Tadka Buttermilk Recipe: వేసవి కాలంలో ఎండ తీవ్రత రోజురోజుకూ పెరుగుతోంది. ఈ సమయంలో శరీరాన్ని చల్లగా ఉంచుకోవడం, డీహైడ్రేషన్ నుంచి రక్షించుకోవడం చాలా ముఖ్యం. అలాంటి వేళల్లో మజ్జిగ ఉత్తమ పానీయంగా భావిస్తారు. ముఖ్యంగా తడ్కా మజ్జిగ లేదా మసాలా మజ్జిగ తాగితే శరీరం చల్లబడటమే కాకుండా జీర్ణక్రియ కూడా మెరుగుపడుతుంది. వేసవి తాపం నుంచి తక్షణ ఉపశమనం కోసం మజ్జిగ ఎంతో ఉపయోగపడుతుంది.. అయితే, సాధారణంగా చాలామంది మార్కెట్లో దొరికే మసాలా మజ్జిగను కొనుగోలు చేస్తుంటారు. కానీ, ఇంట్లోనే కొద్దిపాటి పదార్థాలతో ఎంతో రుచికరమైన తడ్కా మజ్జిగను సులభంగా తయారు చేసుకోవచ్చు. రెస్టారెంట్ లేదా ధాబాల్లో దొరికే రుచిని మీ ఇంటికే తీసుకురావచ్చు.
తడ్కా మజ్జిగకు కావలసిన పదార్థాలు
* 2 కప్పుల తాజా పెరుగు
* 1 కప్పు చల్లటి నీరు
* సన్నగా తరిగిన పచ్చిమిర్చి
* తురిమిన అల్లం
* పచ్చి కొత్తిమీర
* నల్ల ఉప్పు
* వేయించిన జీలకర్ర పొడి
* చిటికెడు ఇంగువ
తాలింపు కోసం
* 1 టీస్పూన్ నెయ్యి లేదా నూనె
* ఆవాలు
* కరివేపాకు
* ఎండు మిరపకాయలు
తయారీ విధానం
ముందుగా పెరుగును ఒక గిన్నెలో వేసి బాగా గిలకొట్టాలి. తర్వాత చల్లటి నీటిని కలిపి పలుచగా చేసుకోవాలి. ఇప్పుడు అందులో నల్ల ఉప్పు, జీలకర్ర పొడి, పచ్చిమిర్చి ముక్కలు, తురిమిన అల్లం వేసి బాగా కలపాలి. ఇప్పుడు ఒక చిన్న బాణలిలో నెయ్యి లేదా నూనె వేడి చేసి, అందులో ఆవాలు వేయాలి. ఆవాలు చిటపటలాడిన తర్వాత కరివేపాకు, ఇంగువ, ఎండు మిరపకాయలు వేసి తాలింపు సిద్ధం చేసుకోవాలి. ఈ వేడి తాలింపును మజ్జిగలో పోసి వెంటనే మూత పెట్టాలి. ఇలా చేస్తే తాలింపు సువాసన మజ్జిగలో బాగా కలుస్తుంది. చివరిగా సన్నగా తరిగిన కొత్తిమీరతో అలంకరించి చల్లగా వడ్డించాలి.
ప్రత్యేక చిట్కా
మజ్జిగకు పల్లెటూరి పొగ వాసన రావాలంటే చిన్న బొగ్గు ముక్కను మండించి ఒక చిన్న గిన్నెలో పెట్టాలి. దానిపై కొద్దిగా నెయ్యి చిలకరించి మజ్జిగ పాత్రలో ఉంచి మూత పెట్టాలి. రెండు నిమిషాల తర్వాత తీసేస్తే అసలైన ధాబా స్టైల్ రుచి వస్తుంది. మొత్తంగా తడ్కా మజ్జిగ వేసవిలో శరీరాన్ని చల్లబరుస్తుంది. జీర్ణక్రియను మెరుగుపరుస్తుంది. అలసట తగ్గించి శక్తిని ఇస్తుంది. నీరసం, వేడి సమస్యల నుంచి ఉపశమనం కలిగిస్తుంది. ఈ వేసవిలో ఇంట్లోనే ఈ రుచికరమైన తడ్కా మజ్జిగను తయారు చేసి కుటుంబ సభ్యులతో ఆస్వాదించండి
