బెంగళూరులోని చిన్నస్వామి స్టేడియం తనకు హోం గ్రౌండ్ అని, ఈ మైదానం పరిస్థితుల గురించి తనకంటే బాగా ఇంకా ఇంకెవరికి తెలుసు? అని ఢిల్లీ క్యాపిటల్స్ (డీసీ) బ్యాటర్ కేఎల్ రాహుల్ అన్నాడు. చిన్నస్వామి స్టేడియంలో ఆడటాన్ని ఎప్పుడూ ఆస్వాదిస్తా అని తెలిపాడు. స్టేడియం చిన్నదే అయినా.. పిచ్‌ మాత్రం సవాల్‌ విసురుతుంది అని చెప్పుకొచ్చాడు. రాయల్ ఛాలెంజర్స్‌ బెంగళూరు (ఆర్‌సీబీ) కెప్టెన్ రజత్ పాటీదార్‌ తన క్యాచ్‌ను వదిలేయడం కలిసొచ్చిందని రాహుల్ తెలిపాడు. ఐపీఎల్ 2025లో భాగంగా గురువారం చిన్నస్వామి స్టేడియంలో ఆర్‌సీబీతో జరిగిన మ్యాచ్‌లో డీసీ గెలిచింది.
బెంగళూరు నిర్ధేశించిన 164 పరుగుల లక్ష్యాన్ని ఢిల్లీ 4 వికెట్లు కోల్పోయి 17.5 ఓవర్లలోనే ఛేదించింది. లోకల్ బాయ్‌ కేఎల్ రాహుల్ 53 బంతుల్లో 7 ఫోర్లు, 6 సిక్సులతో 93 పరుగులు చేసి బెంగళూరు పతనాన్ని శాసించాడు. అయితే 5 పరుగుల వద్ద రాహుల్ క్యాచ్‌ను రజత్ పాటీదార్‌ వదిలేయడంతో ఆర్‌సీబీ భారీ మూల్యం చెల్లించుకుంది. కడవరకు క్రీజులో నిలబడి తన జట్టుకు అద్భుత విజయాన్ని అందించిన రాహుల్‌కు ‘మ్యాన్ ఆఫ్ ది మ్యాచ్’ అవార్డు దక్కింది. ఈ సందర్భంగా రాహుల్ మాట్లాడుతూ.. హోం గ్రౌండ్‌లో ఆడడం ఏ ఆటగాడికైనా ప్రత్యేకం అని పేర్కొన్నాడు. చిన్నస్వామి స్టేడియంలో మంచి ఇన్నింగ్స్ ఆడడం ఆనందంగా ఉందన్నాడు.
Also Read: Gold Rate Today: నిన్న రూ.2940, నేడు రూ.2020.. ఇక బంగారం కొనడం కష్టమేనా?
‘చిన్నస్వామి స్టేడియం చిన్నదే అయినా.. పిచ్‌ మాత్రం సవాల్‌ విసురుతుంది. ఈ మ్యాచ్‌లో ముందుగా కీపింగ్‌ చేయడం కూడా నాకు కలిసొచ్చింది. ఎలా ఆడాలో ముందుగానే అంచనా వేయగలిగా. బంతి ఆగుతూ వస్తుందనిపించింది. మంచి ఆరంభం దక్కితే చాలనుకున్నా. నా ఆటపై నమ్మకం ఉంది. ప్రత్యర్థికి ఏది టార్గెట్‌ అవుతుందనేది నాకు తెలుసు. ఇన్నింగ్స్ ఆరంభంలో పరిస్థితులకు తగ్గటు కాస్త ఆచితూచి ఆడాను. ఆరంభంలోనే క్యాచ్‌ను వదిలేయడం అదృష్టమే. ఇది నా గ్రౌండ్, నా హోమ్. నాకంటే ఇక్కడి పరిస్థితులు ఇంకెవరికి తెలుసు. చిన్నస్వామి స్టేడియంలో ఆడటాన్ని నేను ఎప్పుడూ ఆస్వాదిస్తా. ఈరోజు ఆనందంగా ఉంది’ అని కేఎల్ రాహుల్ చెప్పాడు.
