NEET UG 2026 Re-Exam: నేషనల్ టెస్టింగ్ ఏజెన్సీ (NTA) జూన్ 29న దేశవ్యాప్తంగా నీట్ యూజీ (NEET UG) 2026 రీ-ఎగ్జామినేషన్ను నిర్వహించడానికి సర్వసిద్ధం చేస్తోంది. అయితే, ఈ పరీక్ష జరగడానికి ముందే ఎన్టీఏ నిర్వహణా లోపాలపై మరో సరికొత్త వివాదం చెలరేగింది. ఎన్టీఏ చేసిన ఒక భారీ పొరపాటు కారణంగా నాగపూర్కు చెందిన అబ్దుల్లా అనే విద్యార్థికి ఏకంగా యూఏఈ (UAE) లోని అబుదాబిలో పరీక్షా కేంద్రాన్ని కేటాయించారు. పరీక్షకు కేవలం కొద్ది రోజుల సమయం మాత్రమే ఉన్న తరుణంలో జరిగిన ఈ విచిత్ర పరిణామం సదరు విద్యార్థిని, అతని కుటుంబాన్ని తీవ్ర ఆందోళనలోకి నెట్టింది. నిజానికి అంతకుముందు జరిగిన మొదటి పరీక్షలో ఈ విద్యార్థి నాగపూర్లోనే పరీక్ష రాశాడు.
ఈ ఘటనతో ఎన్టీఏ పరిపాలనా విధానం, పనితీరు మరోసారి తీవ్ర విమర్శలపాలైంది. అబ్దుల్లా తన నీట్ అప్లికేషన్ ఫారమ్ నింపే సమయంలో తన స్థానిక ప్రాధాన్యతలుగా నాగపూర్, వార్ధా, భండారా ప్రాంతాలను ఎగ్జామ్ సెంటర్లుగా ఎంచుకున్నాడు. కానీ, ఎన్టీఏ మాత్రం వీటన్నింటినీ పక్కనబెట్టి, అతని సొంత ఊరికి వేల కిలోమీటర్ల దూరంలో ఉన్న అబుదాబిలో సెంటర్ కేటాయించింది. ఈ హాల్ టికెట్ చూసి తమ కుటుంబం ఒక్కసారిగా షాక్కు గురైందని అబ్దుల్లా తండ్రి మీడియాతో తెలిపారు. తాము ఎంతో జాగ్రత్తగా నాగపూర్ పరిసర ప్రాంతాలనే ఎంచుకుంటే, విదేశాల్లో సెంటర్ ఎలా కేటాయించారో అస్సలు అర్థం కావడం లేదని వాపోయారు.
సమస్య అంతటితో ఆగలేదు.. ఆ విద్యార్థికి అసలు పాస్పోర్ట్ సైతం లేదు. ఇంత తక్కువ సమయంలో పాస్పోర్ట్, వీసా ఫార్మాలిటీస్ పూర్తి చేసుకుని, పరీక్ష రాయడానికి విదేశాలకు వెళ్లడం ఆ కుటుంబానికి దాదాపు అసాధ్యమైన విషయం. ఈ ఘోర తప్పిదంపై మహారాష్ట్ర మాజీ మంత్రి, కాంగ్రెస్ నాయకుడు డాక్టర్ అనీస్ అహ్మద్ తీవ్ర ఆగ్రహం వ్యక్తం చేశారు. ఎన్టీఏ పరీక్షా విధానాన్ని ఒక పెద్ద జోక్గా మార్చేసిందని ఆయన మండిపడ్డారు. విద్యార్థికి వెంటనే సవరించిన (రివైజ్డ్) అడ్మిట్ కార్డ్ను జారీ చేసి, ఈ తప్పును సరిదిద్దాలని డిమాండ్ చేశారు. ఇక, ఈ దారుణమైన పొరపాటు వెలుగులోకి వచ్చిన వెంటనే, విద్యార్థి తల్లిదండ్రులు ఎన్టీఏ హెల్ప్లైన్ను సంప్రదించి ఫిర్యాదు చేశారు. దీనిపై స్పందించిన ఎన్టీఏ అధికారులు.. సాంకేతిక లోపం (టెక్నికల్ గ్లిచ్) కారణంగానే ఈ తప్పు జరిగిందని అంగీకరించారు. త్వరలోనే దీనిని సరిచేస్తామని వారికి హామీ ఇచ్చారు. అయినప్పటికీ, కొత్త హాల్ టికెట్ చేతికి వచ్చేంతవరకు ఆ విద్యార్థి, అతని కుటుంబం తీవ్రమైన మానసిక ఒత్తిడిని అనుభవించారు.