US – Cuba War: ట్రంప్ ‘వార్’ వార్నింగ్.. క్యూబాపై యుద్ధ మేఘాలు! అమెరికా తదుపరి టార్గెట్ ఇదేనా?

US – Cuba War: అమెరికా, క్యూబా దేశాల మధ్య ఉద్రిక్తతలు పతాక స్థాయికి చేరుకున్నాయి. వెనిజులా, ఇరాన్‌లపై సైనిక చర్యల తర్వాత ఇప్పుడు అమెరికా దృష్టి క్యూబాపై పడిందన్న వార్తలు ప్రపంచవ్యాప్తంగా ప్రకంపనలు సృష్టిస్తున్నాయి. అమెరికా అధ్యక్షుడు డొనాల్డ్ ట్రంప్ ఇస్తున్న హెచ్చరికల నేపథ్యంలో, క్యూబా తన రక్షణ సన్నాహాలను ముమ్మరం చేసింది. క్యూబా ముందు అమెరికా అధ్యక్షుడు ట్రంప్ రెండు ఆప్షన్లు ఉంచారని సమాచారం. ఒకటి వాషింగ్టన్ విధించే షరతులకు లొంగిపోయి రాజీ పడటం, లేదా సైనిక చర్యను ఎదుర్కోవడం. ఈ నేపథ్యంలో క్యూబా అధ్యక్షుడు మిగెల్ డియాజ్-కానెల్ తమ దేశ సైన్యాన్ని, ప్రజలను అప్రమత్తం చేశారు. అమెరికా దాడిని తిప్పికొట్టడానికి సిద్ధంగా ఉండాలని ఆయన పిలుపునిచ్చారు. అయితే, ఈ సన్నాహాలు కేవలం ఆత్మరక్షణ కోసమేనని ఆయన స్పష్టం చేశారు.

READ ALSO: Vijayawada: టెర్రర్ లింకుల కేసులో ఇద్దరు అరెస్ట్.. వెలుగులోకి కొత్త నిజాలు.!

సంక్షోభాన్ని నివారించేందుకు ఇరు దేశాల మధ్య దౌత్యపరమైన చర్చలు జరుగుతున్నట్లు క్యూబా ఉప విదేశాంగ మంత్రి కార్లోస్ ఫెర్నాండెజ్ డి కోసియో తెలిపారు. అయితే, ఈ చర్చల్లో అమెరికా ఒక కఠినమైన షరతు పెట్టినట్లు తెలుస్తోంది. క్యూబా అధ్యక్షుడు మిగెల్ డియాజ్-కానెల్ తన పదవి నుంచి తప్పుకోవాలని అమెరికా డిమాండ్ చేస్తున్నట్లు సమాచారం. అన్ని అంశాలపై చర్చలకు సిద్ధమే కానీ, దేశ రాజకీయ నిర్మాణం, అధ్యక్ష పదవి విషయంలో మాత్రం రాజీ పడే ప్రసక్తే లేదని క్యూబా తేల్చి చెప్పిందని తెలుస్తుంది.

అంధకారంలో క్యూబా
యుద్ధ భయం ఒకవైపు ఉంటే, ఇంధన సంక్షోభం క్యూబాను కోలుకోలేని దెబ్బ తీస్తోంది. గత వారంలో రెండుసార్లు నేషనల్ గ్రిడ్ విఫలమవడంతో దేశమంతా అంధకారంలో మునిగిపోయింది. ఆసుపత్రుల్లో విద్యుత్ లేక శస్త్రచికిత్సలు నిలిచిపోయాయి. పెట్రోల్, డీజిల్ దొరక్క వాహనాలు రోడ్ల మీద నిలిచిపోగా, విమాన సర్వీసులు కూడా రద్దయ్యాయి. గతంలో వెనిజులా నుంచి క్యూబాకు ఉచితంగా చమురు అందేది. కానీ వెనిజులాపై అమెరికా దాడి తర్వాత ఆ సరఫరా పూర్తిగా నిలిచిపోయింది. క్యూబాకు చమురు అమ్మే దేశాలపై భారీ సుంకాలు విధిస్తామని ట్రంప్ హెచ్చరించడంతో పరిస్థితి మరింత దిగజారింది. గతంలో వెనిజులాలో నికోలస్ మదురోను గద్దె దించేందుకు అమెరికా ఎలాంటి వ్యూహాలను అనుసరించిందో, ఇప్పుడు క్యూబా విషయంలోనూ అవే కనిపిస్తున్నాయని విశ్లేషకులు భావిస్తున్నారు. ఆర్థిక ఆంక్షల ద్వారా దేశాన్ని ఉక్కిరిబిక్కిరి చేసి, ఆపై సైనిక చర్యకు దిగే అవకాశం ఉందని అంతర్జాతీయ మీడియా పేర్కొంటోంది.

READ ALSO: Actor Rajasekhar: డాన్స్ రాదని ఒప్పుకున్న రాజశేఖర్.. ఫ్యాన్స్ రియాక్షన్ ఇదే!