వెంటనే థంబ్స్‌అప్ ఇస్తాడు. ఓవర్ల మధ్యలో వచ్చి ఆప్యాయంగా మాట్లాడతాడు. అతడు ఎప్పుడూ ఉత్సాహంగా ఉంటాడు. విరాట్ లాంటి ఆటగాళ్లు లేకపోతే క్రికెట్ బోరింగ్‌గా మారిపోతుంది’ అని మాజీ అంపైర్ అనిల్ చౌదరి చెప్పారు.

ఐపీఎల్‌లో విరాట్ కోహ్లీ, గౌతమ్ గంభీర్ మధ్య జరిగిన వాగ్వాదాల గురించి కూడా అనిల్ చౌదరి స్పందించారు. ‘ఉత్తర భారత ఆటగాళ్లలో సహజంగానే దూకుడు ఎక్కువ. అదే వారి ఆటతీరుకు బలం. ఆగ్రహం కూడా ఆటలో భాగమే. కానీ అది పరిమితి దాటకూడదు. ఎక్కువ ఆంక్షలు విధిస్తే ఆటలో ఉండే సహజమైన ఉత్సాహం తగ్గిపోతుంది’ అని వివరించారు. కోహ్లీ ఆడిన ఎన్నో మ్యాచ్‌లకు అనిల్ చౌదరి అంపైరింగ్ చేశారు. కోహ్లీపై అనిల్ చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. కోహ్లీ దూకుడు వెనుక ఉన్న నిజమైన వ్యక్తిత్వాన్ని మాజీ అంపైర్ వివరించారు.

నాన్-స్ట్రైకర్ ఎండ్‌లో ముందుగానే క్రీజు వదిలి పరుగులు ప్రారంభించే బ్యాటర్లను రనౌట్ చేయడంపై కూడా అనిల్ చౌదరి తన అభిప్రాయాన్ని వెల్లడించారు. ఆ విధంగా ఔట్ చేయడం పూర్తిగా నిబంధనలకు అనుగుణమేనని స్పష్టం చేశారు. అయితే భవిష్యత్తులో హెచ్చరికలు, రన్ పెనాల్టీ వంటి కొత్త నిబంధనలు వచ్చే అవకాశం ఉందని అంచనా వేశారు. నాన్-స్ట్రైకర్ ముందుగానే క్రీజు దాటితే అతనికి ప్రయోజనం లభిస్తుందని, అందుకే దీనిపై ఐసీసీ భవిష్యత్తులో కొత్త విధానం తీసుకురావచ్చు అని అన్నారు.