Lucknow: ఎంతకు తెగించాడంటే.. డబ్బుల కోసం కొడుకు ఏం చేశాడంటే..?

యూపీ రాజధాని లక్నోలో ఓ కంత్రీ కొడుకు బరి తెగించాడు. డబ్బుల కోసం తన తండ్రికే స్కెచ్ వేశాడు. తన తండ్రి నుంచి రూ. 2 కోట్లు లాగేందుకు తన స్నేహితులతో కలిసి కిడ్నాప్ నాటకం ఆడాడు. తన స్నేహితులకు స్టోరీనంతా చెప్పి.. రూ. 2 కోట్లు ఇవ్వాలంటూ ఓ మెస్సెజ్ పంపించారు. దీంతో బాధిత తండ్రి.. ఈ విషయంపై పోలీసులకు సమాచారం ఇచ్చారు. అనంతరం రంగంలోకి దిగిన పోలీసులు.. ఆ స్థలాన్ని ట్రాక్ చేసి కొడుకుతో పాటు ఇద్దరు స్నేహితులను అదుపులోకి తీసుకున్నారు.

Read Also: Balineni Srinivas Reddy: ఈనెల 26న పవన్ సమక్షంలో జనసేనలోకి బాలినేని..

వివరాల్లోకి వెళ్తే.. ఈ ఘటన అలంబాగ్ ప్రాంతంలో జరిగింది. విద్యార్థి తండ్రి ఓ ప్రైవేట్ కంపెనీలో మేనేజర్‌గా పని చేస్తున్నాడు. శుక్రవారం ఇంటి నుంచి వెళ్లిన విద్యార్థి రాత్రి వరకు ఇంటికి రాలేదు. దీంతో.. కుటుంబ సభ్యులు ఫోన్ చేయగా అతని మొబైల్ స్విచ్ఛాఫ్‌లో ఉందని చెప్పారు. దీంతో కుటుంబ సభ్యుల్లో టెన్షన్ పట్టుకుంది. ఈ క్రమంలో.. యువకుడి తండ్రి అలంబాగ్ పోలీస్ స్టేషన్‌లో తన కొడుకు కనిపించడం లేదని ఫిర్యాదు చేశాడు.

Read Also: Tragedy: విహారయాత్రలో విషాదం.. వాటర్‌ఫాల్స్‌లో ఐదుగురు మెడికల్‌ విద్యార్థులు గల్లంతు

అయితే పథకం ప్రకారం.. కొడుకు స్నేహితుల నెంబర్ల నుంచి తన తండ్రికి మెస్సెజ్ పంపించాడు. నీ కొడుకును కిడ్నాప్ చేశామని.. రూ.2 కోట్లు ఇస్తేనే విడిచి పెడుతామని డిమాండ్ చేశారు. అయితే.. ఆ మెసేజ్‌ని చూసి భయపడిన తండ్రి పోలీసులకు సమాచారం అందించాడు. దీంతో.. పోలీసులు వారి ఆచూకీ తెలుసుకునేందుకు విద్యార్థి బందీగా ఉంచిన ప్రాంతానికి చేరుకున్నారు. అప్పటికీ.. తన స్నేహితులు అక్కడి నుంచి వెళ్లిపోయారు. ఈ క్రమంలో విద్యార్థిని పోలీసులు విడిపించారు. అనంతరం అతన్ని విచారించగా అసలు గుట్టు విప్పాడు. ఈ ప్లాన్ తానే చేశాడని పోలీసులు కనుగొన్నారు. ఈ కేసులో ప్రమేయం ఉన్న ఇద్దరు స్నేహితులను పోలీసులు అదుపులోకి తీసుకున్నారు. కాగా.. ఈ ఘటనలో వారిపై ఎలాంటి కేసు నమోదు చేయలేదు.