Tariff Risk: ట్రంప్ మరో షాక్.. భారత వస్తువులపై 100 శాతం టారిఫ్‌లు విధించేలా చట్టం

Tariff Risk: అమెరికా అధ్యక్షుడు డోనాల్డ్ ట్రంప్ భారత్‌కు మరోషాక్ ఇచ్చారు. రష్యా-ఉక్రెయిన్ యుద్ధానికి ఆర్థిక ఇంధనాన్ని అందిస్తున్న దేశాలపై ఉక్కుపాదం మోపేందుకు అమెరికా సెనెట్ (యూఎస్ ఎగువ సభ) సంచలన నిర్ణయం తీసుకుంది. రష్యా నుంచి పెట్రోలియం ఉత్పత్తులను అత్యధికంగా కొనుగోలు చేస్తున్న చైనా, భారత్ వంటి దేశాలపై భారీగా జరిమానాలు, సుంకాలను విధించే ప్రతిపాదిత బకాయి బిల్లుకు సెనెట్ 86-11 ఓట్ల భారీ మెజారిటీతో ఆమోదం తెలిపింది. ‘లిండ్సే ఓ. గ్రాహం శాంక్షనింగ్ రష్యా అండ్ ఇరాన్ యాక్ట్ ఆఫ్ 2026’గా నామకరణం చేసిన ఈ బిల్లు ద్వారా అమెరికా అధ్యక్షుడు డొనాల్డ్ ట్రంప్‌కు అపరిమిత అధికారాలు దక్కనున్నాయి. రష్యా నుంచి ముడి చమురు, గ్యాస్‌ను అత్యధికంగా దిగుమతి చేసుకుంటున్న టాప్-5 దేశాలైన చైనా, భారత్, అజర్‌బైజాన్, హంగేరీ, స్లోవేకియాల నుంచి అమెరికాకు దిగుమతయ్యే వస్తువులపై ఏకంగా 100 శాతం టారిఫ్‌లు విధించేందుకు ఈ చట్టం అధ్యక్షుడికి వెసులుబాటు కల్పిస్తుంది.

రష్యాపై కఠిన ఆంక్షలతో పాటు, ఇరాన్ శక్తి రంగానికి మద్దతిచ్చే కంపెనీలపై చర్యలు తీసుకునే ‘ఇరాన్ శాంక్షన్స్ యాక్ట్ 1996’ గడువును ఈ బిల్లు 2031 వరకు పొడిగిస్తుంది. ద్విపాక్షిక మద్దతుతో రూపుదిద్దుకున్న ఈ బిల్లును రిపబ్లికన్ సెనేటర్ లిండ్సే గ్రాహం, డెమొక్రాట్ రిచర్డ్ బ్లూమెంతల్ రూపొందించారు. కాగా, కీవ్ పర్యటన తర్వాత జూలై 11న సెనేటర్ గ్రాహం అకస్మాత్తుగా కన్నుమూశారు. దాంతో ఉక్రెయిన్ మద్దతుదారుడైన ఆయన జ్ఞాపకార్థం, ఇరు పార్టీల నాయకులు పట్టుబట్టి ఈ బిల్లును వేగవంతంగా ఆమోదింపజేశారు. గ్రాహం మరణానంతరం ఆయన స్థానంలో సెనేటర్‌గా బాధ్యతలు చేపట్టిన ఆయన సోదరి డార్లీన్ గ్రాహం మాట్లాడుతూ.. “రష్యా ఆర్థిక వ్యవస్థను నిలబెడుతున్న దేశాలకు ఈ బిల్లు ఒక స్పష్టమైన హెచ్చరిక. అమెరికాతో వ్యాపారం చేస్తారా? లేక చౌకైన రష్యన్ ఇంధనాన్ని కొనుగోలు చేస్తారా? అనే తేల్చుకోవాల్సిన సమయం వచ్చింది” అని స్పష్టం చేశారు. రష్యా అధ్యక్షుడు వ్లాదిమిర్ పుతిన్, అక్కడ సంపన్న వ్యాపారవేత్తలు (ఒలిగార్క్స్), ఆర్థిక సంస్థలపై కఠిన ఆంక్షలు విధించడం కూడా ఈ బిల్లు ప్రధాన లక్ష్యం. ఈ ఓటింగ్ అనంతరం సెనేటర్ బ్లూమెంతల్ విలేకరులతో మాట్లాడుతూ, ఈ తీవ్రమైన ఆంక్షలు, టారిఫ్‌లు అక్రమ యుద్ధానికి ప్రత్యక్షంగా లేదా పరోక్షంగా సహకరిస్తున్న వారిని ఖచ్చితంగా నిలువరిస్తాయని అన్నారు.