God of War: ఎన్టీఆర్ – త్రివిక్రమ్ ‘గాడ్ ఆఫ్ వార్’.. తొలిసారి నోరు విప్పిన మాటల మాంత్రికుడు.!

Trivikram Srinivas God of War: టాలీవుడ్ స్టార్ డైరెక్టర్, మాటల మాంత్రికుడు త్రివిక్రమ్ శ్రీనివాస్ పాన్ ఇండియా స్థాయిలో తన సత్తా చాటేందుకు సిద్ధమవుతున్నారు. యంగ్ టైగర్ ఎన్టీఆర్ హీరోగా తెరకెక్కనున్న భారీ మైథలాజికల్ ప్రాజెక్ట్ ‘గాడ్ ఆఫ్ వార్’ పై తొలిసారి ఆయన బహిరంగంగా స్పందించారు. ఈ సినిమా స్క్రిప్ట్ వర్క్, షూటింగ్ షెడ్యూల్‌కు సంబంధించిన కీలక అప్‌డేట్స్‌ను పంచుకుంటూ తారక్ అభిమానుల్లో సరికొత్త జోష్ నింపారు.

ఇప్పటివరకు ప్రేమకథలు, కుటుంబ కథా చిత్రాలు, కమర్షియల్ యాక్షన్ సినిమాలతో ప్రేక్షకులను అలరించిన దర్శకుడు త్రివిక్రమ్.. తొలిసారిగా మైథలాజికల్ జానర్‌లోకి అడుగుపెడుతున్నారు. సుబ్రహ్మణ్యస్వామి జీవిత కథ ఆధారంగా ఎన్టీఆర్‌తో కలిసి ‘గాడ్ ఆఫ్ వార్’ అనే వర్కింగ్ టైటిల్‌తో ఈ పాన్ ఇండియా చిత్రాన్ని ప్రకటించారు. అనౌన్స్ చేసినప్పటి నుంచి దీనిపై ఎక్కడా పెదవి విప్పని త్రివిక్రమ్, తాజాగా ఒక టాక్ షోలో ఈ ప్రాజెక్ట్‌కు సంబంధించిన అసలు విషయాలను వెల్లడించారు. ప్రస్తుతం వెంకటేష్‌తో తెరకెక్కిస్తున్న ‘ఆదర్శ కుటుంబం’ సినిమా ప్రమోషన్లలో భాగంగా.. నటుడు జగపతి బాబు హోస్ట్ చేస్తున్న టాక్ షోలో త్రివిక్రమ్ పాల్గొన్నారు. ఈ సందర్భంగా ‘గాడ్ ఆఫ్ వార్’ సినిమా స్క్రిప్ట్ పనులు ఇప్పటికే దాదాపు పూర్తయ్యాయని ఆయన స్పష్టం చేశారు.

సినిమా అనౌన్స్‌మెంట్ పోస్టర్‌పై కనిపించిన ‘నా జానామి శబ్దం న జానామి చార్థం’ అనే సంస్కృత శ్లోకం గురించి ప్రస్తావిస్తూ త్రివిక్రమ్ కాస్త ఎమోషనల్ అయ్యారు. ఆరు ముఖాల షణ్ముఖుడి దివ్య రూపం తన హృదయంలో మెదలగానే మాటలు, స్తోత్రాలు వాటంతట అవే కవిత్వంలా ప్రవహించాయని.. ఈ ప్రాజెక్ట్ వెనుక దైవ సంకల్పం ఉందని గురూజీ వివరించారు. గతంలో వీరి కాంబినేషన్‌లో వచ్చిన ‘అరవింద సమేత వీర రాఘవ’ ఘన విజయం సాధించడంతో.. ఇప్పుడు ఈ మైథలాజికల్ యాక్షన్ డ్రామాపై జాతీయ స్థాయిలో భారీ అంచనాలు నెలకొన్నాయి. ‘ఆదర్శ కుటుంబం’ విడుదల కాగానే పూర్తిగా ‘గాడ్ ఆఫ్ వార్’ పనుల్లోకి దిగుతానని త్రివిక్రమ్ స్పష్టం చేశారు. మరోవైపు ఎన్టీఆర్ ప్రస్తుతం ప్రశాంత్ నీల్ దర్శకత్వంలో చేస్తున్న ప్రాజెక్ట్‌తో బిజీగా ఉన్నారు. వచ్చే వేసవి నాటికి ఆ చిత్రాన్ని పూర్తి చేసి, వెంటనే ప్రత్యేకమైన మేకోవర్‌తో ‘గాడ్ ఆఫ్ వార్’ సెట్స్‌లోకి అడుగుపెట్టనున్నారు.