Sanju Samson: కోహ్లీ సలహాలు నేను పట్టించుకోను.. సంచలన వ్యాఖ్యలు చేసిన సంజూ శాంసన్..

భారత క్రికెట్‌లో అత్యుత్తమ ఫిట్‌నెస్, క్రమశిక్షణతో కూడిన జీవనశైలికి విరాట్ కోహ్లీ నిలువెత్తు నిదర్శనంగా నిలుస్తారు. ఎంతోమంది యువ ఆటగాళ్లకు ఆదర్శంగా నిలిచే కోహ్లీ లైఫ్‌స్టైల్‌ను అనుసరించే క్రమంలో తనకు ఎదురైన అనుభవాలను టీమిండియా స్టార్ వికెట్ కీపర్ బ్యాటర్ సంజూ శాంసన్ పంచుకున్నారు. అంతర్జాతీయ స్థాయిలో సుదీర్ఘకాలం విజయవంతంగా కొనసాగడానికి కావాల్సిన సలహాలను ఒకప్పుడు కోహ్లీని అడిగి తెలుసుకున్నట్లు సంజూ తెలిపారు. ఆటతో పాటు సరైన ఆహార అలవాట్లు, కఠినమైన జీవనశైలి పాటిస్తే కెరీర్ పూర్తిగా మారిపోతుందని కోహ్లీ తనకు సూచించారని చెప్పారు.

విరాట్ ఇచ్చిన ఆ సలహాను పాటిస్తూ దాదాపు ఏడాదిన్నర పాటు అత్యంత క్రమశిక్షణతో కూడిన డైట్‌ను అనుసరించానని, అయితే ఆ కఠినమైన విధానాన్ని ఎక్కువ కాలం కొనసాగించడం తన వల్ల కాలేదని సంజూ వెల్లడించారు. భారత జట్టులో చోటు కోసం ఉండే తీవ్రమైన పోటీ వాతావరణంపై స్పందిస్తూ, ఇకపై ఎలాంటి అనవసరమైన రేసులో పాల్గొనకూడదని నిర్ణయించుకున్నట్లు స్పష్టం చేశారు.

ప్రస్తుతం 31 ఏళ్ల వయసులో ఉన్న తన కెరీర్‌లో ఇంకా కొద్ది సంవత్సరాల క్రికెట్ మాత్రమే మిగిలి ఉందని, అందుకే ఎవరి ఒత్తిళ్లకు తలొగ్గకుండా తనకంటూ ఒక ప్రత్యేక శైలిని ఏర్పరుచుకున్నానని పేర్కొన్నారు. ఇతరుల పద్ధతులను గుడ్డిగా అనుకరించడం కంటే, తన నైజానికి తగ్గట్టుగా ఆటను పూర్తిగా ఆస్వాదిస్తూ ముందుకు సాగడమే తన ముందరి లక్ష్యమని సంజూ తేల్చి చెప్పారు. తన క్రికెట్ ప్రయాణాన్ని ఏ విధంగా మలుచుకోవాలో సొంతంగా నిర్ణయించుకునే స్వేచ్ఛ తనకే ఉందని సంజూ నమ్మకంగా వెల్లడించారు.