Ind Vs WI: శివాలెత్తిన వెస్టిండీస్ బ్యాట్స్‌మెన్స్.. భారత్ ముందు భారీ లక్ష్యం.. మూడు సెంచరీలు నమోదు..

గౌహతిలోని బర్సపారా క్రికెట్ స్టేడియంలో భారత్‌తో జరుగుతున్న రెండో వన్డేలో వెస్టిండీస్ జట్టు నిర్ణీత 50 ఓవర్లలో 7 వికెట్ల నష్టానికి 405 పరుగుల భారీ స్కోరు సాధించింది. భారత్ ముందు భారీ లక్ష్యాన్ని ఉంచింది. టాస్ ఓడి ముందుగా బ్యాటింగ్‌కు దిగిన వెస్టిండీస్ జట్టులో ముగ్గురు బ్యాటర్లు సెంచరీలతో చెలరేగి రికార్డు సృష్టించారు. ఓపెనర్ జాన్ క్యాంప్‌బెల్ కేవలం 68 బంతుల్లోనే 9 ఫోర్లు, 5 సిక్సర్లతో 101 పరుగులు చేసి  వెనుదిరిగాడు. ఆ తర్వాత కెప్టెన్ షాయ్ హోప్ 94 బంతుల్లో 8 ఫోర్లు, 3 సిక్సర్లతో 104 పరుగులు చేసి పెవిలియన్ చేరాడు. వీరితో పాటు అమీర్ జంగూ అద్భుతమైన బ్యాటింగ్‌తో విరుచుకుపడ్డాడు. జంగూ 77 బంతుల్లో 13 ఫోర్లు, 3 సిక్సర్లతో 114 పరుగులు చేసి భారీ స్కోరు సాధించడంలో కీలక పాత్ర పోషించాడు. మిగతా బ్యాటర్లలో రోస్టన్ ఛేజ్ 29 పరుగులతో, షమర్ జోసెఫ్ 14 పరుగులతో నాటౌట్ నిలిచారు.

భారత బౌలర్లలో కుల్దీప్ యాదవ్, రవీంద్ర జడేజా రెండేసి వికెట్లు పడగొట్టగా, గుర్నూర్ బ్రార్ రెండు వికెట్లు దక్కించుకున్నాడు. ప్రసిద్ధ్ కృష్ణ ఒక వికెట్ తీశాడు. అయితే భారత బౌలర్లు భారీగా పరుగులు సమర్పించుకున్నారు. ముఖ్యంగా గుర్నూర్ బ్రార్ 96 పరుగులు ఇచ్చి ఖరీదైన బౌలర్‌గా నిలిచాడు. వెస్టిండీస్ ఇన్నింగ్స్‌లో మొత్తం 23 ఎక్స్‌ట్రాలు లభించాయి. వన్డే చరిత్రలో భారత్‌‌పై నమోదైన అత్యధిక స్కోర్లలో ఇది మూడో స్థానంలో నిలిచింది.

ఇన్నింగ్స్ విరామం అనంతరం భారత్ తరఫున కెప్టెన్ శుభ్‌మన్ గిల్ హెవీ రోలర్ కోరడం ద్వారా పిచ్‌ను బ్యాటింగ్‌కు అనుకూలంగా మార్చాలని భావించాడు. మైదానంలో చిన్న బౌండరీలు ఉండటం, మంచు (డ్యూ) ప్రభావం చూపే అవకాశం ఉండటంతో ఈ భారీ లక్ష్యాన్ని ఛేదించవచ్చని టీమిండియా ఆత్మవిశ్వాసంతో ఉంది. అయితే ప్రారంభ ఓవర్లలో వికెట్లు కోల్పోకుండా ఆడటం భారత్‌కు ఎంతో కీలకం కానుంది. వెస్టిండీస్ బ్యాటర్ల సుడిగాలి ఇన్నింగ్స్‌ల కారణంగా మ్యాచ్‌ పై ఆసక్తి పెరిగింది.  నిర్ణీత సమయంలో భారత్ ఈ లక్ష్యాన్ని ఛేదిస్తుందా లేదా అనేది ఆసక్తికరంగా మారింది.