Saurav Das: ‘‘ఢిల్లీలో ఉంటున్నట్లు ఆధారాలేవి?’’ CJP నేతకు కోర్టు ఆదేశం

Saurav Das: కాక్రోచ్ జనతా పార్టీ (CJP) కో-కన్వీనర్ సౌరవ్ దాస్‌‌కు స్పెషల్ ఎగ్జిక్యూటివ్ మెజిస్ట్రేట్(SEM) కోర్టులో చుక్కెదురైంది. ‘‘శాంతి ఒప్పందం’’ దాఖలు ప్రక్రియ సందర్బంగా ఢిల్లీలో సౌరవ్ దాస్ నివాసానికి సంబంధించిన రుజువుల్ని సమర్పించాలని కోర్టు ఆదేశించింది. సౌరవ్ దాస్, అశుతోష్ రాంకాలు కొన్ని రోజుల క్రితం షరతులతో కూడిన బెయిల్‌పై విడుదలయ్యారు. అక్టోబర్ 10న వీరిద్దరు సంతకం చేసిన పీస్ బాండ్‌ను ఉల్లంఘించి, ఆంక్షలు ఉన్నప్పటికీ జంతర్ మంతర్ వద్దకు వెళ్లి నిరసన తెలిపారు. అక్టోబర్ 13న వీరిద్దర్ని పోలీసులు అదుపులోకి తీసుకున్నారు. కోర్టు వీరిద్దరికి జ్యుడీషియల్ రిమాండ్ విధించింది. 7 రోజుల తర్వాత బెయిల్‌పై విడుదలయ్యారు.

ఈ నేపథ్యంలో ఢిల్లీలో సౌరవ్ దాస్ నివాసానికి సంబంధించిన రుజువుల్ని కోర్టు కోరింది. శనివారం జరిగిన కోర్టు విచారణల్లో అద్దె ఒప్పందం, దస్తావేజు లేదా లీజుకు సంబంధించిన ఎలాంటి పత్రాలను కూడా సౌరవ్ దాస్ సమర్పించలేదని కోర్టు గుర్తించింది. దాస్, రాంకాలు ఇద్దరు తమ పూచీదారులతో కలిసి శనివారం కోర్టు ముందు హాజరయ్యారు. పత్రాల పరిశీలన కోసం కోర్టు ఈ కేసును నవంబర్ 17కు వాయిదా వేసింది.

ఇదిలా ఉంటే, నిరసనలకు సంబంధించిన కేసులో మరో నిందితురాలుగా ఉన్న ఆల్ ఇండియా స్టూడెంట్ అసోసియేషన్(AISA) నేత నేహా బోరాకు ఢిల్లీ హైకోర్టులో ఉపశమనం లభించలేదు. SEM కోర్టు ‘‘పీస్ బాండ్’’ పై సంతకం చేయాలని ఆదేశించిన ఉత్తర్వుల్ని సవాల్ చేస్తూ దాఖలు చేసిన పిటిషన్‌ను కొట్టివేసింది. దీని తర్వాత, తాను కోర్టులో శాంతి ఒప్పందం దాఖలు చేయనని స్పష్టం చేసింది. ఈ దేశంలో నిరసనల్ని అణచివేయడానికి ‘‘శాంతి ఒప్పందాన్ని’’ ఉపయోగించవచ్చని ఆమె ఆరోపించారు.