Komatireddy Venkat Reddy: ఢిల్లీలో కేంద్ర మంత్రి నితిన్ గడ్కరీతో రాష్ట్ర రోడ్లు భవనాలు, సినిమాటోగ్రఫీ శాఖ మంత్రి కోమటి రెడ్డి వెంకట్ రెడ్డి ప్రత్యేక భేటీ కొనసాగింది. ఈ భేటీ సందర్భంగా తెలంగాణలో కీలక మౌలిక వసతుల ప్రాజెక్టులపై మంత్రి చర్చించారు. ఎల్బీనగర్ – హయత్ నగర్ డబల్ డెక్కర్ ఎలివేటెడ్ కారిడార్‌కు కేంద్రమంత్రి ఆమోదం తెలిపారు. కృష్ణా నదిపై ఐకానిక్ కేబుల్ బ్రిడ్జి నిర్మాణానికి సంబంధించిన శంకుస్థాపన ప్రతిపాదనకు సైతం గ్రీన్ సిగ్నల్ ఇచ్చారు. దీంతో ఐకానిక్ బ్రిడ్జి నిర్మాణం వల్ల NH 167kపై తెలంగాణ నుంచి ఆంధ్రప్రదేశ్ అనుసంధానం జరిగి, రవాణా వ్యవస్థ, పర్యాటకం మెరుగుపడనుంది.
ఇక, హైదరాబాద్ – శ్రీశైలం NH 765పై ఎలివేటెడ్ కారిడార్‌ విజ్ఞప్తిపై నూతన డీపీఆర్ సిద్ధం చేయాలని కేంద్రమంత్రి అధికారులను ఆదేశించారు. పర్వతమాల పథకం ద్వారా తెలంగాణకు 5 రోప్ వేలకు సై అన్నారు. హైదరాబాద్ – అమరావతి గ్రీన్ ఫీల్డ్ హైవేపై సానుకూలంగా స్పందించారు. సేతు బంధన్ పథకం ద్వారా 3 ఆర్ఓబిలకు ఆమోదం తెలిపారు. తెలంగాణలో 34 పనులకు సీఆర్ఐఎఫ్ (CRIF) నిధులను మంజూరు చేయాలని రాష్ట్ర మంత్రి కోరగా ఓకే చెప్పేశారు. పుల్లూరు – అలంపూర్ – జట్రపోలు – పెంట్లవెల్లి – కొల్లాపూర్ – లింగాల – అచ్చంపేట – డిండి – దేవరకొండ – మల్లేపల్లి – నల్గొండ రాష్ట్ర హైవేలను జాతీయ హైవేలుగా మార్చాలనే డిమాండ్‌పై గడ్కరీ సానుకూలంగా స్పందించారు. హైదరాబాద్‌లో నవంబర్ 19-22 వరకు జరగనున్న ఇండియన్ రోడ్ కాంగ్రెస్(IRC)కు కేంద్ర మంత్రి నితిన్ గడ్కరీని ఆహ్వానించగా వస్తానని తెలిపారు.