CM Revanth Reddy: రాష్ట్రంలో వైద్యారోగ్య వ్యవస్థను పూర్తిస్థాయిలో బలోపేతం చేసి, పేదలకు మెరుగైన వైద్యం అందించడమే తమ ప్రభుత్వ ప్రధాన లక్ష్యమని తెలంగాణ ముఖ్యమంత్రి రేవంత్ రెడ్డి స్పష్టం చేశారు. ఈ మేరకు ఆయన ఎక్స్ (ట్విట్టర్) వేదికగా కీలక విషయాలను పంచుకున్నారు. అనారోగ్యంతో ఆసుపత్రికి వచ్చిన ఏ పేద కుటుంబమూ వైద్యం కోసం అప్పులపాలు కాకూడదని, చికిత్స కోసం రోజుల తరబడి ఎదురుచూసే పరిస్థితి ఉండకూడదని ఆకాంక్షించారు. ఈ లక్ష్యంతోనే వైద్యారోగ్య శాఖపై నిరంతరం సమీక్షలు నిర్వహిస్తూ, శాఖను ప్రక్షాళన చేయడమే కాకుండా ప్రణాళికాబద్ధంగా అనేక మార్పులు తీసుకొస్తున్నట్లు సీఎం పేర్కొన్నారు.
రాష్ట్రంలో నిర్మాణంలో ఉన్న ప్రధాన ఆసుపత్రుల పనులను వేగవంతం చేయాలని అధికారులకు స్పష్టమైన గడువు విధించినట్లు రేవంత్ రెడ్డి తెలిపారు. వచ్చే జూన్ 2 నాటికి టిమ్స్ (TIMS) ఆసుపత్రులు, వరంగల్ సూపర్ స్పెషాలిటీ ఆసుపత్రి, నిమ్స్ (NIMS) విస్తరణ పనులను పూర్తి చేయాలని ఆదేశించానన్నారు. అలాగే, వచ్చే ఏడాది డిసెంబర్ నాటికి నూతన ఉస్మానియా ఆసుపత్రి నిర్మాణాన్ని పూర్తి చేసి ప్రజలకు అందుబాటులోకి తీసుకురావాలని స్పష్టం చేసినట్లు వివరించారు. ప్రభుత్వ వైద్య రంగంలో ఇప్పటికే చేపట్టిన సంస్కరణలను ప్రస్తావిస్తూ, పేదలకు ఆర్థిక భరోసా కల్పించేందుకు రాజీవ్ ఆరోగ్యశ్రీ వైద్య కవరేజీని రూ. 10 లక్షలకు పెంచామని సీఎం గుర్తుచేశారు. ప్రభుత్వ ఆసుపత్రుల్లో రోగుల అవసరాలకు అనుగుణంగా పడకల సామర్థ్యాన్ని 30 వేల నుంచి 38 వేలకు పెంచడంతో పాటు, వైద్య సిబ్బంది కొరతను అధిగమించేందుకు ఇప్పటివరకు 13,401 నియామకాలను పూర్తి చేశామని తెలిపారు. వీటికి అదనంగా మరో 5,640 వైద్య సిబ్బంది నియామక ప్రక్రియ ప్రస్తుతం కొనసాగుతోందని వెల్లడించారు. ఆసుపత్రి గుమ్మం తొక్కిన ప్రతి పేదవాడికి నాణ్యమైన వైద్యం అందాలని, వైద్య ఖర్చుల కోసం ఆస్తులు అమ్ముకునే దుస్థితి ఏ ఒక్కరికీ రాకూడదన్నదే తమ ప్రభుత్వ సంకల్పమని సీఎం రేవంత్ రెడ్డి ఉద్ఘాటించారు.