Honda vs Hero: హీరో మోటోకార్ప్‌కు షాకిచ్చిన హోండా!

Honda vs Hero Sales: పండుగ సీజన్ వేళ ప్రముఖ ద్విచక్ర వాహన తయారీ సంస్థ ‘హీరో మోటోకార్ప్‌’కు మరో ప్రముఖ ద్విచక్ర వాహన తయారీ సంస్థ ‘హోండా మోటార్‌ సైకిల్‌ అండ్‌ స్కూటర్‌ ఇండియా’ షాక్ ఇచ్చింది. సెప్టెంబర్‌ నెలలో నమోదైన రిటైల్‌ విక్రయాల్లో హీరోను హోండా దాటేసింది. దేశంలోనే అత్యధిక ద్విచక్ర వాహనాలు విక్రయించిన కంపెనీగా హోండా అగ్రస్థానంలో ఉంది. గత నెల రిటైల్‌ సేల్స్‌కు సంబంధించిన గణాంకాలను ఫెడరేషన్‌ ఆఫ్‌ ఆటోమొబైల్‌ డీలర్స్‌ అసోసియేషన్‌ వెల్లడించింది.

సెప్టెంబర్‌లో హోండా 62,537 యూనిట్ల విక్రయాలతో 27.73 శాతం మార్కెట్‌ వాటాతో అగ్రస్థానంలో నిలిచింది. మరోవైపు హీరో 22.54 శాతం వాటాతో రెండో స్థానంలో నిలిచింది. ఈ రెండు కంపెనీలు తమ నెలవారీ రిటైల్ విక్రయాలు తగ్గడం విశేషం. టీవీఎస్‌ మోటార్‌, బజాజ్‌ ఆటో, సుజుకీ మోటార్‌ సైకిల్‌ ఇండియా టాప్‌-5లో నిలిచాయి. ఈ ఐదు సంస్థలు కలిపి 86.57 మార్కెట్‌ వాటాను కలిగి ఉన్నాయి.

Also Read: Amazon-MX Player: ఎంఎక్స్‌ ప్లేయర్‌ను కొనుగోలు చేసిన అమెజాన్‌.. రీ ఇన్‌స్టాల్‌, అప్‌గ్రేడ్‌ అవసరం లేదు!

అయితే హోల్‌సేల్‌ విక్రయాల పరంగా హీరో మోటోకార్ప్‌ అగ్రస్థానంలో కొనసాగుతోంది. ఈ ఆర్థిక సంవత్సరంలో ఇప్పటివరకు 2.96 లక్షల యూనిట్లను హీరో హోల్‌ సేల్‌గా విక్రయించింది. హోల్‌సేల్‌ విక్రయాలు ఈ సంవత్సరానికి 18.75 శాతం పెరిగింది. హోండా మోటార్‌ సైకిల్‌ అండ్‌ స్కూటర్‌ ఇండియా 2.92 లక్షల యూనిట్లతో రెండో స్థానంలో ఉంది.