Hot Spot 2 : ‘హాట్ స్పాట్ 2 మచ్’.. వినోదానికి రెట్టింపు డోస్ అందించే కొత్త చిత్రం

2024లో విడుదలైన ‘హాట్ స్పాట్’ చిత్రం తన విభిన్నమైన కథాంశంతో, సామాజిక అంశాలపై సంధించిన ప్రశ్నలతో ‘ఆహా’ (Aha) ఓటిటీలో భారీ రెస్పాన్స్ అందుకున్న సంగతి తెలిసిందే. అదే ఊపుతో ఇప్పుడు దర్శకుడు విఘ్నేష్ కార్తిక్ ఈ సిరీస్‌కు సీక్వెల్‌ను సిద్ధం చేశారు. ‘హాట్ స్పాట్ 2 మచ్’ పేరుతో తెరకెక్కిన ఈ చిత్రం ఫిబ్రవరి 27 నేరుగా డిజిటల్ ప్లాట్‌ఫామ్‌లో విడుదలయ్యింది. సమకాలీన సమాజంలోని సున్నితమైన అంశాలను వినోదభరితంగా చూపిస్తూనే, ఆలోచింపజేసే ప్రయత్నం చేశామని చిత్ర యూనిట్ చెబుతోంది.

ఈ సీక్వెల్‌లో ఒక భారీ స్టార్ కాస్ట్ అలరించబోతోంది. ప్రముఖ నటి ప్రియా భవాని శంకర్, సీనియర్ నటులు ఎం.ఎస్. భాస్కర్, తంబి రామయ్యలతో పాటు యువ నటులు అశ్విన్ కుమార్, ఆదిత్య భాస్కర్ కీలక పాత్రల్లో నటించారు. మోజ్విత్-మోవిహాన్ సమర్పణలో అనిల్ రెడ్డి ఎం, ముని చంద్రారెడ్డి ఎన్, ఇందుకుమార్ ఎం సంయుక్తంగా ఈ చిత్రాన్ని నిర్మించారు. మొదటి భాగంలో నాలుగు భిన్నమైన కథలను ఒకదానితో ఒకటి ముడిపెడుతూ చూపించిన విధానం ప్రేక్షకులను ఆకట్టుకుంది. ఇప్పుడు రెండో భాగంలో అంతకు మించిన డోస్ ఉంటుందని ‘2 మచ్’ అనే టైటిల్‌తోనే హింట్ ఇచ్చారు. వివాదాస్పదంగా అనిపించినా, వాస్తవాలకు దగ్గరగా ఉండే కథలను ఎంచుకోవడంలో విఘ్నేష్ కార్తిక్ సిద్ధహస్తుడు. మరి ఈ సీక్వెల్ కూడా మొదటి భాగం లాగే ‘ఆహా’లో రికార్డ్ వ్యూస్ సాధిస్తుందో లేదో చూడాలి.