Rajkummar Rao on Stree 2 Success: బాలీవుడ్‌ నటీనటులు రాజ్‌కుమార్‌ రావు, శ్రద్ధాకపూర్ జంటగా నటించిన మూవీ ‘స్త్రీ 2’. కామెడీ హారర్‌ ఫిల్మ్‌గా వచ్చిన ఈ చిత్రానికి అమర్‌ కౌశిక్ దర్శకత్వం వహించారు. ఆగస్టు 15న విడుదలైన ఈ చిత్రం బాక్సాఫీస్‌ వద్ద సంచలనం సృష్టిస్తోంది. ప్రస్తుతం బాలీవుడ్‌లో స్త్రీ 2 సినిమా గురించే అందరూ మాట్లాడుకుంటున్నారు. ఈ విజయంపై రాజ్‌కుమార్‌ రావు తాజాగా స్పందించారు. తమ అంచనాలకు మించి విజయం సాధించిందన్నారు. అలానే బాలీవుడ్‌లో తన ప్రయాణం గురించి చెప్పారు.
ఓ ఇంటర్వ్యూలో రాజ్‌కుమార్‌ రావు మాట్లాడుతూ… ‘ఈ స్టేటస్, గుర్తింపు ఒక్క రోజులో వచ్చినావి కావు. కెరీర్ ఆరంభంలో ఎన్నో కఠినమైన పరిస్థితులను ఎదుర్కొన్నా. కొన్నిసార్లు ప్రయాణం చేయడానికి డబ్బులు లేక 70 కిమీ సైకిల్‌పై వెళ్లేవాడిని. అవకాశాల కోసం స్టూడియోల చుట్టూ తిరిగాను. ఒక్కోసారి ఎవరిని కలవాలో కూడా తెలిసేది కాదు. నా కుటుంబం, ముఖ్యంగా మా అమ్మ నాకు తోడుగా నిలిచింది. వచ్చిన ప్రతీ అవకాశాన్ని వినియోగించుకుని.. నాకంటూ ప్రత్యేక గుర్తింపుతెచ్చుకున్నా. కామెడీ, డ్రామా, హారర్‌ యాక్షన్.. అన్ని జానర్‌లలో సినిమా చేయాలని కోరుకుంటున్నా. సవాలుగా అనిపించే పాత్రలు చేయాలి’ అని చెప్పారు.
Also Read: Gold Price Today: మగువలకు శుభవార్త.. హైదరాబాద్‌లో తులం ఎంతుందంటే?
‘స్త్రీ మొదటి భాగం మంచి హిట్ అయింది. దాంతో రెండో భాగంపై భారీ అంచనాలు ఏర్పడ్డాయి. దీన్ని దృష్టిలోపెట్టుకొని సినిమాను తెరకెక్కించాం. స్త్రీ 2 మా అంచనాలకు మించి విజయాన్ని సాధించింది. ఈ చిత్రాలకు ఎంతోమంది ఫాన్స్ ఉన్నారు. నేను కూడా స్త్రీ కథకు పెద్ద అభిమానిని. ఈ విజయంతో అందరం ఎంతో ఆనందంగా ఉన్నాం. మంచి కంటెంట్‌ ఉన్న సినిమాలను ప్రేక్షకులు ఎప్పుడూ ఆదరిస్తారని మరోసారి రుజువైంది’ అని రాజ్‌కుమార్‌ రావు ఆనందం వ్యక్తం చేశారు.