Child Sexual Abuse Content Sharing: సోషల్ మీడియా వేదికగా పిల్లలకు సంబంధించిన లైంగిక దోపిడీ, అశ్లీల కంటెంట్ లింకులను షేర్ చేస్తున్నారనే ఆరోపణలపై మేడ్చల్ జిల్లా పరిధిలోని జీడిమెట్ల పోలీసులు గాజులరామారానికి చెందిన శానప్ప అనే వ్యక్తిపై కేసు నమోదు చేశారు.
పోలీసుల వివరాల ప్రకారం.. నిందితుడు ఇన్స్టాగ్రామ్ వేదికగా బాలల లైంగిక దోపిడీకి సంబంధించిన కంటెంట్ను వీక్షిస్తూ, వాటికి సంబంధించిన లింకులను ఇతరులకు షేర్ చేస్తున్నట్లు గుర్తించారు. ఈ కార్యకలాపాలకు సంబంధించిన సమాచారాన్ని అమెరికాకు చెందిన నేషనల్ సెంటర్ ఫర్ మిస్సింగ్ అండ్ ఎక్స్ప్లాయిటెడ్ చిల్డ్రన్ (NCMEC) గుర్తించింది. NCMEC తన టిప్లైన్ ద్వారా సంబంధిత సమాచారాన్ని నేషనల్ క్రైమ్ రికార్డ్స్ బ్యూరో (NCRB)కు అందించింది. ఈ అందిన సమాచారంతో రాష్ట్ర సైబర్ క్రైమ్ పోలీసులు ఈ వ్యవహారంపై దృష్టి సారించారు.
అందిన సమాచారాన్ని పరిశీలించిన సైబర్ క్రైమ్ పోలీసులు సంబంధిత ఆన్లైన్ కార్యకలాపాలకు సంబంధించిన ఐపీ అడ్రస్, ఫోన్ నంబర్ వివరాలను సేకరించినట్లు తెలుస్తోంది. ఈ వివరాల ఆధారంగా అనుమానితుడి కార్యకలాపాలు జీడిమెట్ల పోలీస్ స్టేషన్ పరిధిలో ఉన్నట్లు గుర్తించి, ఆ సమాచారాన్ని స్థానిక పోలీసులకు అందించారు. దీంతో జీడిమెట్ల పోలీసులు గాజులరామారం ప్రాంతానికి చెందిన శానప్పపై కేసు నమోదు చేసి దర్యాప్తు చేపట్టారు. సోషల్ మీడియా ద్వారా బాలల లైంగిక దోపిడీకి సంబంధించిన కంటెంట్ను షేర్ చేయడం, ప్రసారం చేయడం వంటి కార్యకలాపాలపై పోలీసులు దర్యాప్తు కొనసాగిస్తున్నారు. బాలల లైంగిక దోపిడీకి సంబంధించిన కంటెంట్ను చూడటం, నిల్వ చేయడం, షేర్ చేయడం లేదా ఇతరులకు పంపడం చట్టపరంగా తీవ్రమైన పరిణామాలకు దారితీసే అవకాశం ఉంది.
