Omicron: ఒమిక్రాన్ ఎంఆర్‌ఎన్‌ఏ బూస్టర్ వ్యాక్సిన్‌ ప్రారంభం

Omicron: కొవిడ్ వేరియంట్ ఒమిక్రాన్ నివారణ కోసం ఒమిక్రాన్ ఎంఆర్‌ఎన్‌ఎ ఆధారిత బూస్టర్ వ్యాక్సిన్‌ను కేంద్ర మంత్రి జితేంద్ర సింగ్ శనివారం ప్రారంభించారు. జెమ్ కొవాక్ ఒమ్(GEMCOVAC-OM) అనేది భారత దేశానికి చెందిన మొట్టమొదటి ఎంఆర్‌ఎన్‌ఎ ఆధారిత వ్యాక్సిన్. స్వదేశీ సాంకేతికతతో జెనోవా దీనిని అభివృద్ధి చేసింది. డిపార్ట్‌మెంట్ ఆఫ్ బయోటెక్నాలజీ (డీబీటీ), బయోటెక్నాలజీ ఇండస్ట్రీ రీసెర్చి అసిస్టెన్స్ కౌన్సిల్ (బీఐఆర్‌ఎసీ) నిధులు సమకూర్చాయి. సాధారణ ఉష్ణోగ్రతల స్థాయిలో ఈ వ్యాక్సిన్ నిల్వ చేయవచ్చు. అలాగే దేశంలో ఎక్కడికైనా రవాణా చేయవచ్చు . సూది, సిరంజీ అవసరం లేకుండా ఈ ఇంజెక్షన్‌ను ఇవ్వవచ్చని మంత్రి జితేంద్ర సింగ్ ఈ సందర్భంగా వివరించారు.

Also Read: Parshottam Rupala: తెలంగాణలో రాబోయేది బీజేపీ ప్రభుత్వమే.. కేంద్రమంత్రి రూపాల

కొన్ని రోజుల క్రితం, ఈ టీకా అత్యవసర వినియోగ అనుమతి కోసం డ్రగ్ కంట్రోల్ జనరల్ ఆఫ్ ఇండియా (DCGI) కార్యాలయం నుంచి ఆమోదం పొందింది. రోగులు ఎవరైనా కొవిషీల్డ్, కొవాక్సిన్ టీకాలు వేయించుకున్నా బూస్టర్ డోస్‌గా ఈ ఒమిక్రాన్ వ్యాక్సిన్‌ను వేసుకోవచ్చు. ఎంఆర్‌ఎన్‌ఎ ఆధారిత ఇతర వ్యాక్సిన్ల మాదిరిగా ఈ వ్యాక్సిన్‌కు అతిశీతల సరఫరా వ్యవస్థ అవసరం లేదు. దేశంలో ఎక్కడికైనా ఎటువంటి ఉష్ణోగ్రతల్లో నైనా సరఫరా చేయవచ్చు. సంప్రదాయ సిరంజీలు, సూదులు అవసరం లేకుండా ఈ వ్యాక్సిన్‌ను తీసుకోవచ్చు. వేగంగా అందుబాటు లోకి తీసుకురాడానికి తాము చేసిన ప్రయత్నాలకు ఈ అనుమతి రావడమే సాక్షంగా జెనోవా బయోఫార్మాక్యూటికల్స్ సంస్థ సీఈవో సంజయ్ సింగ్ చెప్పారు. సాధారణంగా వ్యాక్సిన్ల సరఫరాకు దేశంలో 2 నుంచి 8 డిగ్రీల ఉష్ణోగ్రత వరకు సౌకర్యం కల్పించ వలసి ఉంటుంది. కానీ ఈ బూస్టర్ ఒమిక్రాన్ వ్యాక్సిన్‌కు సరఫరా చేయాలన్నా నిల్వ చేయాలన్నా అతిశీతల ఉష్ణోగ్రత పరిస్థితి అవసరం లేదని కేంద్ర సైన్స్ అండ్ టెక్నాలజీ మంత్రి జితేంద్ర సింగ్ వెల్లడించారు.

Also Read: Facial Hair Removal: ముఖంపై ఉన్న చిన్న చిన్న రోమాలతో ఇబ్బంది పడుతున్నారా.. ఇలా చేయండి మళ్లీ రావు..!

ఎంఆర్‌ఎన్‌ఎ ఆధారిత డిసీజ్ డయాగ్నోస్టిక్ ప్లాట్‌ఫారం టెక్నాలజీ ఉపయోగించి ఈ జెమ్ కొవాక్ ఒమ్‌ వ్యాక్సిన్‌ను తయారు చేయడమైందని డీబీటీ సెక్రటరీ, బయోటెక్నాలజీ ఇండస్ట్రీ రీసెర్చి అసిస్టెన్స్ కౌన్సిల్ (బిఐఆర్‌ఎసి) ఛైర్‌పర్సన్‌ రాజేష్ ఎస్ గోఖలే వెల్లడించారు. ఇదే టెక్నాలజీతో మరికొన్ని వ్యాక్సిన్లను త్వరలో తయారు చేస్తామని చెప్పారు.