Kotamreddy Sridhar Reddy: ఎమ్మెల్యే కోటంరెడ్డి శ్రీధర్‌రెడ్డి గృహనిర్బంధం

Kotamreddy Sridhar Reddy: వైసీపీ నుంచి సస్పెండైన నెల్లూరు రూరల్‌ ఎమ్మెల్యే కోటంరెడ్డి శ్రీధర్‌రెడ్డిని పోలీసులు హౌస్ అరెస్ట్ చేశారు. నగరంలోని మాగుంట లేఔట్‌లోని నివాసం నుంచి బయటకు వెళ్లకుండా ఆయన్ను అడ్డుకున్నారు. అనుమతి లేదంటూ పోలీసులు అడ్డుకోవడంతో తన ఇంటి వద్దే కోటంరెడ్డి బైఠాయించి నిరసన తెలిపారు. పొట్టెపాలెం కలుజు వద్ద వంతెన నిర్మాణం చేయాలని డిమాండ్‌ చేస్తూ 8 గంటలపాటు జలదీక్షకు కోటంరెడ్డి పిలుపునిచ్చారు. ఆ నిరసన కార్యక్రమానికి వెళ్లేందుకు ఆయన సిద్ధమవడంతో పోలీసులు గృహనిర్బంధం చేశారు. దీంతో పెద్ద ఎత్తున కోటంరెడ్డి అభిమానులు, కార్యకర్తలు ఆయన నివాసం వద్దకు చేరుకున్నారు. అక్కడ భారీగా పోలీసులను మోహరించారు.

Read Also: Vandebharat: తెలుగు రాష్ట్రాల వందేభారత్ రైలుపై మరోసారి రాళ్ల దాడి.. రాకపోకల్లో ఆలస్యం

తెల్లవారుజామున భారీ సంఖ్యలో పోలీసులు కోటం రెడ్డి నివాసం వద్దకు చేరుకొని ఆయనను బయటికి రానీయకుండా అడ్డుకున్నారు. దీక్షకు అనుమతి లేదని. శాంతిభద్రతలకు సమస్యలు ఏర్పడతాయని పోలీసులు ఆయనకు స్పష్టం చేశారు. తాను ఈ దీక్షను చేయాలని చాలా రోజులు ముందే ప్రకటించానని..ఎవరికీ ఇబ్బంది లేకుండా దీక్ష చేస్తానని చెప్పినా పోలీస్ అనుమతించకపోవడం సరికాదన్నారు. వంతెన నిర్మాణానికి ప్రభుత్వం ఉత్తర్వులు ఇస్తే తాను ముఖ్యమంత్రి జగన్‌కు పాలాభిషేకం చేస్తానని ప్రకటించారు. పోలీసులు అడ్డుకున్నా దీక్ష చేస్తానని ఆయన స్పష్టం చేశారు. దీక్షకోసం పొట్టేపాలెం కలుజు వద్ద ఏర్పాటు చేసిన టెంట్‌ను పోలీసులు తొలగించారు. అనుమతులు లేకపోవడంతో తొలగించినట్లు వెల్లడించారు.