Chanakya Niti: కోట్లు సంపాదించాలన్నా .. కూటికి లేని బిచ్చగాడు కావాలన్నా ఈ అలవాట్లే కారణం.. చాణక్యుడు చెప్పిన కెరీర్ సీక్రెట్స్!

Chanakya Niti: ఆచార్య చాణక్యుడు తన నీతి శాస్త్రంలో మనిషి విజయానికి కేవలం తెలివితేటలు మాత్రమే సరిపోవని, క్రమశిక్షణతో కూడిన ప్రవర్తన కూడా అవసరమని చెప్పారు. మనిషి విజయం కేవలం అతని సామర్థ్యంపైనే కాదు, అతని నడవడికపై కూడా ఆధారపడి ఉంటుందని చాణక్యుడు స్పష్టం చేశారు. ఒక వ్యక్తి ఎంతో కష్టపడి పైకి వచ్చినా, ఆయన చేసే కొన్ని చిన్న చిన్న పొరపాట్లు, చెడు అలవాట్లు ఆయన ఎంతో కష్టపడి నిర్మించుకున్న అఖండ సామ్రాజ్యాన్ని క్షణాల్లో బూడిద చేయగలవని అన్నారు. ముఖ్యంగా పురుషుల కెరీర్‌ను, కీర్తిని నాశనం చేసే ఆరు ప్రధాన అలవాట్ల గురించి చాణక్యుడు క్రింది విధంగా హెచ్చరించారు. అవేంటో ఈ స్టోరీలో తెలుసుకుందాం.

READ ALSO: Prabhsimran Singh: టెన్షన్ వద్దు, స్వేచ్ఛగా ఆడమన్నాడు.. నా సక్సెస్‌కు కారణం అతడే!

1. బద్ధకం: విజయానికి అతిపెద్ద శత్రువు..
చాణక్యుని ప్రకారం.. బద్ధకం ఉన్న వ్యక్తికి వర్తమానం ఉండదు, భవిష్యత్తు అసలే ఉండదు. “నేటి పనిని రేపటికి వాయిదా వేసేవాడు” వృత్తిపరమైన పోటీలో ఎప్పటికీ వెనుకబడే ఉంటాడని చాణక్యుడు హెచ్చరించాడు. సమయం ఎవరి కోసమూ ఆగదని, అందుకే కాలంతో పాటు నడవలేని వాడు పతనం కాక తప్పదని స్పష్టంగా చెప్పారు.

2. అహంకారం: వినాశనానికి నాంది
అధికారం, హోదా లేదా సంపద వచ్చిందని గర్వపడే వ్యక్తి ఇతరులను తక్కువగా చూడటం ప్రారంభిస్తాడు. అహంకారం పెరిగిన చోట నేర్చుకోవాలనే జిజ్ఞాస చచ్చిపోతుంది. ఎప్పుడైతే కొత్త విషయాలు నేర్చుకోవడం ఆగిపోతుందో, అప్పుడే ఆ వ్యక్తి పతనం మొదలైనట్లు లెక్క అని తన నీతి శాస్త్రంలో చాణక్యుడు పేర్కొన్నారు.

3. మనసు నొచ్చుకునే మాటలు: సంబంధాలకు మరణశాసనం
ఒక వ్యక్తికి ఉన్న నోటి దురుసు లేదా మనుషుల మనసు నొచ్చుకునే మాటలు మాట్లాడే అలవాటు ఆయన చేసిన మంచి పనులన్నింటినీ మర్చిపోయేలా చేస్తాయని చాణక్యుడు పేర్కొన్నారు. కటువుగా మాట్లాడే పురుషులు తమ ఆఫీస్‌లో సహోద్యోగుల గౌరవాన్ని పొందలేరని, అలాగే ఇంట్లోనూ పీస్‌పుల్‌నెస్‌ను కోల్పోతారని వెల్లడించారు. మాట జారితే వెనక్కి తీసుకోలేమని, అది సంబంధాలను శాశ్వతంగా తెంచేస్తుందని చాణక్యుడు హెచ్చరించారు.

4. చెడు స్నేహం: వ్యక్తిత్వానికి మచ్చ
ఒక వ్యక్తి వ్యక్తిత్వాన్ని అతను తిరిగే స్నేహితులను బట్టి అంచనా వేయవచ్చని చెప్పారు. చెడు అలవాట్లు ఉన్నవారితో స్నేహం చేస్తే, ఆ ప్రభావం మీ కష్టంపై, కీర్తిపై పడుతుందని వెల్లడించారు. విజయం సాధించాలనుకునే వారు ఎప్పుడూ తనకంటే సమర్థులైన, మంచి ఆలోచనలు ఉన్న వ్యక్తులతోనే సావాసం చేయాలని సూచించారు.

5. దుబారా ఖర్చు: పేదరికానికి ఆహ్వానం
ఆదాయానికి మించి ఖర్చు చేయడం, కేవలం ఆడంబరం కోసమే బ్రతకడం వల్ల ఆర్థిక సంక్షోభం తలెత్తుతుందని హెచ్చరించారు. కోట్లు సంపాదించిన అందులో వందలు కూడా పొదుపు చేయని వాడు, ఆపద కాలంలో నిస్సహాయుడిగా మిగిలిపోతాడని వెల్లడించారు. లక్ష్మీదేవి చంచలమైనదని, ఆమెను గౌరవించని వారి వద్ద ఆమె ఎక్కువ కాలం నిలవదని స్పష్టంగా పేర్కొన్నారు.

6. వ్యసనం: మేధస్సుకు సంకెళ్లు
ఏ రకమైన వ్యసనమైనా మనిషిని మానసికంగా, శారీరకంగా బలహీనపరుస్తుందని వెల్లడించారు. వ్యసనాలకు బానిసైన వ్యక్తి తన బాధ్యతలను మర్చిపోతాడని చెప్పారు. ఆ వ్యక్తి వ్యాపారం లేదా ఉద్యోగంపై దృష్టి పెట్టలేక తన కుటుంబాన్ని కూడా ఇబ్బందుల్లోకి నెడతాడని హెచ్చరించారు. జీవితంలో ఉన్నత శిఖరాలను అధిరోహించాలంటే ఈ ఆరు అలవాట్లను వెంటనే వదిలేయాలని చాణక్య నీతి చెబుతోంది. పశ్చాత్తాపపడక ముందే మనల్ని మనం సరిదిద్దుకోవడమే నిజమైన విజేత లక్షణం.

READ ALSO: Nitish Kumar: రాజ్యసభ సభ్యుడిగా రేపే నితీష్ ప్రమాణ స్వీకారం.. బీహార్ కొత్త సీఎం ఎవరంటే!