రష్యాలో ఘోర విషాదం చోటుచేసుకుంది. క్రిమియాలో రష్యా సైనిక విమానం కూలిపోయింది. బుధవారం తెల్లవారుజామున కొండను ఢీకొట్టడంతో ఏఎన్-26 సైనిక విమానం కూలిపోయింది. ఈ ఘటనలో 29 మంది ప్రాణాలు కోల్పోయారు. 23 మంది ప్రయాణికులు, ఆరుగురు సిబ్బంది దుర్మరణం చెందారు. ఈ మేరకు రక్షణ మంత్రిత్వ శాఖ తెలిపినట్లు రష్యా వార్తా సంస్థలు పేర్కొన్నాయి.
రష్యాకు చెందిన ఏఎన్-26 సైనిక విమానం మియా ద్వీపకల్పం మీదుగా ప్రాయాణిస్తోంది. అయితే ఈ విమానం 2014లో ఉక్రెయిన్ నుంచి స్వాధీనం చేసుకున్న నల్ల సముద్ర ద్వీపకల్పంలో కూలిపోయింది. కొండను ఢీకొట్టి కూలిపోయినట్లుగా తెలుస్తోంది. విమానంలో ఉన్న 23 మంది ప్రయాణికులు, ఆరుగురు సిబ్బంది అక్కడికక్కడే చనిపోయారు. అయితే ఈ ప్రమాదానికి సాంకేతిక లోపమే కారణంగా తెలుస్తోంది. అయితే ప్రమాదానికి గల కారణాలను మాత్రం రష్యా ఇంకా వెల్లడించలేదు.
మాస్కో కాలమానం ప్రకారం.. మార్చి 31న సుమారు 18:00 గంటలకు విమానం క్రిమియా ద్వీపకల్పం మీదుగా వెళ్తున్నట్లు సమాచారం. కొద్దిసేపటికే విమానంతో సంబంధాలు తెగిపోయినట్లుగా రక్షణ మంత్రిత్వ శాఖ తెలిపింది. వెంటనే సహాయక బృందం ఏఎన్-26 విమానం కూలిపోయిన ప్రదేశాన్ని గుర్తించింది. ఘటనా స్థలంలోనే ఆరుగురు సిబ్బంది, 23 మంది ప్రయాణికులు చనిపోయినట్లుగా మంత్రిత్వ శాఖ తెలిపింది. అయితే విమానంపై ఏదైనా దాడి జరిగినట్లుగా ఆనవాళ్లు కనిపించలేదు. దీంతో సాంకేతిక లోపమే ఈ ప్రమాదానికి కారణం అయి ఉండొచ్చని అధికారులు భావిస్తున్నారు. దీనిపై మరింత సమాచారం అందాల్సి ఉంది.
