TVK Chief Vijay: తమిళనాడు రాజకీయాల్లో వడివడిగా అధికారం కోసం అడుగులు వేస్తున్న హీరో, తమిళగ వెట్రి కళగం (TVK) అధినేత విజయ్ అనూహ్య వివాదంలో చిక్కుకున్నారు. తాజాగా రాష్ట్రంలో జరగనున్న అసెంబ్లీ ఎన్నికల బరిలో నిలిచిన ఆయన దాఖలు చేసిన అఫిడవిట్లలో పరస్పర విరుద్ధ సమాచారం ఉండటం ఇప్పుడు రాష్ట్రవ్యాప్తంగా చర్చనీయాంశంగా మారింది. రెండు వేర్వేరు నియోజకవర్గాల్లో నామినేషన్లు దాఖలు చేసిన అఫిడవిట్లలో కేసుల వివరాల విషయంలో వ్యత్యాసాలు బయటపడటంతో రాష్ట్ర వ్యాప్తంగా పెద్ద ఎత్తున రచ్చ జరుగుతోంది.
READ ALSO: Gold Man: ఈసారి నిజమైన బంగారం.. మరో ‘గోల్డ్ మాన్’.. రూ.1 కోటి విలువైన బంగారం స్వాధీనం..!
అసలేం జరిగిందంటే..
ఈ ఎన్నికల్లో దళపతి విజయ్ రెండు నియోజకవర్గాల నుంచి నామినేషన్ దాఖలు చేశారు. అయితే, ఆ రెండు చోట్లా ఆయన సమర్పించిన అఫిడవిట్లలో సమాచారం ఒకదానికొకటి పొంతన లేకుండా ఉంది. పెరంబూర్ నియోజకవర్గం నుంచి దాఖలు చేసిన అఫిడవిట్లో తనపై ఎటువంటి “క్రిమినల్ కేసులు లేవు” అంటూ విజయ్ క్లియర్ డిక్లరేషన్ ఇచ్చారు. ఇదే సమయంలో తిరుచ్చి ఈస్ట్లో సమర్పించిన అఫిడవిట్లో మాత్రం తనపై ఒక పోలీస్ కేసు ఉన్నట్లు పేర్కొన్నారు. 2025లో మదురైలో నమోదైన ఒక కేసు వివరాలు ఇప్పుడు ఈ వివాదానికి కేంద్ర బిందువుగా మారాయని సమాచారం. పెరంబూర్ అఫిడవిట్లో ఈ కేసు ప్రస్తావన లేకపోవడంపై విపక్షాలు మండిపడుతున్నాయి. దీనిపై విజయ్ స్పందిస్తూ.. “సదరు కేసు గురించి తనకు ముందుగా సమాచారం లేదు” అని వివరణ ఇచ్చారు. అయితే, ఒకే సమయంలో రెండు చోట్లా రెండు రకాలుగా సమాచారం ఇవ్వడంపై సర్వత్రా అనుమానాలు వ్యక్తమవుతున్నాయి.
చట్టపరమైన చిక్కులు.. డిస్క్వాలిఫికేషన్ ముప్పు..
ఎన్నికల నిబంధనల ప్రకారం.. అఫిడవిట్లో తప్పుడు సమాచారం ఇవ్వడం లేదా వాస్తవాలను దాచడం తీవ్రమైన నేరంగా పరిగణించబడుతుంది. అఫిడవిట్లో వ్యత్యాసాలు ఉన్నట్లు తేలితే ప్రజా ప్రాతినిధ్య చట్టం ప్రకారం చట్టపరమైన చర్యలు తీసుకునే అవకాశం ఉంటుంది. ఒకవేళ ఈ సమాచారం ఉద్దేశపూర్వకంగా దాచారని నిర్ధారణ అయితే, అభ్యర్థిత్వాన్ని రద్దు చేయడం వరకు వెళ్లే ప్రమాదం ఉందని న్యాయ నిపుణులు హెచ్చరిస్తున్నారు. ప్రస్తుతం ఈ ఇష్యూను ప్రతిపక్షాలు అస్త్రంగా మార్చుకున్నాయి. “రాజకీయాల్లోకి రాకముందే విజయ్ ఇలాంటి తప్పుడు సమాచారంతో ప్రజలను తప్పుదోవ పట్టిస్తున్నారా?” అంటూ విమర్శలు గుప్పిస్తున్నారు. మరోవైపు, సోషల్ మీడియాలో కూడా ఈ విషయం విపరీతంగా వైరల్ అవుతోంది. విజయ్ అభిమానులు ఇది కేవలం సాంకేతిక పొరపాటేనని వాదిస్తుంటే, ప్రత్యర్థులు మాత్రం ఎన్నికల కమిషన్ కఠిన చర్యలు తీసుకోవాలని డిమాండ్ చేస్తున్నారు. ఎన్నికల అధికారులు విజయ్ ఇచ్చిన వివరణను ఎలా స్పందిస్తారు అనే దానిపైనే ఇప్పుడు TVK అధినేత రాజకీయ భవిష్యత్తు ఆధారపడి ఉంటుందని విశ్లేషకులు అభిప్రాయపడుతున్నారు.