Hyderabad Traffic: ఐటీ ఉద్యోగులకు అలర్ట్.. ఏడాది పాటు ఈ ఏరియాల్లో ట్రాఫిక్ డైవర్షన్స్..

హైదరాబాద్ ఐటీ కారిడార్‌లో ప్రయాణించే వాహనదారులకు ముఖ్య గమనిక. గచ్చిబౌలి, ఐఐఐటీ జంక్షన్ పరిసరాల్లో ట్రాఫిక్ ఆంక్షలు విధిస్తూ సైబరాబాద్ పోలీసులు కీలక నిర్ణయం తీసుకున్నారు. దీనికి సంబంధించిన పూర్తి వివరాలు ఇలా ఉన్నాయి. భాగ్యనగరం శరవేగంగా విస్తరిస్తోంది. ముఖ్యంగా గచ్చిబౌలి, మాదాపూర్ వంటి ఐటీ కారిడార్ ప్రాంతాల్లో ట్రాఫిక్ రద్దీ రోజురోజుకూ పెరిగిపోతోంది. ఉదయం, సాయంత్రం వేళల్లో కిలోమీటర్ల మేర వాహనాలు నిలిచిపోవడంతో సాఫ్ట్‌వేర్ ఉద్యోగులు, సామాన్య ప్రజలు నరకయాతన అనుభవిస్తున్నారు. ఈ సమస్యకు శాశ్వత పరిష్కారం చూపాలనే పట్టుదలతో తెలంగాణ ప్రభుత్వం ‘స్ట్రాటజిక్ రోడ్ డెవలప్‌మెంట్ ప్లాన్’ (SRDP) కింద ఫ్లైఓవర్లు, అండర్ పాస్‌ల నిర్మాణాన్ని వేగవంతం చేసింది. ఇందులో భాగంగానే ఐఐఐటీ జంక్షన్ వద్ద కొత్త ప్రాజెక్టు పనులు మొదలయ్యాయి.

ఏడాది పాటు ట్రాఫిక్ మళ్లింపు..
నిర్మాణ పనులకు ఎటువంటి ఆటంకం కలగకుండా ఉండేందుకు ఐఐఐటీ జంక్షన్ పరిసరాల్లో ఏడాది కాలం పాటు ట్రాఫిక్ మళ్లింపులు (Traffic Diversions) అమలులో ఉంటాయని సైబరాబాద్ సీపీ డాక్టర్ ఎం. రమేశ్ ప్రకటించారు. ప్రతిరోజూ ఉదయం 8 గంటల నుంచి రాత్రి 9 గంటల వరకు ఈ ఆంక్షలు అమలులో ఉంటాయి.

Also Read:Hyderabad Traffic: ఐటీ ఉద్యోగులకు అలర్ట్.. ఏడాది పాటు ఈ ఏరియాల్లో ట్రాఫిక్ డైవర్షన్స్..

ప్రత్యామ్నాయ మార్గాలు ఇవే..
గచ్చిబౌలి నుంచి లింగంపల్లి వెళ్లే వారు… గచ్చిబౌలి జంక్షన్ నుంచి ఐఐఐటీ జంక్షన్ చేరుకున్నాక, నేరుగా వెళ్లకుండా విప్రో జంక్షన్ వైపు మళ్లాలి. అక్కడ కుడివైపునకు (Right Turn) తిరిగి గౌలిదొడ్డి, గోపన్‌పల్లి జంక్షన్, నల్లగండ్ల మీదుగా లింగంపల్లి చేరుకోవచ్చు.

కోకాపేట, గౌలిదొడ్డి నుంచి వచ్చే వారు… విప్రో జంక్షన్ మీదుగా ఐఐఐటీ వైపు వచ్చే వాహనాలు.. విప్రో జంక్షన్ వద్ద నానక్‌రాంగూడ రోటరీ-2 దగ్గర ఎడమవైపునకు తిరిగి, అవుటర్ రింగ్ రోడ్ (ORR) సర్వీస్ రోడ్డు మీదుగా గచ్చిబౌలి జంక్షన్ చేరుకోవాలి.

లింగంపల్లి నుంచి గచ్చిబౌలి వెళ్లే వారు.. హెచ్‌సీయూ (HCU) మెయిన్ గేట్ లేదా బస్ డిపో వద్ద ఎడమవైపునకు తిరిగి మజీద్‌బండ, శ్రీరాంనగర్ మీదుగా బొటానికల్ గార్డెన్ జంక్షన్ చేరుకోవాలి. అక్కడి నుంచి అంజయ్యనగర్ గుండా గచ్చిబౌలి వెళ్లవచ్చు.

ఈ మార్పుల వల్ల ప్రయాణ సమయం కొంత పెరిగే అవకాశం ఉన్నందున, ఐటీ ఉద్యోగులు తమ ప్రయాణాలను ముందుగానే ప్లాన్ చేసుకోవాలని ట్రాఫిక్ పోలీసులు సూచించారు. నగర అభివృద్ధి కోసం చేపట్టిన ఈ పనులకు ప్రజలంతా సహకరించాలని కోరారు.