OTR : కూటమి హవాలో ఇద్దరు టీడీపీ ఎమ్మెల్యేలకు షాక్.. కృష్ణా జిల్లా ఫలితాల్లో ట్విస్ట్!

OTR : కృష్ణా జిల్లాలో జడ్పిటిసి ఫలితాలు ఇద్దరు అధికార పార్టీ ఎమ్మెల్యేలకు కంటిమీద కునుకు లేకుండా చేస్తున్నాయట. కూటమి ప్రభుత్వం అత్యంత ప్రతిష్టాత్మకంగా తీసుకున్న పరిషత్‌ ఎన్నికలు గన్నవరం, పామర్రు ఎమ్మెల్యేలకు చేదు అనుభవాన్నే మిగిల్చాయంటూ రాజకీయ వర్గాల్లో చర్చ జరుగుతోంది. కృష్ణా జిల్లాలో మొత్తం 26 జడ్పిటిసి స్థానాలు ఉండగా అందులో టిడిపి 19, జనసేన 4, బీజేపీ ఒక సీటు గెల్చుకున్నాయి. మొత్తంగా కూటమి 24 చోట్ల గెలిచింది. మిగతా రెండు స్థానాల్లో ఒకదాన్ని వైసీపీ, మరో సీటును ఇండిపెండెంట్ కైవసం చేసుకున్నారు. దీంతో ఈ రెండు స్థానాల గురించే ఇప్పుడు జిల్లా పొలిటికల్ సర్కిల్స్‌లో హాట్‌ హాట్‌ చర్చలు జరిగిపోతున్నాయి. ఇంత కూటమి హవాలో కూడా ఈ రెండు చోట్ల ఎదురుగాలి వీచి వైసిపి, ఇండిపెండెంట్ గెలవడం వెనక ఏం జరిగి ఉంటుందంటూ ఆసక్తికరంగా మాట్లాడుకుంటున్నారు. ప్రధానంగా స్థానిక ఎమ్మెల్యేల తీరుతోనే…. జిల్లా మొత్తం మీద ఈ రెండు స్థానాలు కోల్పోయామన్నది కూటమి వర్గాల అభిప్రాయంగా తెలుస్తోంది. రాష్ట్ర వ్యాప్తంగా ఎప్పుడూ తీవ్ర పొలిటికల్ హీట్ పుట్టించే గన్నవరం జడ్పిటిసిని వైసిపి కైవసం చేసుకోవడం ఇప్పుడు రాజకీయ ఉత్కంఠ రేపుతోంది. కృష్ణా జిల్లా మొత్తం మీద వైసీపీ గెల్చుకున్నది ఒకే ఒక్క సీటు, అదీకూడా గన్నవరం కావడంతో పొలిటికల్‌ ఇంట్రస్ట్‌ ఇంకా పెరుగుతోందంటున్నారు.

మాజీ ఎమ్మెల్యే వల్లభనేని వంశీ ఆధ్వర్యంలో  జెడ్పిటిసిగా వైసీపీ బీసీ అభ్యర్థి అనగాని రవి విజయం సాధించారు. కూటమి పొత్తులో భాగంగా ఈ స్థానం బీజేపీ కోటాలోకి వెళ్ళింది. దాంతో… కుమారస్వామి ఇక్కడి నుంచి కమలం గుర్తు మీద పోటీ చేసి ఓడిపోయారు. 63 ఓట్ల మెజార్టీతో వైసిపి అభ్యర్థి విజయం సాధించగా… కౌంటింగ్‌ ఫలితాన్ని వెంటనే ప్రకటించకుండా… దాదాపు ఐదు గంటల హైడ్రామా నడిచింది. ఆ తర్వాత వైసిపి గెలిచినట్లు ప్రకటించారు అధికారులు. ఆ సమయంలో గన్నవరంలో తీవ్ర ఉద్రిక్తత నెలకొంది. గన్నవరం ఎమ్మెల్యే యార్లగడ్డ వెంకట్రావు, మాజీ ఎమ్మెల్యే వల్లభనేని వంశీ మధ్య పచ్చగడ్డి వేస్తే భగ్గుమంటోంది. ఇక్కడ గెలుపును పార్టీతో పాటు యార్లగడ్డ కూడా ప్రతిష్టాత్మకంగా తీసుకున్నారు . కానీ… ఫైనల్‌ రిజల్ట్‌ వైసీపీది కావడంతో… ఎమ్మెల్యే యార్లగడ్డ షాకైనట్టు తెలుస్తోంది. అయితే…. లోకల్‌ టిడిపిలో ఉన్న వర్గ పోరే ఇక్కడ వైసిపికి అడ్వాంటేజ్‌ అయిందన్న విశ్లేషణలు కూడా ఉన్నాయి. కొందరు సీనియర్ నేతలతో యార్లగడ్డ వెంకట్రావుకు గ్యాప్ ఉందని, దాని ప్రభావం ఫలితంపై పడిందన్న చర్చ జరుగుతోంది. నిత్యం మాజీ ఎమ్మెల్యే వంశీపై నిప్పులు చెరిగే వెంకటరావుకు జడ్పిటిసి ఓటమి గట్టి షాక్ ఇచ్చిందన్నది లోకల్‌ టాక్‌.

ఇక పామర్రు టిడిపి ఎమ్మెల్యే వర్ల కుమార్ రాజాకు కూడా మొవ్వ జడ్పిటిసి షాకిచ్చింది. ఇక్కడ ఇండిపెండెంట్‌గా పోటీ చేసిన టిడిపి రెబెల్ నన్నపనేని వీరేంద్ర గెలిచారు. మొవ్వ జడ్పిటిసిని పొత్తులో భాగంగా జనసేనకు కేటాయించారు. దీంతో ఇక్కడి నుంచి పామర్రు జనసేన ఇంచార్జ్ తాడిశెట్టి నరేష్ పోటీ చేశారు. కానీ… నన్నపనేని వీరేంద్ర స్వతంత్ర అభ్యర్థిగా బరిలోకి దిగటంతో ఎమ్మెల్యే సర్వశక్తులు ఒడ్డి… కూటమి అభ్యర్థి గెలవడం కోసం పనిచేసినా… ఫలితం మాత్రం ఆయనకు షాక్ కొట్టేలా చేసిందని మాట్లాడుకుంటున్నారు. ఎన్నికల ప్రచారంలో ఎమ్మెల్యే కుమార్ రాజా… కులాల ప్రస్తావన తీసుకువచ్చి చేసిన వ్యాఖ్యలు సోషల్‌ మీడియాలో వైరల్‌ అయ్యాయి. టిడిపి రెబల్ అభ్యర్థిగా బరిలోకి దిగిన నన్నపనేని వీరేంద్రను ఓడించట కోసం చేసిన వ్యాఖ్యలు వికటించి చివరికి ఎమ్మెల్యే సారీ చెప్పుకోవాల్సి వచ్చిందట. వీరేంద్రతో ముందే నామినేషన్‌ ఉపసంహరింపచేయలేకపోవడం, ఆ తర్వాత కులాల వ్యాఖ్యలు కలిసి ఎమ్మెల్యేని డిఫెన్స్‌లో పడేశాయని అంటున్నారు. 6వేలకు పైగా మెజార్టీతో వీరేంద్ర గెలవడంతో ఎమ్మెల్యే వర్గం అవాక్కయిందట. జిల్లాలో ఈ రెండు జడ్పిటిసి స్థానాల్లో పరాజయం పాలవడంతో… ఈ  ఇద్దరు ఎమ్మెల్యేలను ఉద్దేశించి ఇప్పుడో పాపులర్‌ సినిమా డైలాగ్‌ని గుర్తు చేసుకుంటున్నారు స్థానికంగా. పోయిందిగా…. మొత్తం పరువంతా పోయిందిగా అంటూ సెటైర్స్‌ పడుతున్నాయి పొలిటికల్‌ సర్కిల్స్‌లో.