KA Trailer: ‘క’ ట్రైలర్‌ విడుదల.. అంచనాలు పెంచేలా, ఆసక్తిరంగా..!

టాలీవుడ్ యంగ్ హీరో కిర‌ణ్ అబ్బ‌వ‌రం నటించిన తాజా చిత్రం ‘క‌’. సుజీత్, సందీప్ ద‌ర్శ‌క‌త్వంలో ఈ సినిమా తెరకెక్కింది. చింతా వరలక్ష్మి సమర్పణలో శ్రీచక్రాస్ ఎంటర్టైన్మెంట్స్ బ్యానర్‌పై చింతా గోపాలకృష్ణ రెడ్డి నిర్మాణంలో రూపుదిద్దుకుంది. న‌య‌న్ సారిక‌, త‌న్వి రామ్ క‌థానాయిక‌లు. దీపావళి కానుకగా అక్టోబర్‌ 31న క‌ సినిమా విడుదల కానుంది. ఈ నేపథ్యంలోనే చిత్ర యూనిట్ ట్రైలర్‌ను విడుదల చేసింది.

2 నిమిషాల 45 సెకండ్ల నిడివి గల క‌ ట్రైలర్.. యాక్షన్ సన్నివేశంతో మొదలవుతుంది. చుట్టూ కొండల మధ్య ఉన్న కృష్ణగిరి అనే అందమైన ఊరిలో పోస్ట్ మ్యాన్‌గా పనిచేస్తుంటాడు అభినయ వాసుదేవ్. మధ్యాహ్నమే చీకటి పడే ఆ ఊరు భౌగోళికంగా ఎంతో ప్రత్యేకం. అక్కడ సత్యభామ అనే అందమైన అమ్మాయితో అతడు ప్రేమలో పడతాడు. ఉత్తరాలు పంచే క్రమంలో 1979 ఏప్రిల్ 22న అభిషేక్ పేరుతో వచ్చిన ఉత్తరం వాసుదేవ్ జీవితాన్ని మలుపు తిప్పుతుంది. ఆ ఉత్తరంలో ఏముందో చెప్పమంటూ.. ఓ ముసుగు వ్యక్తి వాసుదేవ్‌‌ను బెదిరిస్తాడు. ఆ ఉత్తరంలో ఏముంది?, వాసుదేవ్‌‌ను ఆ ముసుగు వ్యక్తి, అతని గ్యాంగ్ ఎందుకు వెంటాడుతున్నారు? అనే అంశాలు ఆసక్తిని కలిగించాయి.

Also Read: IND vs NZ 2nd Test: నాలుగో ఇన్నింగ్స్‌ ఆడలేం.. 200 ప్లస్ లీడ్‌ ఉంటేనే గెలుపై అవకాశాలు!

ఉత్కంఠకు గురిచేసే సన్నివేశాలతో క‌ ట్రైలర్‌ ఆద్యంతం ఆకట్టుకునేలా సాగింది. కిరణ్‌ అబ్బవరం నటన, సంభాషణలు, యాక్షన్‌ సన్నివేశాలు సినిమాపై అంచనాలు పెంచేశాయి. ఇప్ప‌టికే ఈ చిత్రం నుంచి విడుద‌లైన గ్లింప్స్‌, టీజ‌ర్‌, పాట‌లు అల‌రించాయి. కిర‌ణ్ అబ్బ‌వ‌రం నటించిన తొలి పాన్‌ ఇండియా మూవీ ఇదే. తెలుగుతో పాటు త‌మిళ్‌, మ‌ల‌యాళం, క‌న్న‌డ బాష‌ల్లోనూ ఈ చిత్రం విడుద‌ల కానుంది.