RC 17: గ్లోబల్ స్టార్ రామ్ చరణ్, లెక్కల మాస్టర్ సుకుమార్ కాంబినేషన్‌లో రాబోతున్న మోస్ట్ అవైటెడ్ ప్రాజెక్ట్ ‘RC 17’పై సోషల్ మీడియాలో నిరంతరం ఆసక్తికర చర్చలు నడుస్తూనే ఉన్నాయి. ‘రంగస్థలం’ వంటి ఇండస్ట్రీ హిట్ తర్వాత వీరిద్దరి కలయికలో సినిమా ఖరారు కావడంతో అభిమానుల్లో భారీ అంచనాలు నెలకొన్నాయి.
అయితే, దసరా సందర్భంగా లేదా అక్టోబర్ 21న ఈ సినిమా పూజా కార్యక్రమాలు గుట్టుచప్పుడు కాకుండా సైలెంట్‌గా పూర్తయ్యాయంటూ నెట్టింట పెద్ద ఎత్తున ప్రచారం జరిగింది. కొత్త ఆఫీసులో మేకర్స్ లాంఛనంగా సినిమా ప్రారంభోత్సవం చేసేశారని వార్తలు గుప్పుమన్నాయి. కానీ, అసలు నిజం వేరే ఉంది.
తాజా సమాచారం ప్రకారం అక్కడ జరిగింది సినిమా ఓపెనింగ్ పూజ కాదని, కేవలం ఈ ప్రాజెక్ట్ కోసం ఏర్పాటు చేసిన నూతన కార్యాలయ (ఆఫీస్) ప్రారంభోత్సవం మాత్రమేనని స్పష్టమైంది. సినిమా ప్రీ ప్రొడక్షన్ పనుల నిమిత్తం సుకుమార్ టీమ్ ఈ కార్యాలయాన్ని ప్రారంభించింది. మైత్రీ మూవీ మేకర్స్ అత్యంత ప్రతిష్టాత్మకంగా నిర్మిస్తున్న ఈ చిత్రంలో సుకుమార్ రైటింగ్స్ కూడా నిర్మాణ భాగస్వామిగా వ్యవహరిస్తోంది. సినిమా గ్రాండ్ ఓపెనింగ్, రెగ్యులర్ షూటింగ్ ఎప్పుడు మొదలవుతుంది? ఇందులో నటించే ఇతర నటీనటులు, సాంకేతిక నిపుణులు ఎవరు? అనే వివరాలపై మూవీ టీమ్ త్వరలోనే అధికారికంగా స్పష్టత ఇవ్వనుంది. ప్రస్తుతానికైతే వైరల్ అవుతున్నట్లుగా సినిమా లాంఛింగ్ పూజ జరగలేదని, జరిగింది కేవలం ఆఫీస్ పూజ మాత్రమేనని విశ్వసనీయ వర్గాల సమాచారం.