Muhammad Yunus: న్యూయార్క్ ఎయిర్‌పోర్టులో బంగ్లాదేశ్ మాజీ తాత్కాలిక ప్రభుత్వ ప్రధాన సలహాదారు ముహమ్మద్ యూనస్‌కు తీవ్ర నిరసన ఎదురైంది. “మీరు ఉగ్రవాది, వేలాది మందిని చంపేశారు” అంటూ ప్రవాస బంగ్లాదేశీయులు ఆయనను నిలదీశారు. షేక్ హసీనా ప్రభుత్వం పడిపోయిన తర్వాత బంగ్లాదేశ్ బాధ్యతలు చేపట్టిన యూనస్, ఆ పదవి నుంచి తప్పుకున్నాక విదేశాల్లో పర్యటించడం ఇదే మొదటిసారి. ఈ క్రమంలో సోమవారం నాడు న్యూయార్క్‌లోని జాన్ ఎఫ్ కెన్నెడీ (JFK) అంతర్జాతీయ విమానాశ్రయంలో దిగిన ఆయనకు ఈ చేదు అనుభవం ఎదురైంది. సోషల్ మీడియాలో దీనికి సంబంధించిన వీడియో కూడా వైరల్ అయింది. ‘మీరు టెర్రరిస్ట్, బంగ్లాదేశ్‌లో ఎంతోమందిని పొట్టనబెట్టుకున్నారు, ఇక్కడకు ఎందుకొచ్చారు?’ అంటూ కొందరు వ్యక్తులు ఆయనపై తీవ్ర ఆగ్రహం వ్యక్తం చేశారు.
కొన్ని బంగ్లాదేశ్ మీడియా నివేదికల ప్రకారం.. వేలాది మంది పోలీసుల మరణాలకు యూనసే కారణమని ఆరోపిస్తూ ఆయనను వెనక్కి వెళ్లిపోవాలని డిమాండ్ చేశారు. పరిస్థితి చేయి దాటుతుండటంతో అప్రమత్తమైన భద్రతా సిబ్బంది వెంటనే స్పందించి, యూనస్‌ను అక్కడి నుంచి సురక్షిత ప్రాంతానికి తరలించారు. ఢాకాకు చెందిన ‘డైలీ సన్’ పత్రిక కథనం ప్రకారం.. ఈ వాగ్వాదం జరుగుతున్న సమయంలో యూనస్, ఆయన సహచరురాలు లామియా మోర్షెద్ హుటాహుటిన ఎయిర్‌పోర్టు లోపలికి వెళ్లిపోయారు. అయితే ఈ ఘటనపై అప్పట్లో యూనస్ గానీ, ఆయన ప్రతినిధులు గానీ ఎలాంటి అధికారిక ప్రకటన చేయలేదు. ఇక, 2024 ఆగస్టులో షేక్ హసీనా పదవి నుంచి తప్పుకున్నాక దేశంలో చెలరేగిన అల్లర్లు, హింసను అణచడంలో యూనస్ తాత్కాలిక ప్రభుత్వం పూర్తిగా విఫలమైందన్న విమర్శలున్నాయి. అంతేకాకుండా, యూనస్ పదవీకాలంలో భారత్-బంగ్లాదేశ్ సంబంధాలు కూడా దెబ్బతిన్నాయి. ముఖ్యంగా 2025 మార్చిలో చైనాలో పర్యటించినప్పుడు భారత్‌లో ఈశాన్య రాష్ట్రాలపై ఆయన చేసిన వివాదాస్పద వ్యాఖ్యలు రెండు దేశాల మధ్య మరింత దూరాన్ని పెంచాయి.