Simran Choudhary: సారధి స్టూడియోలో ఘనంగా ప్రారంభమైన సిమ్రాన్ చౌదరి కొత్త సినిమా!

Simran Choudhary New Movie Starts Today: యువ కథానాయకుడు అవినాష్‌ తిరువీధుల, సిమ్రాన్‌ చౌదరి జంటగా ఓ సినిమా తెరకెక్కుతోంది. కార్తి దర్శకత్వం వహిస్తున్న ఈ చిత్రంను సిల్వర్‌స్క్రీన్‌ సినిమాస్‌ ఎల్‌ఎల్‌పి బ్యానర్‌పై శాంతనూపతి, ఆలపాటిరాజా, అవినాష్‌ బుయాని, అంకిత్‌ రెడ్డిలు నిర్మిస్తున్నారు. ప్రముఖ రచయిత సాయిమాధవ్‌ బుర్రా స్క్రిప్ట్‌, డైలాగ్స్‌ అందిస్తున్నాడు. ఈ చిత్రం హైదరాబాద్‌లోని సారధి స్టూడియోలో నేడు పూజా కార్యక్రమాలతో ఘనంగా ప్రారంభం అయింది. హీరో, హీరోయిన్‌లపై చిత్రీకరించిన తొలి సన్నివేశానికి ప్రముఖ నిర్మాత టిజి విశ్వప్రసాద్‌ కెమెరా స్విచ్ఛాన్‌ చేయగా.. డైరెక్టర్ బాబీ ఫస్ట్‌ షాట్‌కు దర్శకత్వం వహించారు. ఇక హైదరాబాద్‌ సిటీ పోలీస్‌ కమీషనర్‌ శ్రీనివాసరెడ్డి క్లాప్‌ కొట్టారు.

పూజా కార్యక్రమం అనంతరం జరిగిన మీడియా సమావేశంలో నిర్మాతల్లో ఒకరైన శాంతనూపతి మాట్లాడుతూ… ‘మంచి సినిమా తీయాలనే కోరికతో అమెరికా నుంచి వచ్చాము. దాదాపు 4 సంవత్సరాలకు పైగా ప్రయత్నం చేస్తున్నాం. మధ్యలో కరోనా వల్ల చాలా టైం వేస్ట్‌ అయ్యింది. దాదాపు 30 కథలు దాకా విన్నాము. మా రైటర్‌ విశ్వజిత్‌ చెప్పిన ఈ లైన్‌ బాగా నచ్చింది. దీనికి తోడు సాయిమాధవ్‌ బుర్రా గారు మా సినిమాకు డైలాగ్స్‌ రాయడం మరింత ప్లస్‌ అవుతుంది. మంచి హిట్‌ సినిమాకు కావాల్సినవి అన్నీ ఇందులో ఉన్నాయి. మంచి టెక్నీషియన్స్‌ కుదిరారు’ అన్నారు.

దర్శకుడు కార్తి మాట్లాడుతూ… ‘ఇది నాకు తొలి సినిమానే అయినా మంచి కథ, ఆర్టిస్ట్‌లు, టెక్నీషియన్‌లు దొరకడం వల్ల చాలా నమ్మకంగా ఉన్నాను. ఫస్ట్‌ సినిమాకే టాప్‌ టెక్నీషియన్స్‌ సెట్‌ అవడం నా లక్‌గా భావిస్తున్నా. కొత్తదనం కోరుకునే ప్రేక్షకులకు ఇది ట్రీట్‌ లాంటిది. జూన్ 10వ తేదీ నుంచి రెగ్యులర్‌ షూటింగ్‌ ప్రారంభం అవుతుంది. మొత్తం 3 షెడ్యూల్స్‌ ఉంటాయి. నన్ను నమ్మి ఇంతమంచి అవకాశం ఇచ్చిన నిర్మాతలకు థ్యాంక్స్‌’ అని తెలిపారు.

Also Read: India vs Pakistan: సూర్యకుమార్‌ కాదు.. అతడు ఉండటమే టీమిండియాకు ప్లస్‌!

హీరో అవినాష్‌ మాట్లాడుతూ… ‘సినిమాలంటే నాకు చాలా పిచ్చి. నేను చదువుకు కేటాయించిన సమయం కన్నా.. సినిమాల్లో గడిపిన సమయమే ఎక్కువ. నిర్మాతలు నాకు చాలా క్లోజ్‌ ఫ్రెండ్స్‌. మంచి కథ సెట్‌ అవడం, దానికి టాప్‌ టెక్నీషియన్‌లు పని చేస్తుండడం మా యూనిట్‌ అదృష్టంగా భావిస్తున్నా. తప్పకుండా హిట్‌ ఫిల్మ్‌ ఇస్తాం’ అని పేర్కొన్నారు. హీరోయిన్‌ సిమ్రాన్ చౌదరి మాట్లాడుతూ… ‘మరో మంచి సినిమాలో నాకు అవకాశం ఇచ్చిన దర్శక, నిర్మాతలకు థ్యాంక్స్‌. నా క్యారెక్టర్‌కు మంచి స్కోప్‌ ఉంది’ చెప్పుకొచ్చారు.

రచయిత విశ్వజిత్‌ మాట్లాడుతూ… ‘ఈ లైన్‌ ఓకే అవ్వగానే సినిమా స్టార్ట్‌ చేయలేదు. రియాల్టీ చెక్‌ కోసం 6 జిల్లాల నుంచి వివిధ వర్గాలకు చెందిన దాదాపు 150 మందిని సెలక్ట్‌ చేసి.. వారికి కథ చెప్పగా అందరూ చాలా బావుంది అని ఫీడ్‌బ్యాక్‌ ఇచ్చారు. ఆ తర్వాత పలు వర్క్‌ షాప్‌లు నిర్వహించి కాన్ఫిడెంట్‌గా షూటింగ్‌కు వెళ్తున్నాం’ చెప్పారు. పూజ కార్యక్రమానికి నిర్మాతలు అంబిక కృష్ణ, దామోదర ప్రసాద్‌, తుమ్మలపల్లి, తాండూర్‌ ఎమ్మెల్యే మనోహర్‌రెడ్డి, ఎమ్మెల్సీ మహేష్‌ నాయుడులతో పాటు పలువురు సినీ, రాజకీయ రంగ ప్రముఖులు హాజరయ్యారు.