Rahul Dravid Coach: ఐపీఎల్‌లోకి రీఎంట్రీ.. హెడ్‌ కోచ్‌గా రాహుల్ ద్రవిడ్!

Rahul Dravid Likely to Return Rajasthan Royals as Head Coach: టీ20 ప్రపంచకప్‌ 2024తో టీమిండియా హెడ్‌ కోచ్‌గా రాహుల్ ద్రవిడ్ పదవీకాలం పూర్తయిన విషయం తెలిసిందే. ద్రవిడ్ మళ్లీ ఇండియన్ ప్రీమియర్ లీగ్ (ఐపీఎల్‌)లోకి ఎంట్రీ ఇస్తున్నాడని సోషల్ మీడియాలో వార్తలు వస్తున్నాయి. అతడిని మెంటార్‌గా లేదా కోచ్‌గా తీసుకోవడానికి చాలా ఫ్రాంఛైజీలు ఆసక్తి చూపిస్తున్నాయి. గత సీజన్‌లో కోల్‌కతా నైట్‌ రైడర్స్‌కు మెంటార్‌గా వ్యవహరించిన గౌతమ్‌ గంభీర్‌ భారత జట్టు కోచ్‌గా నియమితుడయ్యాడు. దీంతో ద్రవిడ్‌ను మెంటార్‌గా కేకేఆర్‌ ప్రాంచైజీ నియమిస్తుందని ప్రచారం జరిగింది. తాజాగా మరో న్యూస్ నెట్టింట చక్కర్లు కొడుతోంది.

ది వాల్ రాహుల్ ద్రవిడ్‌తో రాజస్థాన్‌ రాయల్స్‌ చర్చలు జరుపుతున్నట్లు తెలుస్తోంది. ద్రవిడ్‌ను హెడ్‌ కోచ్‌గా నియమించాలని రాజస్థాన్‌ ఫ్రాంఛైజీ భావిస్తోందని సమాచారం. రాజస్థాన్‌ రాయల్స్‌, రాహుల్ ద్రవిడ్ మధ్య చర్చలు జరుగుతున్నాయని.. త్వరలోనే దీనిపై ప్రకటన వచ్చే అవకాశం ఉందని ఆర్ఆర్ ఫ్రాంఛైజీ వర్గాలు తెలిపాయి. టీ20 ప్రపంచకప్‌ 2024ను భారత్ గెలవడంతో ద్రవిడ్‌కు మరింత క్రేజ్ పెరిగింది. ప్రస్తుతం అతడి కోసం చాలా ప్రాంఛైజీలు క్యూలో ఉన్నాయి.

Also Read: IND vs SL: భారత్‌తో టీ20 సిరీస్‌.. శ్రీలంక జట్టు ప్రకటన! కెప్టెన్‌ ఎవరంటే?

రాజస్థాన్‌ రాయల్స్ జట్టుతో రాహుల్ ద్రవిడ్‌కు మంచి అనుబంధం ఉంది. గతంలో ఆ జట్టుకు కెప్టెన్‌గా వ్యవహరించాడు. ఐపీఎల్‌కు రిటైర్మెంట్ ప్రకటించిన తర్వాత మెంటార్‌గా కూడా పనిచేశాడు. ఈ నేపదాయంలో రాజస్థాన్‌ వైపే ది వాల్ మొగ్గుచూపే అవకాశాలు ఉన్నాయి. ఇదే జరిగితే రాజస్థాన్‌ రాయల్స్‌ హెడ్ కోచ్‌గా ఉన్న శ్రీలంక దిగ్గజం కుమార సంగక్కర.. ఫ్రాంఛైజీ డైరెక్టర్‌ ఆఫ్‌ క్రికెట్‌గా కొనసాగే అవకాశాలు ఉన్నాయి. చూడాలి మరి ద్రవిడ్‌ హెడ్‌ కోచ్‌గా రీఎంట్రీ ఇస్తాడో లేదో.