Jasprit Bumrah: బుమ్రా కంటే అత్యుత్తమ పేసర్ ఎవరూ లేరు.. న్యూజిలాండ్ కెప్టెన్ ప్రశంసలు!

Tim Southee hails Jasprit Bumrah: టీమిండియా స్టార్ పేసర్ జస్ప్రీత్ బుమ్రాపై న్యూజిలాండ్ పేస్ బౌలర్ కమ్ కెప్టెన్ టిమ్‌ సౌథీ ప్రశంసలు కురిపించాడు. ప్రస్తుత క్రికెట్‌లో బుమ్రా కంటే మరెవరూ బెటర్‌గా లేరని అభిప్రాయపడ్డాడు. తీవ్రమైన గాయంతో ఇబ్బందిపడిన బూమ్ బూమ్.. కోలుకొని వచ్చాక పునరాగమనం ఘనంగా చాటాడన్నాడు. ప్రస్తుతం బుమ్రా అత్యుత్తమ వెర్షన్‌ను చూస్తున్నామని సౌథీ చెప్పుకొచ్చాడు. బుధవారం ముంబైలో జరిగిన సియట్ అవార్డుల కార్యక్రమంలో సౌథీ పాల్గొన్నాడు.

‘తీవ్రమైన వెన్ను గాయంతో ఇబ్బందిపడిన జస్ప్రీత్ బుమ్రా కోలుకొని వచ్చి పునరాగమనం ఘనంగా చాటాడు. గతంలో కంటే ఇప్పుడు అత్యంత ప్రమాదకార బౌలర్‌గా మారాడు. గాయం ముందు కంటే ఇప్పుడు చాలా సౌకర్యవంతంగా కనిపిస్తున్నాడు. అనుభవం అతడికి కలసివస్తోంది. ఆటను అర్థం చేసుకోవడంలో ఎంతో పరిణతి సాధించాడు. ప్రస్తుతం బుమ్రా అత్యుత్తమ వెర్షన్‌ను చూస్తున్నాం. మూడు ఫార్మాట్లలో అద్భుతంగా ఆడుతున్నాడు. ప్రస్తుత క్రికెట్‌లో బుమ్రా కంటే అత్యుత్తమ పేసర్ ఎవరూ లేరని నా ఉద్దేశం’ అని టిమ్‌ సౌథీ అన్నాడు.

Also Read: Google Pixel 9 Offers: ‘గూగుల్‌ పిక్సెల్‌ 9’ విక్రయాలు ఆరంభం.. 10 వేల రాయితీ!

2023 వన్డే ప్రపంచకప్‌ నుంచి 2024 టీ20 ప్రపంచకప్‌ వరకు జస్ప్రీత్ బుమ్రా తీరిక లేకుండా మ్యాచ్‌లు ఆడాడు. దీంతో బీసీసీఐ సెలెక్టర్లు అతడికి విశ్రాంతిని ఇచ్చారు. ఇటీవల ముగిసిన శ్రీలంక పర్యటనకు అతడిని ఎంపిక చేయలేదు. వచ్చే నెలలో బంగ్లాదేశ్‌తో టెస్టు సిరీస్‌కు దూరంగా ఉంటాడని క్రికెట్ వర్గాలు అంటున్నాయి. న్యూజిలాండ్ టెస్టు సిరీస్‌లో బుమ్రా బరిలోకి దిగే అవకాశాలు ఉన్నాయి. ఆపై ఆస్ట్రేలియాతో ఐదు టెస్టుల బోర్డర్-గావస్కర్ ట్రోఫీలో ఆడనున్నాడు.