Mumbai Indians: 2027 ఐపీఎల్ కప్ లక్ష్యంగా ముంబై ఇండియన్స్‌‌లో కీలక మార్పులు.. జట్టుకు కొత్త హెడ్ కోచ్ నియామకం..

ముంబై ఇండియన్స్ ఫ్రాంచైజీ తమ జట్టు నూతన ప్రధాన కోచ్‌గా వెస్టిండీస్ మాజీ ఆల్ రౌండర్ కీరన్ పొలార్డ్‌ను నియమించింది. గత కొంతకాలంగా జట్టు బ్యాటింగ్ కోచ్‌గా బాధ్యతలు నిర్వర్తించిన పొలార్డ్‌కు ఇప్పుడు పగ్గాలు అప్పగిస్తూ ఫ్రాంచైజీ శనివారం అధికారిక ప్రకటన విడుదల చేసింది. ఐదుసార్లు ఐపీఎల్ ఛాంపియన్‌గా నిలిచిన ముంబై ఇండియన్స్‌తో పొలార్డ్‌కు 16 ఏళ్ల సుదీర్ఘ అనుబంధం ఉంది. కేవలం 22 ఏళ్ల వయస్సులోనే ముంబై ఫ్రాంచైజీలో చేరిన అతడు, జట్టు సాధించిన అనేక విజయాల్లో కీలక పాత్ర పోషించాడు. ఆటగాడిగా, బ్యాటింగ్ కోచ్‌గా జట్టులోని ప్రతి అంశంపై పూర్తి అవగాహన ఉండటం అతడికి కలసివచ్చే ప్రధాన అంశం. ఆధునిక టీ20 క్రికెట్‌లోని వ్యూహాలు, మారుతున్న పరిస్థితులపై పొలార్డ్‌కు ఉన్న అపార అనుభవం హెడ్ కోచ్‌గా జట్టును నడిపించడంలో సహాయపడుతుందని ఫ్రాంచైజీ భావిస్తోంది.

ఈ నియామకంపై పొలార్డ్ స్పందిస్తూ ఆనందం వ్యక్తం చేశాడు. ముంబై ఇండియన్స్ హెడ్ కోచ్‌గా బాధ్యతలు చేపట్టడం తన కెరీర్‌లో ఒక ముఖ్యమైన మైలురాయి అని, అభిమానులతో , జట్టుతో తనకు ఉన్న అనుబంధం ఎంతో ప్రత్యేకమైనదని పేర్కొన్నాడు. తనపై నమ్మకం ఉంచి ఈ బాధ్యతను అప్పగించిన నీతా అంబానీ, ఆకాష్ అంబానీలతో పాటు సమగ్ర ముంబై కుటుంబానికి అతడు ధన్యవాదాలు తెలిపాడు. ముంబై జట్టుకున్న గొప్ప వారసత్వాన్ని ముందుకు తీసుకెళ్తూ, యువ ఆటగాళ్ల ప్రతిభను వెలికితీసేందుకు ప్రాధాన్యత ఇస్తానని స్పష్టం చేశాడు.

ముంబై ఇండియన్స్ సహ యజమాని నీతా అంబానీ ఈ నియామకంపై హర్షం వ్యక్తం చేశారు. గత 16 ఏళ్లుగా పొలార్డ్ తమ కుటుంబంలో ఒక అంతర్భాగంగా మారాడని, ఆటగాడిగా ఎన్నో మరచిపోలేని క్షణాలను అందించడమే కాకుండా కోచ్‌గా తన అనుభవాన్ని ఆటగాళ్లతో పంచుకున్నాడని కొనియాడారు. ముంబై జెర్సీ ప్రాముఖ్యత , అభిమానుల అంచనాలు పొలార్డ్‌కు బాగా తెలుసని, హెడ్ కోచ్‌గా కూడా అదే నిబద్ధత, పట్టుదలతో జట్టును విజయం వైపు నడిపిస్తాడని ఆమె ఆశాభావం వ్యక్తం చేశారు. సుదీర్ఘ అనుభవం, జట్టుతో ఉన్న బలమైన బంధంతో పొలార్డ్ ముంబై ఇండియన్స్‌ను సరికొత్త విజయాల దిశగా నడిపించేందుకు సిద్ధమయ్యాడు.