తెలంగాణ అసెంబ్లీ సమావేశాలు కొనసాగుతున్నాయి. గురువారం ఐదవ రోజు వాడివేడిగా సమావేశం జరగనుంది. నేడు అసెంబ్లీలో నాలుగు ప్రభుత్వ బిల్లులతో సహా భూభారతి బిల్లుపై చర్చ కొనసాగనుంది. తెలంగాణ మున్సిపాలిటీ సవరణ బిల్లు, గ్రేటర్ హైదరాబాద్‌ మున్సిపల్ కార్పొరేషన్‌ బిల్లు, తెలంగాణ పంచాయతీరాజ్ సవరణ బిల్లులను ప్రభుత్వం ప్రవేశపెట్టనుంది. నేడు అసెంబ్లీలో ప్రభుత్వ అప్పులు, చెల్లింపులపై సహా రైతు భరోసాపై చర్చ జరగనుంది.
-
దళిత స్పీకర్ ను అవమానించడం మేము వ్యతిరేకిస్తున్నాం- విప్ ఆడ్లూరి లక్ష్మణ్
దళిత స్పీకర్ ను అవమానించడం మేము వ్యతిరేకిస్తున్నామని విప్ ఆడ్లూరి లక్ష్మణ్ అన్నారు. సభ నుంచి వారిని బహిష్కరించాలని డిమాండ్ చేశారు. దొరల అహంకారానికి ఇది ఒక నిదర్శనం అన్నారు. స్పీకర్ మీద పేపర్లు పడేసి స్పీకర్ చైర్ ను అవమానించారని మండిపడ్డారు. మా దేవుడు అంబేద్కర్ ను పార్లమెంట్ లో బీజేపీ అవమణించిందని తెలిపారు. ఇక్కడ దళిత స్పీకర్ ను అసెంబ్లీలో బీఆర్ఎస్ ఎమ్మేల్యేలు అవమానించారని తెలిపారు. బీఆర్ఎస్ ఎమ్మెల్యేల పై ఎస్సి,ఎస్టీ,అట్రాసిటీ కేసు పెట్టాలన్నారు.
-
స్పీకర్ పోడియం మెట్ల పైకి వెళ్ళిన హరీష్ రావు
మాజీ మంత్రి హరీష్ రావు స్పీకర్ పోడియం మెట్ల పైకి వెళ్ళారు. కోరుట్ల ఎమ్మెల్యే సంజయ్ పేపర్ చించి విసిరేశారు. బోథ్ ఎమ్మెల్యే అనిల్ జాదవ్ పేపర్ బంచ్ చింపి విసిరేశారు. వెల్ లోకి వెళ్లిన బీఆర్ఎస్ ఎమ్మెల్యే లు వెళ్లడంతో సభలో గందరగోళ పరిస్థితి నెలకొంది.
-
సభలో రూల్స్ పెట్టింది.. బీఆర్ఎస్ వాళ్లే - ఎమ్మెల్యే వేముల వీరేశం
సభలో రూల్స్ పెట్టింది.. బీఆర్ఎస్ వాళ్లే అని ఎమ్మెల్యే వేముల వీరేశం అన్నారు. ఇప్పుడు ఆ రూల్స్ ను తప్పి ప్రవర్తిస్తున్నారని ఎమ్మెల్యే అన్నారు. ఫార్ములా ఈ కార్ రేసులో కేటీఆర్ జైలుకు వెళ్తారని కాదు వారి భాద.. ధరణి పై వారు దోచుకున్న దోపిడీ బయట పడకుండా ఉండేందుకు చర్చను అడ్డుకుంటున్నారని వీరేశం అన్నారు. దళిత స్పీకర్ ను అవమానించిన బీఆర్ఎస్ ఎమ్మెల్యేల సభ్యత్వాన్ని రద్దు చేయాలని డిమాండ్ చేస్తున్నా..
-
శాసన సభ చీకటి రోజుగా పరిగణిస్తున్నాం- ఎమ్మెల్యే వేముల వీరేశం
ఈ రోజు శాసన సభ చీకటి రోజుగా పరిగణిస్తున్నామని ఎమ్మెల్యే వేముల వీరేశం అన్నారు. ఒక దళిత స్పీకర్ పై పేపర్లు విసరడాన్ని వ్యతిరేకిస్తున్నామన్నారు. ఇది అగ్ర కులాల దురహంకారం అన్నారు. కౌశిక్ రెడ్డి తీరు యావత్ తెలంగాణ ప్రజలు గమనిస్తున్నారని తెలిపారు. ఈ రోజు కౌశిక్ రెడ్డి చేష్టలు చూస్తూంటే తాగి సభకు వచ్చాడా అని డౌట్ వస్తుందన్నారు.
-
ఎమ్మెల్యే శంకర్ చెప్పు చూపించాడు-బీఆర్ఎస్ ఎమ్మెల్యేలు
బీఆర్ఎస్ ఎమ్మెల్యేలపై మొదట షాద్ నగర్ ఎమ్మెల్యే శంకర్ చెప్పు చూపించాడని ఆ తర్వాతే మేము పేపర్ లు విసిరామ్ అని బీఆర్ఎస్ ఎమ్మెల్యేలు అన్నారు.
-
సభ పది నిమిషాలు వాయిదా..
సభ పది నిమిషాలు వాయిదా పడింది. బీఆర్ఎస్ సభ్యుల ఆందోళనతో సభ పది నిమిషాలు వాయిదా వేశారు స్పీకర్. సభలో స్పీకర్ పైకి పేపర్లు విసిరిన బీఆర్ఎస్ సభ్యులు. దళిత స్పీకర్ నీ బీఆర్ఎస్ ఎమ్మెల్యేలు అవమానించారని ,స్పీకర్ ఛాంబర్ కి కాంగ్రెస్ ఎమ్మెల్యేలు వెళ్ళారు.
-
నల్ల బ్యాడ్జీలతో సభకి బీఆర్ఎస్ ఎమ్మెల్సీలు
నల్ల బ్యాడ్జీలతో సభకి బీఆర్ఎస్ ఎమ్మెల్సీలు హాజరయ్యారు. బీఆర్ఎస్ వర్కింగ్ ప్రెసిడెంట్ కేటీఆర్ పై అక్రమ కేసుకు నిరసనగా కౌన్సిల్ కి నలుపు చీర ధరించి మండలికి కవిత హాజరయ్యారు. ఫార్ములా ఈ వ్యవహారం పై మండలి లో చర్చ చేపట్టాలని బీఆర్ఎస్ డిమాండ్ చేసింది.
-
శాసనమండలిలో బీఆర్ఎస్ ఎమ్మెల్సీ ల నిరసన..
శాసనమండలిలో బీఆర్ఎస్ ఎమ్మెల్సీల నిరసన చేపట్టారు. బీఆర్ఎస్ వర్కింగ్ ప్రెసిడెంట్ కేటిఆర్ పై అక్రమ కేసుకు నిరసన తెలుపుతున్న ఎమ్మెల్సీలు. జై తెలంగాణ నినాదాలతో మార్మోగుతున్న మండలి. అక్రమ కేసులు ఎత్తివేయాలని ఏమ్మెల్సీల డిమాండ్ చేశారు.
-
భూ భారతి పై మంత్రి పొంగులేటి మాట్లాడుతున్నారు
భూ భారతి పై మంత్రి పొంగులేటి మాట్లాడుతున్నారు. సిద్దిపేటలో ఓఆర్ రైతు కృష్ణయ్య 7 ఎకరాల భూమి...ధరణి కారణంగా రికార్డులు తారుమారు అయ్యాయని తెలిపారు. ధరణి చేసిన నష్టంతో ఆత్మహత్య చేసుకున్నాడన్నారు. ఇలాంటి కేసులు చాలా ఉన్నాయన్నారు మంత్రి. ధరణి పెట్టీ..దళిత..గిరిజన..బీసీ ల భూములు తన్నుకుపోయాడన్నారు. రెండు పిల్లులు రొట్టె ముక్కకోసం కొట్లాడితే... కోతి ఎత్తకుపోయినట్టు ధరణి పేదల భూములు లాక్కుందని మండిపడ్డారు.
-
అసెంబ్లీకి వచ్చినా సభ లోపలకి వెళ్లని కేటీఆర్
సభలో బీఆర్ఎస్ సభ్యుల ఆందోళన చేపట్టారు. అసెంబ్లీకి వచ్చినా కేటీఆర్ సభ లోపలకి వెళ్లలేదు. బీఆర్ఎస్ఎల్పీ కార్యాలయంలోనే కేటీఆర్ ఉన్నారు.
-
ఏసీబీ కేసు పెట్టిన తర్వాత సభలో చర్చ చేయరు- ఎమ్మెల్యే రేవూరి ప్రకాశ్ రెడ్డి
గవర్నర్ అనుమతి ఇచ్చి ఏసీబీ కేసు పెట్టిన తర్వాత సభలో చర్చ చేయరని ఎమ్మెల్యే రేవూరి ప్రకాశ్ రెడ్డి అన్నారు. చర్చకు సంబంధించిన అంశం సభలో ఉత్పన్నం కాదన్నారు.
-
బిల్లు పై చర్చ జరిగిన తర్వాత చూద్దాం - స్పీకర్
బిల్లు పై చర్చ జరిగిన తర్వాత చూద్దామన్నారు స్పీకర్ గడ్డం ప్రసాద్ అన్నారు. ఒక సభ్యుడి కోసం సభ సమయం వృథా చేయొద్దన్నారు.
-
ఒక ఎంఎల్ఏ మీద అక్రమ కేసు పెట్టారు - హరీష్ రావు
ఒక ఎంఎల్ఏ మీద అక్రమ కేసు పెట్టారని మాజీ మంత్రి హరీష్ రావు అన్నారు. వెంటనే చర్చ చేయండి అన్నారు. సభ జరుగుతున్నప్పుడు సభలో సభ్యుడు చెప్పుకునే వేసులు బాటు ఇవ్వండి అని తెలిపారు.
-
హరీష్ ..మంత్రులు లేరు అనేది అవాస్తవం - పొంగులేటి
హరీష్ ..మంత్రులు లేరు అనేది అవాస్తవం అని పొంగులేటి మంత్రి శ్రీనివాస్ రెడ్డి అన్నారు. నేను మంత్రి లాగ కనిపించడం లేదేమో అన్నారు.
-
ఈ ఫార్మా రేసింగ్ పై కేటీఆర్ నీ అప్రదిష్ట పాలు చేయడానికి కుట్ర- హరీష్
ఈ ఫార్మా రేసింగ్ పై కేటీఆర్ నీ అప్రదిష్ట పాలు చేయడానికి కుట్ర చేస్తుందని మాజీ మంత్రి హరీష్ రావు అన్నారు. మేము తప్పు చేస్తే... సభలో ప్రజలకు చెప్పండి అని తెలిపారు. మేము కూడా ప్రజలకు చెప్తామన్నారు. మాకు హామీ ఇవ్వండి... చర్చ జరగనిస్తం అన్నారు.
-
ప్రభుత్వ బిల్లులు ఉన్నాయి .. ముందు దానిపై చర్చ చేద్దాం- స్పీకర్
ప్రభుత్వ బిల్లులు ఉన్నాయి.. ముందు దానిపై చర్చ చేద్దామని స్పీకర్ అన్నారు. మీరు అడిగేది వ్యక్తికి సంబంధించినది అన్నారు. బిల్లు రాష్ట్రానికి సంబంధించినది అన్నారు స్పీకర్.
-
అసెంబ్లీ ప్రారంభం
అసెంబ్లీ ప్రారంభమైంది. ఇవాళ ఉదయం 10 గంటలకు అసెంబ్లీ సమావేశాలు ప్రారంభమయ్యాయి. ఈ ఫార్మా రేసింగ్ పై చర్చ చేయాలని సభలో బీఆర్ఎస్ సభ్యుల డిమాండ్.
-
నేతల మధ్య మాటల యుద్ధం..
మంత్రి శ్రీధర్ బాబు దొంగ దొంగ అని ఐదు సార్లు అన్నారని హరీష్ రావు అన్నారు. మంత్రి శ్రీధర్ బాబు క్షమాపణ చెబుతారా అని హరీష్ పేర్కొన్నారు. ఎవ్వరు అలా అన్నా క్షమాపణ చెప్పాల్సిందేనని మంత్రి శ్రీధర్ బాబు తెలిపారు. ఆస్తులు అమ్మడం లేదని ఆర్థికమంత్రి చెప్పారు.. రంగారెడ్డి జిల్లాలో ప్రభుత్వ భూములు అమ్మారు..
ఎకరం 75 కోట్లకు అమ్మామని జీవోలోనే చెప్పారని హరీష్ రావు అన్నారు. అందుకు బదులుగా మంత్రి పొంగులేటి మాట్లాడుతూ.. మీరు అమ్మిన దానితో పోలిస్తే మేం అమ్మినది ఎంత..? అని కౌంటర్ ఇచ్చారు. తాము ఒక్క గజం అమ్మామని చూపండని అన్నారు. టీజీఐఐసీకి భూమి ఫ్రీగా ఇచ్చారా చెప్పండని హరీష్ రావు ప్రశ్నించారు.మీలాగా ధరణి పేరుతో భూములు ఎలా దోచుకోవాలో తమకు తెలియదని మంత్రి పొంగులేటి అన్నారు. రెవిన్యూ భూములను టీజీఐఐసీకి ఇస్తే అమ్ముకోవడం అవుతుందా..? డిప్యూటీ సీఎం భట్టి విక్రమార్క ప్రశ్నించారు. ఓఆర్ఆర్‌ను మీలాగా చేస్తే అమ్మేసినట్టు అవుతుందా అని అన్నారు. భూములను అమ్మకానికి పెడితే ఆక్షన్ అవుతుంది కదా అని మంత్రి శ్రీధర్ బాబు తెలిపారు. భూములను తాము అమ్మనేలేదని.. కానీ అమ్మమని హరీష్ రావు చెబుతున్నారన్నారు శ్రీధర్ బాబు. మరోవైపు.. తాము మెస్ ఛార్జీలు పెంచలేదని ఆర్థికమంత్రి అన్నారు.. దీనిపై తాను ఛాలెంజ్‌కు సిద్ధమని హరీష్ రావు తెలిపారు. తాను రాజీనామా లేఖను స్పీకర్ ఫార్మాట్‌లో ఇస్తానన్నారు. భట్టి విక్రమార్క రాజీనామా చేస్తారా అని అన్నారు.
-
హరీష్ వ్యాఖ్యలపై సభలో గందరగోళం..
హరీష్ వ్యాఖ్యలపై సభలో గందరగోళం నెలకొంది. హరీష్ రావు వ్యాఖ్యలను స్పీకర్ రికార్డుల నుంచి తొలగించారు. గత ప్రభుత్వం రైతులకు ఇన్సూరెన్స్ డబ్బులు కట్టలేదని భట్టి అన్నారు.. అది అబద్ధం అని హరీష్ రావు తెలిపారు. మరోవైపు.. హరీష్ వ్యాఖ్యలపై ఎమ్మెల్యే రాజగోపాల్ రెడ్డి అభ్యంతరం వ్యక్తం చేశారు. బ్రహ్మాండంగా ప్రభుత్వాన్ని నడుపుతుంటే జీర్ణించుకోలేక అలా మాట్లాడుతున్నారని అన్నారు. హరీష్ రావు క్షమాపణ చెప్పాలి.. హరీష్ లాంటి వాళ్లు మాట్లాడాల్సిన మాటలు కావని రాజగోపాల్ రెడ్డి తెలిపారు.
-
నన్ను దొంగ అంటే యూజ్ లెస్ ఫెలో అనే అంటాను- హరీష్ రావు..
కాంగ్రెస్ తీరు అబద్ధాలు పదే పదే చెప్పు అన్నట్లుగా ఉంది- హరీష్ రావు
అబద్ధమే చెప్పు.. నిజం చెప్పకు అన్నట్లుగా కాంగ్రెస్ తీరు ఉంది- హరీష్ రావు
గ్యారెంటీల కాలం హరీష్ రావు ఆర్థిక మంత్రిగా ఉన్నప్పుడే వచ్చింది- భట్టి
అది ఎందుకు వచ్చిందో చెప్పండి- భట్టి
నన్ను దొంగ అన్న యూజ్ లెస్ ఫెలో ఎవరు- హరీష్ రావు
నన్ను దొంగ అంటే యూజ్ లెస్ ఫెలో అనే అంటాను- హరీష్ రావు.
-
స్పీకర్ అనుమతితో సభలో చర్చ పెట్టాం- మంత్రి శ్రీధర్ బాబు..
మేము సభ స్పీకర్ అనుమతితో సభలో చర్చ పెట్టాం- మంత్రి శ్రీధర్ బాబు
అప్పుడప్పుడు కమ్యునికేషన్ గ్యాప్ వస్తుంది- మంత్రి శ్రీధర్ బాబు
అప్పుల అంశం ఇంపార్టెంట్ అని తీసుకున్నాం- మంత్రి శ్రీధర్ బాబు
వద్దు అనుకుంటే... వదిలేద్దాం- మంత్రి శ్రీధర్ బాబు.
-
ఆర్థిక చర్చపై అక్బరుద్దీన్ అభ్యంతరం..
ఆర్థిక చర్చపై అక్బరుద్దీన్ అభ్యంతరం..
ఏ అంశం చేపడుతున్నారో ముందుగా సభ్యులకు సమాచారం ఇవ్వాలి- అక్బరుద్దీన్
సభ ఎన్ని రోజులు నడుపుతారో ఇప్పటికీ తెలియదు- అక్బర్
పార్లమెంట్లోనైతే సభ ఎన్ని రోజులో ముందే చెప్పేస్తారు- అక్బర్
సభను నడిపే విధానం ఇది కాదు- హరీష్ రావు
అజెండా ఏంటో చెప్పడం లేదు- హరీష్
పది నిమిషాల ముందు చెబితే ఎలా- హరీష్ రావు
ప్రాధాన్యత అంశాలపై ప్రభుత్వం చర్చకు తీసుకుంటుంది- శ్రీధర్ బాబు
అప్పులపై చర్చ మీరు వద్దంటే ఆపేస్తాం- శ్రీధర్ బాబు
-
ఇది మా కమిట్మెంట్: డిప్యూటీ సీఎం భట్టి
'పదేళ్లు భోజనం సప్లై చేసే కాంట్రాక్టర్లకు కూడా బిల్లులు ఇవ్వలేదు. పిల్లలకి ముక్కిపోయిన బియ్యం సరఫరా చేశారు. బిడ్డల భవిష్యత్తు రాష్ట్ర భవిష్యత్తు అని భావించే మేము మేస్ చార్జీలను పెంచాము, కాస్మొటిక్ చార్జీలు పెంచాము. ఇది మా కమిట్మెంట్' అని శాసన సభలో తెలంగాణ డిప్యూటీ సీఎం భట్టి విక్రమార్క అన్నారు.
-
రూ.24 కోట్లకు పైగా అప్పులు తీర్చాం:
రూ.12,117 కోట్లను కాంగ్రెస్ ప్రభుత్వం వడ్డీలు, అప్పుల పేరిట కట్టిందని డిప్యూటీ సీఎం భట్టి విక్రమార్క తెలిపారు. 'రూ.24 కోట్లకు పైగా అప్పులు తీర్చాం. మార్చి నుంచి ఇప్పటి వరకు మొదటి తేదీనే ఉద్యోగులకు జీతాలు ఇస్తున్నాం. మేము అధికారంలోకి వచ్చినప్పుడు ఆర్థిక పరిస్థితిపై శ్వేత పత్రం విడుదల చేశాం. మొత్తం అప్పు 6 లక్షల 71 వేల కోట్లు ఉంది. ఏడాదిలో మీరు అప్పులు చేశారంటూ సభ్యులు ప్రశ్నించారు. హరీష్ రావు ఆందోళన చెందుతూ సభలో, బయట మాట్లాడుతున్నారు. నేను చెప్పే వివరాలు తప్పని ఆర్బిఐ పేరుతో కొన్ని పత్రాలు చూపిస్తున్నారు. ఉన్నవి లేనట్టు, లేనివి ఉన్నట్లు చెప్పడం హరీష్ రావుకు వెన్నతో పెట్టిన విద్య' అని భట్టి విమర్శించారు.
-
సీఎం వైఖరిని నిరసిస్తూ వాకౌట్ చేశాం:
'శాసనమండలిలో ముఖ్యమంత్రి వైఖరి నిరసిస్తూ వాకౌట్ చేశాం. సలహాదారులు పేరుతో లక్షలాది రూపాయలు ఖర్చు చేస్తున్నారని గతంలో కామెంట్ చేసిన సీఎం నేడు సలహదారులను పెట్టుకున్నారు. ముఖ్యమంత్రి ద్వంద్వ వైఖరి నిరసిస్తూ వాకౌట్ చేస్తున్నాము. భూ భారతి మీద అసెంబ్లీలో చర్చ చేస్తున్నారు. చట్ట సభలో ఆమోదం తెలుపకముందే ప్రకటనలు ఇస్తున్నారు. చట్ట సభలంటే గౌరవము లేకుండా పోయింది' అని శాసనమండలి మీడియా పాయింట్ మధుసూదన చారి మండిపడ్డారు.
-
అంబేడ్కర్‌ విగ్రహం వద్ద కాంగ్రెస్ ధర్నా:
తెలంగాణ అసెంబ్లీ ప్రాంగణంలో అంబేడ్కర్‌ విగ్రహం వద్ద కాంగ్రెస్ ధర్నా చేస్తోంది. పీసీసీ చీఫ్‌ మహేశ్‌ కుమార్‌ గౌడ్‌ ఆధ్వర్యంలో కాంగ్రెస్ ఎమ్మెల్యేలు, ఎమ్మెల్సీలు ధర్నా చేస్తున్నారు. మంత్రులు పొన్నం ప్రభాకర్‌, జూపల్లి కృష్ణారావు ఆందోళనలో పాల్గొన్నారు. అంబేడ్కర్‌పై అమిత్‌ షా వ్యాఖ్యలకు నిరసనగా కాంగ్రెస్ ధర్నా చేస్తోంది. అమిత్‌ షా క్షమాపణలు చెప్పాలంటూ డిమాండ్ చేస్తూ కాంగ్రెస్ ఆందోళన చేపట్టింది.
-
హక్కుల ఉల్లంఘన నోటీసు:
శాసనసభ ఆమోదం పొందని భూ భారతి బిల్లును రాష్ట్ర ప్రభుత్వం చట్టంగా ప్రకటించిందని బీఆర్ఎస్ అంటోంది. ప్రజలను తప్పుదోవ పట్టించారంటూ.. సభా హక్కుల ఉల్లంఘన నోటీసును బీఅర్ఎస్ శాసనసభ పక్షం ఇచ్చింది. శాసనసభా హక్కులను కాపాడాలంటూ స్పీకర్‌కు వినతి పత్రం ఇచ్చారు.
-
ఆకుపచ్చ కండువాలతో మండలి:
'నాడు రైతులకు రుణమాఫీ చేస్తాను అని సీఎం రేవంత్ రెడ్డి దేవుళ్ల సాక్షిగా హామీ ఇచ్చారు. ఆ హామీని నెరవేర్చనందుకు ఈ రోజు ఆకుపచ్చ కండువాలతో మండలికి వచ్చాము. హామీని నెరవేర్చనందుకు మీ ద్వారా మా నిరసన తెలియజేస్తున్నాము' అని ఎమ్మెల్సీ కవిత తెలిపారు.
-
పరిష్కారం కూడా చూపండి: ఎమ్మెల్సీ కవిత
తెలంగాణ రాష్ట్రం ఏర్పడిన తర్వాత పరిపాలన సౌలభ్యం కోసం కొత్త జిల్లాలు ఏర్పాటు చేసుకున్నామని ఎమ్మెల్సీ కవిత అన్నారు. 'ఉద్యోగుల సమస్యల పరిష్కారం కోసం 317 జీవో తెచ్చుకున్నాము. 317 జీవో వల్ల సమస్యలు ఉన్నాయి అని చెబుతున్నారు. సమస్యలు ఉన్నాయి అని చెప్పడమే కాకుండా.. పరిష్కారం కూడా చూపండి. కాంగ్రెస్ ప్రభుత్వం వచ్చి ఏడాది అవుతుంది. మీరు ఎం చేస్తున్నారు?, ఇంకా మమ్మల్ని పాయింటవుట్ చేయడం హాస్యాస్పదంగా ఉంది' అని కవిత అన్నారు.
-
బీఆర్ఎస్ వాళ్లు రోజుకో బాగోతాలు వేస్తున్నారు:
బీఆర్ఎస్ వాళ్లు రోజుకో బాగోతాలు వేస్తున్నారు అని ఎమ్మెల్యే మందుల శామ్యూల్ ఫైర్ అయ్యారు. ఇసుక దోపిడీ, భూములు దోపిడీ చేసి ఇవాళ వేషాలు వేస్తున్నారన్నారని విమర్శించారు. ఆటోలో వచ్చి.. ఎంత మంది ఆటో వాళ్లకు మేలు చేశారు? అని ఎద్దేవా చేశారు. ఆర్టీసీ కార్మికులు 34 మంది చనిపోవడానికి కారణం మీరు కాదా? అని ప్రశ్నించారు.
-
హరీశ్‌రావు vs కోమటిరెడ్డి:
సభలో మంత్రి కోమటిరెడ్డి వెంకట్‌ రెడ్డి, ఎమ్మెల్యే హరీశ్‌ రావు మధ్య వాడీవేడి సంభాషణ సాగింది. హరీశ్‌ రావు డిప్యూటీ లీడరా? ఎమ్మెల్యేనా?.. ఏ హోదాలో మాట్లాడుతున్నారు? అని కోమటిరెడ్డి ప్రశ్నించారు. ప్రతిపక్ష నేత ఏడాదిగా సభకు రాకపోవడం సభకే కాదు.. తెలంగాణ ప్రజలను అవమానపరచడమే అని కోమటిరెడ్డి మండిపడ్డారు.
-
అసెంబ్లీని ముట్టడించిన మాల మహానాడు ప్రతినిధులు:
మాల మహానాడు ప్రతినిధులు అసెంబ్లీని ముట్టడించారు. వారిని పోలీసులు అరెస్టు చేశారు. అసెంబ్లీలో మాదిగ కులస్తులకు మద్దతుగా సీఎం రేవంత్ వ్యాఖ్యలకు నిరసనగా మాల మహానాడు ప్రతినిధులు ముట్టడించారు.
-
సీఎం మా జిల్లాకు అండగా ఉన్నారు:
సభలో మంత్రి కోమటిరెడ్డి వెంకటరెడ్డి మాట్లాడుతున్నారు. 'నల్గొండలో ఎమ్మెల్యే, ఎంపీగా పోటీ చేసిన మా వాళ్లు భారీ మెజార్టీతో గెలిచారు. గత ప్రభుత్వం నల్గొండ జిల్లాను పట్టించుకోలేదు. గందమల్ల రిజర్వాయర్ పనులు పక్కన పెట్టారు. సీఎం రేవంత్ రెడ్డి మా జిల్లాకు అండగా ఉన్నారు. ఆయనకు ధన్యవాదాలు' అని కోమటిరెడ్డి అన్నారు.
-
ఫ్లకార్డుల ప్రదర్శన వద్దు:
సభ నియమాలు పాటించాలని సభ్యులను స్పీకర్ కోరారు. ఫ్లకార్డుల ప్రదర్శన వద్దని, మనం రూపొందించుకున్న నిబంధనలు మనమే ఉల్లంగించవద్దన్నారు.
-
అసెంబ్లీకి ఆకుపచ్చ కండువాలతో బీఆర్ఎస్ ఎమ్మెల్యేలు:
రైతాంగ సమస్యలపై రైతు కండువాలు వేసుకొని బీఆర్ఎస్ ఎమ్మెల్యేలు అసెంబ్లీలోకి వచ్చారు. రైతు రుణమాఫీ, రైతు భరోసా, బోనస్‌పై అసెంబ్లీలో ప్రభుత్వాన్ని నిలదీయాలని ఎమ్మెల్యేలు నిర్ణయించుకున్నారు.
-
బీజేపీ వాయిదా తీర్మానం:
అసెంబ్లీ సమావేశాలు ఐదో రోజుకు చేరుకున్నాయి. 317 జీవో, ఉద్యోగులను సొంత జిల్లాలకు పంపే అంశంపై శాసనసభలో బీజేపీ వాయిదా తీర్మానం కోరింది.
-
శాసన మండలి ప్రారంభం:
తెలంగాణ శాసన మండలి ప్రారంభమైంది. సభలో ప్రశ్నోత్తరాలు కొనసాగుతున్నాయి.
-
అసెంబ్లీకి చేరుకున్న సీఎం రేవంత్ రెడ్డి:
సీఎం రేవంత్ రెడ్డి అసెంబ్లీకి చేరుకున్నారు. అసెంబ్లీ కమిటీ హల్లో కాసేపట్లో ఎమ్మెల్యే, ఎమ్మెల్సీలతో సీఎం సమావేశం కానున్నారు.
-
అసెంబ్లీలో బీఆర్ఎస్ వాయిదా తీర్మానం:
రాష్ట్రంలోని రైతులకు పూర్తిగా రుణ మాఫీ చేయాలని, పంట సాయం రూ.15 వేలు ఇచ్చే అంశంపై చర్చించాలని అసెంబ్లీలో బీఆర్ఎస్ వాయిదా తీర్మానం కోరనుంది.
-
ఎడ్ల బండిపై అసెంబ్లీకి ఎమ్మెల్యేలు:
బీజేపీ ఎమ్మెల్యేలు ఎడ్ల బండిపై అసెంబ్లీకి రానున్నారు. రైతు హమీలు అమలు చేయలేదని నిరసనగా ఎడ్ల బండిపై అసెంబ్లీకి వస్తున్నారు. ఇన్‌కమ్‌ ట్యాక్స్‌ ఆఫీస్‌ నుంచి ఎడ్ల బండిపై అసెంబ్లీకి రానున్నారు. నిన్న రైతు హామీలపై చర్చించాలని వాయిదా తీర్మానం బీజేపీ కోరగా.. ఆ తీర్మానాన్ని స్పీకర్ తిరస్కరించారు.
-
గంట ముందుగానే అసెంబ్లీకి సీఎం:
అసెంబ్లీ కమిటీ హాల్‌లో ఎమ్మెల్యే, ఎమ్మెల్సీలతో సీఎం రేవంత్ భేటీ నిర్వహించనున్నారు. గంట ముందుగానే అసెంబ్లీకి రానున్న సీఎం.. కీలకాంశాలపై సభ్యులకు దిశానిర్దేశం చేయనున్నారు. ఇవాళ అసెంబ్లీలో భూ భారతి, రైతు భరోసాపై చర్చ జరగనుంది.
-
నాలుగు ప్రభుత్వ బిల్లులు:
నేడు అసెంబ్లీలో నాలుగు ప్రభుత్వ బిల్లులతో సహా భూభారతి బిల్లుపై చర్చ కొనసాగనుంది. తెలంగాణ మున్సిపాలిటీ సవరణ బిల్లు, గ్రేటర్ హైదరాబాద్‌ మున్సిపల్ కార్పొరేషన్‌ బిల్లు, తెలంగాణ పంచాయతీరాజ్ సవరణ బిల్లులను ప్రభుత్వం ప్రవేశపెట్టనుంది. నేడు అసెంబ్లీలో ప్రభుత్వ అప్పులు, చెల్లింపులపై సహా రైతు భరోసాపై చర్చ జరగనుంది.