Spirit: ‘స్పిరిట్’లో చిరంజీవి, డాన్ లీ ఉన్నారా..?

Spirit: రెబల్ స్టార్ ప్రభాస్, సెన్సేషనల్ డైరెక్టర్ సందీప్ రెడ్డి వంగా కాంబినేషన్‌లో రాబోతున్న భారీ యాక్షన్ చిత్రం ‘స్పిరిట్’ (Spirit). ‘యానిమల్’ వంటి ఇండస్ట్రీ హిట్ తర్వాత సందీప్ తెరకెక్కిస్తున్న ప్రాజెక్ట్ కావడంతో ఈ సినిమాపై దేశవ్యాప్తంగా భారీ అంచనాలు నెలకొన్నాయి. గత కొద్ది రోజులుగా ఈ చిత్రంలో అంతర్జాతీయ కొరియన్ స్టార్ డాన్ లీ (Ma Dong-seok) విలన్‌గా నటిస్తున్నారని, అలాగే మెగాస్టార్ చిరంజీవి ఓ కీలక అతిథి పాత్రలో కనిపిస్తారంటూ సోషల్ మీడియాలో పెద్ద ఎత్తున ప్రచారం సాగింది. ఈ ప్రచారాలపై తాజాగా ‘స్పిరిట్’ సహ నిర్మాత, సందీప్ రెడ్డి వంగా సోదరుడు ప్రణయ్ రెడ్డి వంగా NTVతో జరిగిన పాడ్‌కాస్ట్ ఇంటర్వ్యూలో క్లారిటీ ఇచ్చారు.

డాన్ లీ క్యాస్టింగ్ రూమర్లపై ప్రణయ్ స్పందిస్తూ.. “డాన్ లీని ప్రాజెక్ట్‌లోకి తీసుకురావాలని ప్రారంభంలో ఆలోచించాం. కానీ ‘స్పిరిట్’ అనేది పక్కా లోకల్ హైదరాబాద్ బ్యాక్‌డ్రాప్ స్టోరీ. కథలోని ఎమోషన్, పాత్రల సహజత్వం దెబ్బతినకుండా ఉండాలంటే బయటి వ్యక్తుల కంటే ఇక్కడి నేటివిటీకి సరిపోయే నటులే అవసరం. సందీప్ ఎప్పుడూ కథకు, స్క్రిప్ట్‌కు ఏది అవసరమో దానికి మాత్రమే ప్రాధాన్యత ఇస్తారు తప్ప, కేవలం హైప్ కోసం స్టార్లను ఇరికించరు” అని స్పష్టం చేశారు.

ఇది ఇలా ఉండగా మరోవైపు మెగాస్టార్ చిరంజీవి కూడా ఈ సినిమాలో నటిస్తున్నారంటూ వస్తున్న వార్తలను ఆయన కొట్టిపారేశారు. ఈ ప్రచారాలన్నీ కేవలం ఊహాగానాలేనని, స్క్రిప్ట్ డిమాండ్ చేసిన పాత్రలకు మాత్రమే సరైన నటీనటులను లాక్ చేస్తున్నామని వివరించారు. సందీప్ రెడ్డి వంగా దర్శకత్వంతో పాటు ఎడిటింగ్, మ్యూజిక్, ప్రొడక్షన్ ఖర్చులపై పూర్తి నియంత్రణ కలిగిన దర్శకుడని ప్రణయ్ తెలిపారు. ఎక్కడా రూపాయి వృథా కాకుండా పక్కా ప్లానింగ్‌తో ‘స్పిరిట్’ చిత్రీకరణను జరుపుతున్నామని, ఈ చిత్రం ప్రభాస్ అభిమానులకు సరికొత్త యాక్షన్ విందును అందించనుందని ధీమా వ్యక్తం చేశారు. ఈ స్పష్టతతో గత కొద్ది రోజులుగా డాన్ లీ మరియు చిరంజీవి ఎంట్రీపై జరుగుతున్న రూమర్లకు అధికారికంగా తెరపడింది.