Ganesh Mandapam: వినాయక మండపాలపై కీలక ఆదేశాలు.. ఇవి తప్పనిసరిగా పాటించాల్సిందే..

విశాఖపట్నంలో వినాయక చవితి వేడుకలు ప్రశాంతంగా, సురక్షితమైన వాతావరణంలో నిర్వహించేందుకు నగర పోలీస్ కమిషనర్ శంఖబ్రత బాగ్చి పలు కీలక మార్గదర్శకాలను జారీ చేశారు. బహిరంగ ప్రదేశాల్లో వినాయక మండపాలు, విగ్రహాలు ఏర్పాటు చేసే నిర్వాహకులు తప్పనిసరిగా పోలీసుల అనుమతి తీసుకోవాలని స్పష్టం చేశారు. అనుమతుల ప్రక్రియను సులభతరం చేసేందుకు ‘ఏపీ పోలీస్ సేవా పోర్టల్’ ద్వారా సింగిల్ విండో విధానంలో ఆన్‌లైన్ దరఖాస్తు సౌకర్యాన్ని అందుబాటులోకి తీసుకొచ్చారు. నిర్వాహకులు ఎక్కడెక్కడ అనుమతులు తీసుకోవాలనే ఇబ్బంది లేకుండా పోలీస్, జీవీఎంసీ, అగ్నిమాపక శాఖ, కాలుష్య నియంత్రణ మండలి సహా విద్యుత్ శాఖల నుంచి కూడా ఆన్‌లైన్ ద్వారానే ఒకేసారి క్లియరెన్స్ పొందేలా చర్యలు చేపట్టారు.

దరఖాస్తు ప్రక్రియలో భాగంగా నిర్వాహకులు ప్రతిపాదిత విగ్రహం ఎత్తు, ఉపయోగించే పదార్థాలు, ఉపయోగించే స్థలం, భద్రతా ఏర్పాట్లకు సంబంధించిన వివరాలను పక్కాగా పొందుపరచాల్సి ఉంటుంది. ప్రజా ప్రశాంతతకు విఘాతం కలగకుండా మండప నిర్వాహకులు భద్రత, ట్రాఫిక్ నిర్వహణ, విద్యుత్ సౌకర్యాలు, పార్కింగ్ ఏర్పాట్లపై ప్రత్యేక శ్రద్ధ వహించాలి. అలాగే దర్శనాల పేరుతో లేదా చందాల పేరుతో ప్రజల నుంచి బలవంతపు వసూళ్లకు పాల్పడటం తీవ్ర నేరమని, అటువంటి ఫిర్యాదులు వస్తే కఠిన చర్యలు తప్పవని సీపీ హెచ్చరించారు. భక్తులకు స్వచ్ఛందంగా సౌకర్యాలు కల్పించాలి తప్ప ఎలాంటి నిబంధనల ఉల్లంఘనకూ తావివ్వకూడదు.

భారీ విగ్రహాలు, పెద్ద మండపాలు ఏర్పాటు చేసే నిర్వాహకులు సీసీటీవీ కెమెరాల ఏర్పాటు, రాత్రి వేళల్లో స్వచ్ఛంద సేవకుల కాపలా వంటి ముందుజాగ్రత్త చర్యలు తీసుకోవడం ద్వారా అవాంఛనీయ సంఘటనలను అరికట్టాలి. ముఖ్యంగా పర్యావరణ పరిరక్షణను దృష్టిలో ఉంచుకుని మట్టి వినాయక విగ్రహాల వాడకాన్ని ప్రోత్సహించాలని యంత్రాంగం పిలుపునిచ్చింది. అలాగే పండుగ ముగింపు సందర్భంగా నిర్వహించే నిమజ్జనం, శోభాయాత్రల సమయంలో అధిక శబ్దాలు చేసే డిజేలు, లౌడ్ స్పీకర్లను ఉపయోగించడంపై పూర్తి నిషేధం విధించారు. ఈ నిబంధనలన్నింటినీ పాటిస్తూ ప్రజలు, నిర్వాహకులు పోలీసులకు సహకరించి వేడుకలను భక్తిశ్రద్ధలతో, ప్రశాంత వాతావరణంలో జరుపుకోవాలని పోలీస్ కమిషనర్ కోరారు.