Telangana MLC Elections: MLC ఎన్నికల్లో కామ్రేడ్స్ చెరోదారి! కాంగ్రెస్‌కు షాక్ తప్పదా?

సుత్తీ కొడవలికి క్లారిటీ వచ్చేసింది. మరి కంకీ కొడవలి సంగతేంటి? గ్రాడ్యుయేట్‌ ఎమ్మెల్సీ ఎన్నికల్లో కామ్రేడ్స్‌ చెరో దారి వెదుక్కుంటారా? ఆర్టీసీ ఎన్నికల్లో కాంగ్రెస్‌కు దగ్గరైన సీపీఎం ఇప్పుడెందుకు కలిసి రావడం లేదు? మిత్రపక్షం కాంగ్రెస్‌ అభ్యర్థులకు మద్దతు విషయంలో సీపీఐ ఇంకా ఎందుకు నానుస్తోంది? వాళ్ల లెక్కలు వేరే ఉన్నాయా? అదే నిజమైతే… ఆ కేలిక్యులేషన్స్‌ ఏంటి?

తెలంగాణలో పట్టభద్రుల నియోజకవర్గం ఎమ్మెల్సీ ఎన్నికలకు సంబంధించిన చర్చల్లో కొత్త కొత్త అంశాలు తెర మీదికి వస్తున్నాయి. పోటా పోటీ వ్యూహాల్లో భాగంగా జాగ్రత్తగా పావులు కదుపుతున్నాయి పార్టీలు. ఇక అధికార పార్టీగా… రెండు సీట్లు కైవసం చేసుకోవాలని పట్టుదలగా ఉన్న కాంగ్రెస్‌ పార్టీ చాలా జాగ్రత్తలు తీసుకుంటోందట. కలిసి వచ్చే మిత్రులు ఎవ్వర్నీ వదలకుండా… జాగ్రత్తగా డీల్‌ చేస్తున్నట్టు తెలుస్తోంది. జాతీయ స్థాయిలో ఇండియా కూటమిలో కామ్రేడ్స్‌ ఉన్నా…గత అసెంబ్లీ ఎన్నికల్లో తెలంగాణలో మాత్రం కాంగ్రెస్‌తో కలిసి నడవలేదు సీపీఎం.

కానీ…. సీపీఐ, హస్తం పార్టీ కలిసే పని చేశాయి. ఎన్నికల తర్వాత కూడా మైత్రి కొనసాగుతోంది. కానీ… ప్రస్తుతం ఉన్న పరిస్థితుల్లో ఎమ్మెల్సీ ఎన్నికల విషయంలో కామ్రేడ్స్‌ ఆలోచన ఏంటి..? ఎవరి దారి ఎటు అన్న విషయంలో క్లారిటీ రాలేదు. ఇటీవల జరిగిన RTC గుర్తింపు సంఘం ఎన్నికల్లో CPM అనుబంధ సంఘాలు కాంగ్రెస్‌తో కలిసి పని చేశాయి. కానీ ఎమ్మెల్సీ ఎన్నికలకు వచ్చేసరికి మాత్రం ఆ పార్టీ ఫ్రంట్ ఏర్పాటు చేసుకుని తన దారి తాను వెదుక్కుంది. అభ్యర్ధిని కూడా ప్రకటించేశారు. సో…గ్రాడ్యుయేట్‌ ఎమ్మెల్సీ ఎన్నికల్లో కాంగ్రెస్‌కు సీపీఎం మద్దతు ఉండబోదని తేలిపోయింది. ఇక మిగిలిన సీపీఐ… ఇంకా అధికారికంగా ఏ నిర్ణయం ప్రకటించలేదు.

తన మద్దతు ఎవరికి అన్నది క్లారిటీ రావల్సి ఉంది. నవంబర్ 5న సీఎం రేవంత్‌తో సీపీఐ నాయకులు భేటీ కాబోతున్నారు. ఆ మీటింగ్‌లో కాంగ్రెస్ పార్టీ సీపీఐకి ఇచ్చిన హామీలు… పెండింగ్ పనుల్లాంటి అన్ని అంశాలపై చర్చించిన తర్వాత ఒక నిర్ణయానికి వస్తారని అంచనా వేస్తున్నారు. ఎమ్మెల్సీ ఎన్నికల్లో మద్దతుపై ఆ మీటింగ్‌ తర్వాతే నిర్ణయం తీసుకోవాలనుకుంటున్నారట సీపీఐ నేతలు. అయితే… మిత్రపక్షమైనా…. ప్రభుత్వ వైఫల్యాలను ఎండగట్టే విషయంలో తన పని తాను చేసుకోవాలని… మద్దతు విషయంలో సందర్భానుసారంగా పని చేయాలని సీపీఐ జాతీయ నాయకుడు ఒకరు ఇటీవల జరిగిన కార్యవర్గ సమావేశంలో ప్రస్తావించారట. ఈ పరిస్థితుల్లో సీపీఐ కలిసి వచ్చే విషయంలో కొంత సానుకూలతే ఉండవచ్చని అంచనా వేస్తున్నారు. మొత్తం మీద సీపీఎం తన దారి తాను చూసుకుంది. సీపీఐ మాత్రం ఆచితూచి అడుగులు వేయాలనే లెక్కలో ఉంది.