Kamal Haasan on Bharateeyudu Remuneration: బ్లాక్ బస్టర్ చిత్రం ‘భారతీయుడు’ గురించి లోక‌నాయ‌కుడు కమల్‌హాసన్‌ ఆసక్తికర వ్యాఖ్యలు చేశారు. భారతీయుడు సినిమాలో తాను భాగం కావాలనుకోలేదని తెలిపారు. డైరెక్టర్ ఎస్ శంకర్ తనంతట తానుగా తనను తప్పించాలని కావాలనే రెమ్యునరేషన్‌ పెంచానని, కానీ నిర్మాతలు అంగీకరించడంతో సినిమాలో నటించానని చెప్పారు. శంకర్ పట్టుదల తాను ఆశ్యర్చపోయానని కమల్‌హాసన్‌ పేర్కొన్నారు. 1996లో వ‌చ్చిన భారతీయుడుకి సీక్వెల్‌గా భారతీయుడు 2 వస్తోంది. జులై 12న ఇది ప్రేక్షకుల ముందుకురానుంది.
చిత్ర యూనిట్ భారతీయుడు 2 ట్రైల‌ర్‌ను మంగళవారం విడుద‌ల చేశారు. ఈ సందర్భంగా కమల్‌హాసన్‌ మాట్లాడుతూ.. భారతీయుడు రోజులను గుర్తుచేసుకున్నారు. ‘అవినీతి విషయంలో అందరి మైండ్‌ సెట్‌ మారాలి. భారతీయుడు వచ్చినప్పటికీ.. ఇప్పటికీ ఏం మార్పు రాలేదు. పార్ట్ 2 అంతా అవినీతి నేపథ్యంలోనే తెరకెక్కించారు. సినిమా చూశాక చాలామంది ఆలోచిస్తారు. నేను గతంలో నటించిన కొన్ని చిత్రాల్లోని పాత్రలతో పోలిక ఉండడంతో భారతీయుడులో భాగం కావాలనుకోలేదు. అందుకే డైరెక్టర్ శంకర్ తనంతట తానుగా నన్ను తప్పించాలని ఓ ప్లాన్ వేశా. కావాలనే నా రెమ్యునరేషన్‌ పెంచాను. నిర్మాతలు నా డిమాండ్లకు అంగీకరించడంతో నటించాను. శంకర్‌కు తన కథపై నమ్మకం ఎక్కువ. భారతీయుడును నాతోనే తీయాలని పట్టుబట్టాడు. శంకర్ పట్టుదల చూసి నేను ఆశ్యర్చపోయాను. ఎన్నో ఏళ్లుగా ఆదరిస్తున్న ప్రేక్షకులకు నా కృతజ్ఞతలు’ అని కమల్‌హాసన్‌ చెప్పారు.
Also Read: Prabhas Fan: ‘కల్కి 2898 ఏడీ’ క్రేజ్.. షాప్ క్లోజ్ చేసిన ప్రభాస్ ఫ్యాన్!
ఎస్ శంకర్, కమల్‌హాసన్‌ కాంబోలో వస్తున్న చిత్రం భారతీయుడు 2. లైకా ప్రొడ‌క్ష‌న్స్‌, రెడ్ జైంట్ మూవీస్ ఈ చిత్రాన్ని నిర్మిస్తున్నాయి. ఈ సినిమాపై భారీ అంచ‌నాలు ఉన్నాయి. ఈ చిత్రంకు అనిరుధ్ ర‌విచంద్ర‌న్ సంగీతాన్ని అందించారు. ఇందులో సిద్ధార్థ్‌, కాజ‌ల్ అగ‌ర్వాల్‌, ర‌కుల్ ప్రీత్ సింగ్, ప్రియా భ‌వానీ శంకర్, ఎస్‌జె సూర్య, బాబీ సింహ.. ఎంతో మంది స్టార్స్ నటించారు.
